राष्ट्रिय विभूति अरनिकोया स्मृति दिवस नाप नेपाल व्यवसायिक कलाकार संघ (क्यान)या ३१ क्वःगु स्थापना दिवसया झ्वलय् वरिष्ठ चित्रकार मदन चित्रकारलगायत १५ म्ह कलाकार तय्त सिरपाः बिउगु दु सा छम्ह कला व्यवसायीयात हंगु दु।

उगु ज्याझ्वलय् सुरेन्द्र प्रधान दीर्घ कला–साधक सिरपा वरिष्ठ चित्रकार मदन चित्रकारयात लःल्हागु खः। अथेहे क्रोधकला शिरोमणि सिरपा वरिष्ठ कलाकार हरिप्रसाद वैद्य, मुल्मी ग्राफिक डिजाइन अवार्ड अशोकमान सिं व  अमात्य कला सिरपाः कलाकार रत्नकाजी शाक्ययात, हेम–गंगा युवा कला प्रतिभा सिरपाः, हेम–गंगा नारी कला प्रतिभा सिरपाः, क्यान सिग्देल आर्ट सिरपाः व निर्वाण कला सम्मान नापं चराचुरुंगीपाखे सुदीप बस्याल, सम्झना राजभण्डारी, मानकाजी श्रेष्ठ, मुकुन्द प्रयासयात लःल्हागु खः।

चित्रकार अजय देशारयात क्यान आइडियल कला सिरपा व नारायणदेवी स्मृति सिरपा पत्रकार श्याम स्मृतयात लःल्हागु खः। अथेतु, क्यान सिग्देल आर्ट सिरपाः बालकृष्ण स्मृति कला, कलाकार लिलाधर केसी, राजेश मानन्धर कार्टुन अवार्ड, पानसिङ तोमार, ठाकुरप्रसाद–इन्दिरा मैनाली मूर्तिकला सिरपा कलाकार चन्द्रमणि मगर, ऋचा मैनाली रिजाल स्मृति सिरपा कलाकार अनमारी तामाङ नाप मनबहादुर जितीमाया पुन साइन आर्ट सिरपा भुवन गुरुङयात लःल्हागु खः। 

अपालिकाया पूर्व कार्यपालिका सदस्य नाप आः यल महानगरपालिका–११ वडाया मिसा सदस्य आपुलु शाक्य आकाझाकां मन्त।

ताः ईनिसे क्यान्सर ल्वचं पीडित जुयाच्वम्ह शाक्य थौ चान्ह्यः आकाझाकां मदुगु खः। वकयःया दाहसंस्कार थौ हे शंखमुलय् याइगु जुगु दु।

आदिवासी जनजाति उत्थान राष्ट्रिय प्रतिष्ठानं लोकसेवा परीक्षा तयारीया निंतिं शाखा अधिकृत व नायब सुब्बा तातुना सितिकं अनलाइन कक्षा सञ्चालनय् हःगु दु।

थौं उलेज्या जूगु ज्याझ्वलय् प्रतिष्ठानया सदस्य–सचिव ज्ञानेन्द्र पुनं प्रतिष्ठानं आःयात न्हय्गूलिं प्रदेशय् अभिमुखीकरण तालिम सञ्चालन यानाच्वनागु धयादिल। वय्कलं आदिवासी जनजाति समुदायया युवायात लोक सेवा परीक्षाय् प्रतिस्पर्धी दयेकेगु तातुना थुगु कथंया ज्याझ्वः सञ्चालन यानागु धयादिल।

प्रतिष्ठानया न्वकू केशव गुरुङं प्रतिष्ठानं आदिवासी जनजातिया हकहित संरक्षण व सशक्तीकरणय् मदिक्कं ज्या यानाः वयाच्वनागु धयादिल। “जिमिसं कयागु आज्जुयात खःगु कथं छ्यलेफसा देय्या निंतिं सुयोग्य व सक्षम राष्ट्रसेवक कर्मचारी उत्पादन याये फइ”, वय्कलं धयादिल।

लोकसेवा आयोगया पूर्वअध्यक्ष उमेश मैनालीं लोक सेवा आयोग नेपाःया न्हापांगु लोकतान्त्रिक संस्था जूगु धयादिसें आयोगय् छुं नं कथंया धाँधली मजुइगु ध्वाथुइकादिल।वय्कलं लोक सेवापाखें तलब नयाः राष्ट्रया सेवा याये खनेगु गौरवया विषय जूगु धयादिल। प्रतिष्ठानया कथं कक्षा ज्याझ्वः अन्तर्गत शाखा अधिकृतया निंतिं १६० दिं व नायब सुब्बाया निंतिं ११५ दिंया तयारी कक्षा सञ्चालन याइगु दु।

