Display Style:
Column Style
नेपाल प्रहरी दुने १६२९म्ह कोरोना संक्रमित
लहनान्युज | ञंलाथ्व १३ ११४०,भाद्र १५ सोमवाः
प्रहरी दुने कोरोना संक्रमितपि न्हिया न्हिथं अप्वोया वना च्वंगु दु ।
थौं तक निम्ह डीआईजी नाप कोरोना संक्रमितपि १६२९ म्ह थ्यःगु दु । उकि मध्ये ८९३म्ह सक्रिय संक्रमित थ्यःगु दु ।
६९३ वासः याका छेँय् लिहा वने धुकुगु दु । प्रहरी प्रधान कार्यालयय् ज्यायाइपि ९७म्ह व स्वनिगः दुनेया ३२२ म्ह सक्रिय संक्रमित जुयाच्वंगु दु ।
प्रहरी प्रवक्ताया कथं प्रदेश १ य् २०८म्ह, प्रदेश २ य् १२०म्ह, वाग्मती प्रदेशय् ४३म्ह, गण्डकीइ ६०म्ह, प्रदेश ५ य् ५३म्ह, कर्णाली प्रदेशय् १५ म्ह व सुदूरपश्चिम प्रदेशय् १८म्हेसित संक्रमित जूया च्वंगु दु ।
लुँ वहःया भाः थौं न थहा वन
लहनान्युज | ञंलाथ्व १३ ११४०,भाद्र १५ सोमवाः
नेपाःया बजारय् लुँया भाः थौं न थहा वःगु दु । म्हिगः स्वया तोलां थौं स्वसः थहा वःगु खः ।
नेपाल सुनचाँदी व्यवसायी महासंघं थौं सोमवाःया लागि छापावाल लुँ छगु तोलाय् ९७ हजार न्यासः कायम याःगु दु । म्हिगः तोलाय् ९७ हजार निसः तोके याःगु खः ।
अथेहे तेजाबी लुँया भाः न थहा वःगु दु । तेजावी लुँ छगु तोला ९७ हजार कायम याःगु दु । तेजावी लुँ न थौं स्वसः थहा वःगु खः ।
अथेहे वहः न छगु तोलाय् २५ तका थहा वःगु दु । थौं वहः तोलां १३६५ तक थ्यःगु दु धका महासंघं धाःगु दु ।
वीरगञ्जय् ४१ म्ह व पसाय् ३२म्ह संक्रमित थपे जुल
लहनान्युज | ञंलाथ्व १३ ११४०,भाद्र १५ सोमवाः
वीरगञ्जय् याःगु परीक्षणय् ४१ म्हेसित कोरोना संक्रमण पुष्टि जूगु दु । नारायणी अस्पतालय् पीसीआर प्रयोगशाला याःगु परीक्षणय् खुदँ निसे ७० दँया पिन्त संक्रमण खने दुगु खः । उकि मध्ये संक्रमितपि च्याम्ह मिसापि खः ।
जिल्ला प्रशासन कार्यालय पर्सां म्हिगः आइतवाः बहनि याःगु सार्वजनिक रिपोर्टय् आःतक ४८२ म्ह मिसा नाप २ हजार १६० म्हेसित कोरोना संक्रमण खने दुगु दु । उकि मध्ये ६८४ म्ह कोरोनामुक्त जुया छेँ लिहा वने धुकुगु दु । अथेहे ३६म्ह कोरोना संक्रमण मदेय् धुकुगु दु ।
२७ म्ह मिसापि नाप ९८ म्ह आइसोलेसनय् व २१८ म्ह मिसापि नाप ९८४ म्ह होम आइसोलेसनय् च्वनाच्वंगु दु । कोभिड अस्पतालय् आइसियुूलय् च्वना १९ म्हेसिया वासः याका वयाच्वंगु दु ।
“विविध नेपाली साहित्यिक जुम सम्मेलन“ जुइगु
लहनान्युज | ञंलाथ्व १३ ११४०,भाद्र १५ सोमवाः
सेभ नेवाः भ्यालीया ग्वसालय् निक्वःगु न्ह्यब्वया कथं “विविध नेपाली साहित्यिक जुम सम्मेलन“ कन्ह्य तःजिक जुइ त्यःगु धका दबूयसंयोजक शैलश शाक्य बरेजू लहनान्युजयात कनादिगु दु ।
उगु ज्याझ्वः मंगलवाः कन्ह्य बहनी ६ ता ईलय् जूमपाखे जुइगु उगु ज्याझ्वलय् दकलय् न्हापां बरिष्ठ गायक प्रेम ध्वज प्रधानया राजमती म्येया म्युजिक भिडियोपाखे सुरुवात जुइ त्यःगु खः ।
ज्याझ्वलय् अमर राज राजोपाध्याय (मुक्तक), दिपेन्द्र बिक्रम थापा (सदाबहार गायक), प्रतिसरा सायमी (चिनाखं), डा.कृष्ण हरि बराल (गजलकार), सानु बाबु महर्जन (म्ये), उषा शेरचन (बरिष्ठ कवियत्री), निशा देसार (म्ये), राजभाइ जकमि (चिनाखं), अभय श्रेष्ठ (कवि), नरेन्द्र प्यासी (बरिष्ठ गायक), रजनीमिला (चिनाख) पिन्स थःथःगु सास्कृतिक ज्याझ्वः न्ह्यब्बयादि ।
यल महानगरया नगर प्रहरी प्रमुखय् सीताराम हाछथू
शोभा श्रेष्ठ | ञंलाथ्व १३ ११४०,भाद्र १५ सोमवाः
यल महानगरपालिकाया नगर प्रहरी प्रमुखय् ट्राफिक व्यवस्थापनय् सक्षम व सफलम्ह पूर्वट्राफिक प्रहरी निरीक्षक सीताराम हाछेथू नियुक्त याःगु दु ।
हाछेथूयात नगर प्रहरी व दमकलयात व्यवस्थित यायेगु जिम्मेवारी बिया महानगरं म्हिगः आइतवाः नियुक्त याःगु दु ।
यल महानगरपालिकाया मेयर चिरिबाबु महर्जनं महानगरपालिकाया नगर प्रहरीया क्षमताय् अझ बालाइगु धका हाछेथूयात नियुक्त यानागु खः धका धाःगु दु । हाछेथूया ज्या यायेगु क्षमता, शैलीं तसक प्रभावित जुया हे नियुक्त यानागु धका मेयर महर्जनं धाःगु दु
यल महानगर दुने ट्राफिक व्यवस्थापनय् महानगरं तयार यानागु महानगरस्तरीय ट्राफिक व्यवस्थापन सम्बन्धित योजना कार्यान्वयन यायेगु लागि विज्ञया रुपय् हाछेथू भूमिका म्हितिगु धइगु
बिश्वास नियुक्त यानगु जानकारी मेयर महर्जनं बियादिगु खः ।
हाछेथू विसं. २०७५ साल मंसिर महिनाय् नेपाल प्रहरीपाखे सेवानिवृत्त जूम्ह खः । प्रहरी जागीरय् ट्राफिक व्यवस्थापनय् बालाक्क याःगुलि राष्ट्रप्रमुख, सरकार प्रमुख, नेपालया थीथी मन्त्रालय, राष्ट्रिय तथा अन्तर्राष्ट्रिय संघ संस्थापाखे १२९ गु मल्याक पुरस्कार काये धुकुगु खः ।
