प्रधानमन्त्री केपी शर्मा ओलीं झापाया दमक नगरपालिकाया मदनडाँगी–ताराबारी–डिपु सतक तब्याकेगु आयोजनाया थौं उलेज्या यानादीगु दु।

विश्व बैंकया ग्वाहालिइ नगरपालिकाया गौरवया आयोजना कथं दूगु उगु सतक नेपाः न्यंकंपाखें ल्यःगु झिंन्हय्गू सतक मध्ये छगू खः। पीप्यंगू क्वति नीप्यंगू लख लागतय् दयेकूगु ४.८६ किलोमिटर हाकःया उगु सतक इलय् हे दयेके ज्या क्वचागुलिं नमुना आयोजना कथं काइ। प्रधानमन्त्री ओलीं देय्न्यंकं विकास निर्माणया नुमना थ्व सतक नं जूगु धयादिसें मेची महाकालीतक थियागु ज्या पूवंकेगु अभियानय् सरकार दूगु धयादीगु दु।

प्रधानमन्त्री ओलीं दमकया बेलडाँगीइ तःधंगु रङ्गशाला दयेकेगु घोषणा नं यानदिल। प्रधानमन्त्रीया निजी सचिवालयया कथं वय्कलं फुक्कं क्षेत्रय् भिंका यंकेगु योजना कथं स्वयंसेवाया भावना ज्वनाः महत्वपूर्ण निःशुल्क ‘अनलाइन’ कक्षा न्ह्याकेधुंका थुगुसिया एसइईया लिच्वः खय् १३ प्रतिशतं सुधार वःगु धयादिल।

उगु ज्याझ्वलय् भौतिक पूर्वाधार लिसें यातायातमन्त्री देवेन्द्र दाहाल, कोसी प्रदेशया मुख्यमन्त्री हिक्मतकुमार कार्की, पुलांपिं मुख्यमन्त्री शेरधन राई, उद्धव थापालिसेंया नं ब्वति दूगु खः।

स्वास्थ्य लिसें जनसङ्ख्यामन्त्री प्रदीप पौडेलं क्यान्सर ल्वय्या उपचारय् छ्यलीगु मदयेकं मगाःगु वासः सितिकं बिइगु धयादीगु दु।

नेपालय् वासः मदूगुलिं उपचारया निंतिं विदेश वनेमाःगु बाध्यता चिइकेत अन्तर्राष्ट्रिय च्यारिटी डाइरेक्ट रिलिफं स्वीइन्हय्ताजि वासः ग्वाहालि यायेगु प्रतिबद्धता प्वंकूगु कथं न्हापांगु चरणया वासः नेपाः थ्यंकेहःगु वय्कलं धयादिल। थ्व स्वया न्ह्यः मन्त्री पौडेलं थुजाःगु वासः कयाः सरकारी अस्पतालय् सितिकं इनेगु निर्णय न्यंकादीगु खः।

डाइरेक्ट रिलिफं वन हर्ट वल्र्डवाइड संस्थापाखें नेपाः सरकारयात छ्वयाहःगु ग्वाहालि लःल्हायेगु निंतिं ग्वसाः ग्वंगु ज्याझ्वलय् मन्त्री पौडेलं वासः मदयाः विदेश वनाः यक्वः ध्यबा फुकेमाला च्वंगु बाध्यता चिइकेत ताः ई कुतः लिपा ताःलाःगु मन्त्री पौडेलया सचिवालयं धाःगु दु।“क्यान्सरया वासः थिकेगु जुइगु जुयाः विपन्न नागरिकतय्त समस्या दु”, मन्त्री पौडेलं धयादिल, “राज्यया लगानी मजुइ कथं हे यक्वः नागरिकतय्त राहत बिइगु कुतः यानागु खः।”

आः स्वीन्हय्ताजि वासः कथं वइगु जुसां मेमेगु माः कथंया वासः नापं ग्वाहालि कायेगु कुतः यायेगु मन्त्री पौडेलं धयादिल। दुरुपा क्यान्सर, प्लाक सोरियासिस, अल्जाइमर नापंया स्वास्थ्य समस्याय् छ्यलीगु थुपिं वासः व स्वास्थ्य सामग्रीत भरतपुरया बीपी कोइराला मेमोरियल क्यान्सर अस्पताल, ख्वपया भक्तपुर क्यान्सर अस्पताल, बाँकेया सुशील कोइराला प्रखर क्यान्सर अस्पताल व येँया वीर अस्पतालयात लःल्हानागु मन्त्रालयया प्रवक्ता डा प्रकाश बुढाथोकीं धयादिल।