प्रतिष्ठानं नेटवर्क एजुकेसन एकेडेमीलिसेया मंकाः ज्याय् कक्षा सञ्चालन यायेत्यंगु खः। थ्व ज्याझ्वःपाखें देय् न्यंकंया निद्वः सिबें अप्वो विद्यार्थी लाभान्वित जुइगु अपेक्षा याःगु दु।

राष्ट्रिय समाचार समिति (राससं) प्रतिनिधिसभाया न्ह्यने थ्यंकः वःगु निर्वाचनयात तातुना थः पत्रकार, कर्मचारी लिसें थनं उत्पादन जुइगु सामग्रीया स्वनियमन यायेगु आज्जुं निर्वाचन आचारसंहिता (परिमार्जन, २०८२) जारी याःगु दु।

समितिया बुधबाः च्वंगु सञ्चालक समितिया बैठकं आः वइगु माघ १ गतेनिसें लागू जुइगु यानाः उगु आचारसंहिता कार्यान्वयनय् हयेगु निर्णय याःगु खः। राससं तयार याःगु २३ बुँदाया आचारसंहिताय् ऐन, नियम, विनियमया कार्यान्वयन, सामाजिक सद्भावया अभिवृद्धि, सकलें राजनीतिक दलप्रति समान व्यवहार लिसें महत्त्व थें जाःगु विषय दुथ्याःगु दु।अथे हे, लिपांगु ई सुचं प्रविधिया दुरुपयोगयात निरुत्साहित यायेगु तातुना एआई, इलस्ट्रेसन लिसें प्रतीक चिं छ्यलाबुलाय् छ्यलेगु विषय नापं संहिताय् दुथ्याःगु दु।

प्रतिनिधिसभया निर्वाचन आः वइगु फागुन २१ गते जुइत्यंगु दु।राससं निर्वाचन केन्द्रित यानाः थःगु सञ्चारगृहय् आचारसंहिता कार्यान्वयन यायेगु व उकिं आः वइगु निर्वाचनयात स्वच्छ, सन्तुलित लिसें निष्पक्ष सञ्चार सामग्री उत्पादनय् ग्वाहालि जुइगु कार्यकारी अध्यक्ष धर्मेन्द्र झाया विश्वास दु। सुथां लाक्क निर्वाचन सम्पन्न यायेगु राज्यया महत्त्वपूर्ण जिम्मेवारी जूगुलिं सकलें निकाय स्वनियमनय् च्वनाः थुगु ज्याय् ग्वाहालि यायेमाःगुलिइ वय्कलं बः बियादीगु दु।

सञ्चार नापं सूचना प्रविधिमन्त्री जगदीश खरेलं जिम्मेवार व जवाफदेही पत्रकारिता यायेत सञ्चारकःमितय्त इनाप यानादीगु दु।

नेपाल पत्रकार महासङ्घ ख्वप जिल्ला शाखाया २९ क्वःगु स्थापना दिवसया झ्वलय् थौं थन ग्वसाः ग्वःगु ज्याझ्वःया उलेज्या यानादिसें सञ्चारमन्त्री खरेलं सत्यतथ्य स्वयां पिने वनाः गैरजिम्मेवार ढङ्गं थःथत्थें बुखँ संप्रेषण जुया वःगुलिं चिन्ता प्वंकादिल। वइगु फागुन २१ गते जुइगु निर्वाचनय् उम्मेदवारी बिइगु वा मबिइगु बारे थःम्हं छुं नं निर्णय मयानागु अवस्थाय् सम्प्रेषित बुखँया विषय आश्चर्य जुयादिसें वय्कलं विश्वसनीयता कायम यायेगुपाखे आमसञ्चारमाध्यम तय्गु ध्यान वनेमाःगु आवश्यक जू धयादिल।

