Display Style:
Column Style
कन्ह्य निसे सवारी जोर विजोर प्रणाली लागू
लहनान्युज | गुंलागा २ ११४०,साउन २१ बुधवाः
सरकारं कन्ह्य निसे निजी व सार्वजनिक सवारी साधनय् जोर विजोर प्रणाली लागू याये त्यःगु दु ।
कोरोना भाइरस (कोभिड–१९) या जोखिम अप्वः जुगुलि जोर विजोर लागू यानागु धका गृह मन्त्रालयया प्रवक्तां धाःगु दु ।
सरकारं २६ असार निसे निजी सवारी साधनय् जोर विजोर हटे याना स्वनिगलय् सार्वजनिक यातायात सञ्चालन यायेगु अनुमति बिःगु खः । अथेहे भदौ १ निसे ताःहाकगु दुरीया सवारी चले याके बिःगु निर्णय याःगु खः ।
तर कोरोना संक्रमणया जोखिम अप्वःया वःगुलि विज्ञ तयेस जोर विजोर लागू यायेगु सुझाव बिःगु खः ।
म्हिगः मंगलवाः प्रधानमन्त्री केपी शर्मा ओलीं विज्ञपि नाप पूर्ण लकडाउन याये माःगु स्वास्थ्य मापदण्डय् कडाई यायेत जोरविजोर चले यायेत सुझाव बिःगु खः । सरकारं कन्ह्य चान्ह्य ९ निसे सुथय् ५बजे तक न्यासि वनेगु तक रोक लगे याःगु दु ।
सामुदायिक विद्यालयया गुणस्तरय् ध्यान बिइनु : मेयर शाक्य
लहनान्युज | गुंलागा २ ११४०,साउन २१ बुधवाः
येँ महानगरपालिकाया मेयर विद्यासुन्दर शाक्यं सामुदायिक विद्यालयं चुम्बकीय गुणया विकास यानाः संस्थागत विद्यालयया स्वया गुणस्तरीय शिक्षा बिइगुलि निर्माण यायेमाःगुलि बः बियादिगु दु ।
ज्ञानोदय माध्यमिक विद्यालयस नेपाल सरकारया ग्वाहालिपाखें सामुदायिक विद्यालयय् अध्ययन याइपिं छात्रापिन्त निःशुल्क स्यानिटरी प्याड वितरणया शुभारम्भ ज्याझ्वःयात सम्बोधन यासें मेयर शाक्यं थःथे धयादिगु खः ।
मेयर शाक्यं नीजि क्षेत्रया विद्यालयं गये विद्यार्थी व अभिभावकपिन्त आकर्षित यानाच्वंगु दु, आः अथेहे बुलुहुँ सामुदायिक विद्यालयं नं चुम्बकीय गुणया विकास यायेमाः । संस्थागत विद्यालय विद्यार्थीपिनिगु आकर्षण अप्वल धकाः गुनासो यायेगु मखु, वः स्वया बांलाःगु व गुणस्तरीय शिक्षा बियाः विद्यार्थीपिनिगु भविष्य जिमिसं दयेकाः बिइ धैगु ग्यारेन्टी सामुदायिक विद्यालयं बिइ फयेके माः धका धयादिसे सामुदायिकय् स्वतः विद्यार्थीपिनिगु अप्वइ धका बिचाः तयादिगु खः ।
मेयर शाक्य सामुदायिक विद्याल सरकारं निःशुल्क शिक्षाया व्यवस्था यानातःगु लुमंकूसें निःशुल्क शिक्षाया धइगु कमजोर शिक्षा मजूगु प्रष्ट यानादिगु खः । झीसं कमजोर मखु गुणस्तरीय व उत्कृष्ट शिक्षा खः । संस्थागत विद्यालयं बिइगु सिबें नं अझ उत्कृष्ट व गुणस्तरी शिक्षा सामुदायिक विद्यालयं बिइ फयेके माल । सामुदायिक विद्यालयं संस्थागत विद्यालयया सिबें गुणस्तरीय शिक्षा बिइगु लकस ब्वलंकेगु खःसा संस्थागत विद्यालय स्वतः बन्द जुइ ।