येँ महानगरपालिकां २५ अर्ब ७६ करोड ४३ लाख ४१ हजार रुपैयाँया बजेट हःगु दु।

थौ जूगु १७ गु नगरसभाया न्हापागु बैठकं उपप्रमुख सुनिता डंगोलं उगु बजेट सार्वजनिक याःगु खः।२५ अर्ब ११ करोड ४३ लाख ४१ हजार रुपैयाँ संचित कोषय् व्ययभार जुइगु व ६५ करोड रुपैयाँ मेमेगु पिनें व्ययभार जुइगु कथं उगु रकमया अनुमानित बजेट सार्वजनिक याःगु खः।

बजेट हयेगु न्ह्यः मेयर बालेन्द्र शाह (बालेन) नं नीति लिसे कार्यक्रम न्ह्यब्बःगु खः।बजेट हयेत लिबागुलि उपप्रमुख डंगोलं माफी तक फ्वंगु खः।

येँ महानगरपालिकां १७ गु नगर सभा सुरु जूगु दु। वइगु आर्थिक वर्ष २०८२/८३ या बजेट हयेगु निति महानगरया नगर सभा सुरु जूगु दु।

राजश्व परामर्श समितिया बैठकं आर्थिक वर्ष २०८२/८३ या निति २५ अर्ब ११ करोड रुपैयाँ बराबरया बजेट सीमा निर्धारण याःगु खः।

संवैधानिक व्यवस्था कथं स्थानीय तह न असार १० गते दुने बजेट हयेमाःगु खःसा येँ महानगर दुने आन्तरिक द्वन्द्वं लिपा लागु खः।

बुद्ध जन्मस्थल लुम्बिनी संयुक्त राष्ट्रसङ्घीय शैक्षिक, वैज्ञानिक नाप सांस्कृतिक सङ्गठन (युनेस्को) न सम्भावित खतराया धलखय् चिइकूगु दु।

युनेस्को वल्र्ड हेरिटेज कमिटीया पेरिसय् जुगु ४७ गु विश्व सम्पदा समितिया बैठकं दच्छिया निति लुम्बिनीयात खतराया धलखं चिइकेगु निर्णय याःगु  दु। बैठकं लुम्बिनीइ संरक्षणमैत्री व सुधारया जुयाच्वंगु न धाःगु दु।

बुल्गेरियाया प्रोफेसर निकोले नेनोवया अध्यक्षताय् क्वचाःगु बैठकं अथे निर्णय याःगु खः। युनेस्कों लुम्बिनीया समग्र अवस्था थुकेगु निति रिएक्टिभ मनिटरिङ मिसन लुम्बिनीइ छ्वयेगु निर्णय याःगु दु।बैठकय् दुथ्याम्ह लुम्बिनी विकास कोषया वरिष्ठ निर्देशक ज्ञानिन राई न थुगु मिसनं स्थलगत अवलोकन याना हःगु प्रतिवेदनकया आधार हाकन लुम्बिनीइ खतराया धलखय् तयेगु वा मतयेगु निर्णय जुइ धका धाःगु दु।

थ्व स्वया न्ह्यः वल्र्ड हेरिटेज सेन्टर व इकोमसं २०२२ य् सम्पदाविज्ञ रोलेन लिन व प्रोफेसर कारिया दुथ्याःगु रिएक्टिभ मनिटरिङ मिसन लुम्बिनीइ छ्वया हःगु खः। उगु मिसनं बिउगु प्रतिवेदनया आधारय् युनेस्कां २०२४ य् लुम्बिनीयार्त सम्भावित खतराया धलखय् तःगु खः।

कोषया सदस्यसचिव शाक्यं युनेस्को न याःगु पुलागु सिफारिस न अध्ययन याना उमिसं छु कारणं नुगः स्याकल धइगु विश्लेषण याना एसओसी (स्टेट अफ कन्जर्भसन रिपोर्ट) छ्वयागु लिच्वः कथं थुगु थथे बालागु लिच्वः वःगु धका धयादीगु खः। पेरिसय् जुलाई ६ निसे न्ह्यानाच्वंगु युनेस्को वल्र्ड हेरिटेज कमिटीया ४७ गु बैठक जुलाई १६ तक समापन जुइ।