वःगु २४ घण्टाया दुने २ हजार ३२३ म्हेसित कोरोना संक्रमणपि डिस्चार्ज जुगु दुु धका स्वास्थ्य मन्त्रालयं धाःगु दु।

थ्व नाप नेपालय् कोरोनामुक्त जूपि १ लाख ९३ हजार ३२५ म्ह थ्यःगु दु धका धाःगु दु ।

अथेहे २४ घण्टाया दुने कोरोना संक्रमणं न्ह्यम्ह मन्त। थ्व नाप नेपालय् कोरोना सीपि आःतक १ हजार ३०५ म्ह थ्यःगु दु।

वःगु २४ घण्टाया दुने शनिवाः थप १ हजार ६७४ म्हेसित कोरोना संक्रमण पुष्टि जूगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप नेपालय् कोरोना संक्रमितपि २ लाख १८ हजार ६३९ म्ह संक्रमितपि थ्यःगु दु धका मन्त्रालयं धाःगु दु ।

मन्त्रालयया कथं आःतक पीसीआर विधिपाखे १६ लाख ५२ हजार ४३म्हेसिगु परीक्षण याये धकुगु दु। 

वःगु २४ घण्टाय् जम्मा ८ हजार १४४ म्हेसिगु पीसीआर परीक्षण याःगु खः। देय् यकं सक्रिय संक्रमितपि आःतक २४ हजार ९म्ह दु।

आःतक क्वारेन्टाइनय् च्वना च्वपि ७५७ म्ह थ्यःगु दु।

वःगु २४ घण्टाया दुने स्वनिगलय् थप ८९९ म्हेसित कोरोना संक्रमित जुगु दु धका स्वास्थ्य तथा जनसंख्या मन्त्रालयं धाःगु दु।

थौं शनिवाः संक्रमित पुष्टि जूपि ३८७ म्ह मिसा व ५१२ म्ह मिजंपि खः।

थौं येँ जक ६८५म्हेसित कोरोना पुष्टि जूगु दु। अथेहे, ख्वपय् ४९ म्ह व यलय् १६५ म्हेसित संक्रमित जूगु दु धका धाःगु दु।

थौं छगु ज्याझ्वः दथुइ शंखधर उद्यानय् नेपाल संवतया प्रवर्तक राष्ट्रिय विभूति शंखधर साख्वाः व वरिष्ठ मानवाधिकारवादी नेता लिसें नेवाः न्ह्यलुवा पद्मरत्न तुलाधरया झ्वाता पुलांगु रत्नपार्कया दुने पलिस्था यायेगु ज्या जुगु दु।

येँ महानगरपालिकापाखें थुगु निगुलिं झ्वाता तयेगु ज्या जूगु खः । येँ मनपाया मेयर विद्यासुन्दर शाक्यपाखें हे छगू ज्याझ्वःया दथुइ निगुलिं झ्वाताया उलेज्या याःगु खः । शंखधर उद्यान दुने शंखधर साख्वाःया दनाच्वंगु पूर्णकदया झ्वाता व पद्मरत्न तुलाधरया मेचय् फ्यतुना च्वंगु शालीन मुद्राया झ्वाता तयेगु ज्या जूगु खः ।

उगु ज्याझ्वलय् मूपाहां कथं शहरी विकास मन्त्री कृष्णगोपाल श्रेष्ठं झ्वाताय् स्वां देछाय्गु ज्या जुगु खः। ज्याझ्वलय् थःगु खँ तयादिसे मन्त्री श्रेष्ठं शंखधर साख्वालं नीस्वंगु नेपाल संवत् नेपाःया राष्ट्रिय संवत् थुकियात सरकारी मान्यता दये हे माःगु खँय् बः बियादिगु दु। अथेतु मन्त्री श्रेष्ठ पद्मरत्न तुलाधरं थःगु जीवनय् देश व जनताया लागिं बाहेक थःगु लागिं गबलें नं छुं फ्वनामदीगु खँ कनादिगु खः ।

ज्याझ्वलय् न्ववानादीसे येँ महानगरपालिकाया मेयर विद्यासुन्दर शाक्यं स्थानीय सरकारपाखें हे शंखधर साख्वाः व पद्मरत्न तुलाधरया झ्वाता पलिस्था यायेगु ज्या जूगुलिं वय्कःपिनि योगदान राज्यपाखें नं सम्मानित जूवंगु बिचाः प्वंकादिल । वय्कलं धयादिल, ‘शंखधर साख्वालं नीस्वनादीगु नेपाल संवत्यात राष्ट्रिय मान्यता बीकेगु ज्याय् पद्मरत्न तुलाधरया तःधंगु योगदान दु ।

वय्कःपिनि योगदान सकस्यां लागिं प्रेरणाया स्रोत जुइमा धकाः येँ महानगरपालिकां थ्व झ्वाता तयेगु ज्या याःगु खः ।’ बागमती प्रदेशया भौतिक पूर्वाधार मन्त्री रामेश्वर फुयालं पद्मरत्न तुलाधरं देय्या गरिब जनताया लागिं यानादीगु आन्दोलनया खँ लुमंकादिल ।

येँ मनपाया उपमेयर हरिप्रभा खड्गीं लसकुस यासें न्ह्याकूगु उगु ज्याझ्वलय् पद्मरत्न तुलाधरया म्ह्याय् सुम्निमा तुलाधरं येँ मनपापाखें थ्व झ्वाता पलिस्था याःगुलिं पद्मरत्न तुलाधरयात सम्मान याःगु महसुस जूगु खँ कनादिल । ज्याझ्वलय् शहरी विकास राज्यमन्त्री रामवीर मानन्धर, भाजु तुलाधरया जहान नीलशोभा तुलाधर लिसें येँ मनपाया प्रमुख प्रशाकीय अधिकृत राजेश्वर ज्ञवालीपिनिगु नं उपस्थिति दुगु खः ।

शंखधर उद्यानय् पलिस्था याःगु थ्व निगुलिं झ्वाता मूर्तिकार महेश तुलाधरं दयेकादीगु खः ।