संघीय, प्रदेश व स्थानीय सरकारय् दुपिं जनप्रतिनिधि व अभिभावकपिनिगु जिम्मेवारी व दायित्व संस्थागत विद्यालययात बन्द यायेगु मजुसे संस्थागत विद्यालयलिसे धेंधेंबल्ला यायेफइगु सामुदायिक विद्यालय निर्माण यायेगु जूगु नं मेयर शाक्यं धयादिल ।
येँ महानगरपालिका स्थानीय सरकार जूगु नातां भौतिक पूर्वाधार, शिक्षक शिक्षिकायात बिइगु तालिम लिसेंया नितिं तयार दु । जिमिसं सामुदायिक विद्यालयया गुणस्तर सुधार यायेफत धाःसा संस्थागत विद्यालय स्वतः कमजोर जुयाः वनी । झीसं बजारय् छुं सामान न्याः वनेबलय् सुनानं गुणस्तरीय सामान दंक बिल धाःसा थिकेगु थासय् वनाः न्याः वनीमखु । शिक्षा नं वहे खः ।
मेयर शाक्यं सामुदायिक विद्यालयया प्रधानाध्यापकपिन्सं नं संस्थागत विद्यालययात निषेध मखु, जिगु विद्यालयस ब्वनाच्वंपिं विद्यार्थीपिनिगु भविष्यया भाला जिं काये धैगु ध्येयया लिसें ब्वंकाः विद्यार्थी व अभिभावकपिन्त नं विश्वस्थ यायेमाःगुलि बः बियादिल ।
मेयर शाक्यं विद्यालय शिक्षा जिमिगु ब्वलय् वयेधुंकाः विद्यालय सुधारया छुं कुतः जिमिसं यानागु दु धयादिसें दुनेया सुधारया ब्व शिक्षक शिक्षिक हे खः धकाः धयादिल । मेयर शाक्यं धयादीगु दु, शिक्षा समिति, विभाग व नगरसभां निर्णय यानाः येँ महानगरपालिका क्षेत्र दुनेया सकतां सामुदायिक विद्यालयया भौतिक पूर्वाधार निर्माणया भाला जिमिसं कयागु दु ।
मेयर शाक्यं वमध्ये फुक्क विद्यालयस रंगरोगनया ज्या थ्यंमथ्यं क्वचाःगु जानकारी बियादिल । मेयर शाक्यं शौचालय मदुगु थासय् जिमिसं शौचालय दयेका बिइगु व शौचालयया ल्याः थप यायेमाःसा थप या धकाः धयागु खँया जानकारी नं बियादीगु दु । अथेहे, वय्कलं दूगु शौचालययात सुधार यायेमाःसा या धकाः नं धयागु दु धकाः धयादीगु दु ।
वर्षाया इलय् नाः व निभाः त्वइबलय् ब्वइगु अवस्था मजुइमा धकाः विद्यालय हाता दुने मैदान दयेकेगु लिसेंया ज्या नं महानगरपालिकां याःगु जानकारी बियादिल ।
मेयर शाक्यं धयादीगु दु, हरेक विद्यालयस बृक्षारोपण या धकाः जिमिसं बजेट विनियोजन यानागु दु । जिमिसं थीथी विद्यालययात प्राविधिक शिक्षाया नितिं नं बजेट विनियोजन यानागु दु ।
येँ महानगरपालिकां आर्थिक दं २०७७ व ०७८ या नितिं बालमेत्री चित्र व महावाणी लेखन, लैंगिक व अपांगमैत्री शौचालय निर्माण, सार्वजनिक पुस्तकालय व वाचनालयया स्तरोन्नति, प्राविधिक शिक्षा ज्याझ्वः, आविष्कार क्लब पलिस्था, सिटी पुस्तकालय स्थापना लिसेंया शीर्षकय् बजेट विनियोजन यानागु दु ।