सञ्चारमन्त्री निर्वाचनय् दनेत्यंगु धइगु सन्दर्भय् ध्वाथुइकादिसें वय्कलं धयादिल, “चुनावय् दनिगु धइगु खँत नं वल, फलानो पार्टीं दनेगु कि, थ्व पार्टीं दनी हँ, थ्व थासं दनी हँ, उगु थासं दनी हँ धइगु नं खँ वल, तर जित थ्व खँ ध्वाथुइके मास्तिवः कि जिं आःतक चुनावय् दनेगु वा मदनेगु धइगु छुं नं निर्णय यानागु मदु। थौं तक छुं नं पार्टीइ दुहाँवनागु मदु, पार्टीइ वनागु मदु, वार्ता व सहलह यानागु मदु, वये धयागु मदु, वने धयागु मदु, जिं छुं नं धयागु मदुनि।” प्रधानमन्त्री सुशीला कार्की नेतृत्वया सरकारया प्रवक्ताया तकं हैसियतं आमजनतातय् न्ह्यथनेबहःगु सहभागिताय् सफल जुइक चुनाव पूवंकेत चा न्हि मधाःसे जुयाच्वनागु अवस्थाय् थःम्हं निर्णय मयानागु विषय थथे बुखँ सम्प्रेषण जूगुलिं दुःख ताःगु वय्कलं धयादिल।

सञ्चारमन्त्री खरेलं सत्यतथ्यलिसें विश्वसनीय, सन्तुलन व निष्पक्षरुपं बुखँ सम्प्रेषण यायेत आमसञ्चारकःमितय्त इनाप यानादिल।मन्त्री खरेलं चुनाव लिक्क वयाच्वंगु अवस्थाय् मतदाता शिक्षायात प्रभावकारी दयेकेगु, निष्पक्ष, धाँधलीमुक्त व स्वतन्त्र ढङ्गं निर्वाचन पूवंकेगु, पाय्छिम्ह उम्मेदवार छनोट यानाः बदर मजुइ कथं मतदान यायेगु थेंजाःगु विषययात प्राथमिकता बियाः बुखँ सम्प्रेषण यायेत आमसञ्चारकःमितय्गु ध्यानाकर्षण यानादिल।वय्कलं धयादिल, “देय् छाय् विकास मजुल, सुनां यानाः विकास जुइमफुत, गुलि व्यवस्थाया ह्यूपाः वल, पञ्चायत वल, प्रजातन्त्र वल, लोकतन्त्र वल, गणतन्त्र वल, फुक्क व्यवस्था ह्यूपाः जुल, द्वलंद्वः मनूत शासन व्यवस्थाय् वल, सरकार न्ह्याकल, प्रधानमन्त्री–मन्त्री जुल, तर देय् छाय् विकास मजुल, जनताया अवस्था छाय् भिंके मफुत, छाय् जेनजी जनआन्दोलन जुल, दर्जनौं बलदानी बिइमाल धइगु बारे जिम्मेवार बुखँ माध्यमं बुखँ हयेमाः, तर अथे जुइफयाच्वंगु मदु।”वय्कलं धयादिल।

बागमती प्रदेशया संस्कृति नापं पर्यटनमन्त्री सुरेश श्रेष्ठं सत्यतथ्ययात उपेक्षा यानाः लोकप्रिय पत्रकारितां यानाः लिपांगु इलय् समस्या सिर्जना जूगु न्ह्यथनादिसें जिम्मेवार, जवाफदेही पत्रकारिता यायेत इनाप यानादिल।ज्याझ्वलय् ख्वपया प्रमुख जिल्ला अधिकारी उमेशकुमार ढकाल, नेपाल पत्रकार महासङ्घया केन्द्रीय न्वकू उम्मिद वागचन, मध्यपुरथिमि नगरपालिकाया प्रमुख सुरेन्द्र श्रेष्ठ, नेपाल पत्रकार महासङ्घ उपत्यका प्रदेश नायः टेनिश रेक्का, महासङ्घया येँया नायः शोभा अर्याल, यल नायः रामहरि कार्की, वरिष्ठ पत्रकार कबिर राणा, महासङ्घ ख्वप शाखाया नायः सुन्दर शिल्पकार व पूर्वनायः नारायणसुन्दर किलम्बु, सम्मानित पत्रकार पेशल आचार्यलिसेंया वक्तापिंसं पत्रकार हकहितया बारे धारणा प्वंकादिसें जिम्मेवार व जवाफदेही पत्रकारिताय् बः बियादिल।

उगु झ्वलय् पत्रकार पेशल आचार्ययात स्व भगवानदास–राजकुमार महर्जन स्मृति पत्रकारिता पुरस्कार, लीला श्रेष्ठयात क्रियासिल मिसा पत्रकारिता पुरस्कार व विनोद कोजुयात स्व मैयादेवी शिल्पकार स्मृति पत्रकारिता पुरस्कार लःल्हाःगु खः।