लुँ तोलां छगु लाख स्वया अप्वल
लहनान्युज | गुंलागा २ ११४०,साउन २१ बुधवाः
थौं बुधवाः नेपाःया लुँ बजारय् छगु तोलाय् छगु लाख स्वया अप्वःया न्हुगु रिकर्ड तःगु दु ।
लुँया भाः थौं छापावाल छगु तोलाया १ लाख झीप्यसः थ्यःगु दु ।
थौं छन्हुं हे १६०० तका दामं अप्वःगु खः ।
नेपालय् ३८१म्हेसित कोरोना संक्रमण पुष्टि
लहनान्युज | गुंलागा २ ११४०,साउन २१ बुधवाः
बुधवाः नेपालय् ३८१म्हेसित कोरोना संक्रमण पुष्टि जूगु दु । स्वास्थ्य तथा जनसंख्या मन्त्रालयया कथं आः तक संक्रमितपि २१ द्धः व ३९० म्ह थ्यःगु दु ।
आः तक आइसोलेसनय् ६ द्धः व १७४म्ह च्वना च्वंगु दु ।
अथेहे थौं कोरोना संक्रमण १३० म्ह डिस्चार्ज जूगु दु । आःतक १५१५६म्ह डिस्चार्ज जुइ धुकुगु दु ।
स्वास्थ्य तथा जनसंख्या मन्त्रालयया कथं थौं बुधवाः पर्साय् १५१म्ह, येँ ५७म्ह, बाराय् २८म्ह, महोत्तरी व स्याङ्जाय् १७म्हेसित कोरोना संक्रमण पुष्टि जूगु दु ।
अथेहे मोरङय् १४म्ह, बाँकेय् १३म्ह, धनुषाय् १२म्ह, बझाङय् ११म्ह, सुर्खेतय् १०म्ह, कपिलवस्तुइ गुम्ह, सप्तरी च्याम्ह, यल व सर्लाहीइ न्याम्ह न्याम्हेसित कोरोना संक्रमण पुष्टि जूगु दु ।
कोरोना संक्रमितपि मकवानपुरय् प्यम्ह, गोरखाय् स्वम्ह, सुनसरी व इलाम, रौतहट, सिरहा, धादिङ व बागलुङय् निम्ह निम्ह उदयपुर, सिन्धुपाल्चोक, कास्की, दाङ व कालीकोटय् छम्ह छम्हेसित कोरोना जुगु दु ।
कोरोना भाइरस संक्रमणं नेपालय् छन्हु हे न्याम्ह मन्त
लहनान्युज | गुंलागा २ ११४०,साउन २१ बुधवाः
कोरोना भाइरस (कोभिड–१९) या संक्रमणं नेपालय् छन्हु हे न्याम्ह सीइगु दु । पर्सा व मोरङय् निम्ह निम्ह व येँ छम्ह सीइगु दु ।
थ्व नाप नेपालय् कोरोना संक्रमणया कारण सी पिनिगु ल्याः ६३ म्ह थ्यःगु दु ।
कोरोना संक्रमणं पर्साय् थप निम्ह मन्त । वीरगञ्ज–१५ भिश्वाया ४६ दँया छम्ह मिसा व पोखरिया नगरपालिका–८ या १८ दँ दुम्ह छम्ह मिसा मदुगु खः ।
अथेहे मोरङया कोशी अस्पताल, विराटनगरयो आइसोलेसन कक्षय् मदुगु खः । मदुम्ह विराटनगरया मिजंम्ह व अस्पताल हयेगु झ्वलय् रंगेली नगरपालिका– ८ दर्बेसाया ४५दँ दुम्ह मिजंम्ह
बुधवाः सुथय् अस्पताल हयेगु झ्वलय् लँय् मदुगु खः । स्वास्थ्यय् समस्या वये वः उपचारया लागि विराटनगर हःगु इलय् सुथय् १०ः३० बजे सीगु खः ।
अथेतु, येँ बलम्बुइ सशस्त्र प्रहरीया अस्पतालय् वासः याकेगु झ्वलय् कोभिड–१९ या संक्रमित जुया मदुगु खः । उम्ह मनू निमोनियाया नाप स्क्रब टाइफस तक जुगु खः ।
