बुढानीलकण्ठ नगरपालिका–७ गोल्फुटार चोकय् थौं जूगु मोटरसाइकल दुर्घटनाय् लानाः घाःपाः जूम्ह चालक सीत।

रामेछापया खाँडादेवी गाउँपालिका–३ या २५ दँया अवी श्रेष्ठ सीगु धकाः काठमाडौँ उपत्यका ट्राफिक प्रहरी ज्याकुथिया प्रवक्ता लिसें प्रहरी उपरीक्षक नरेशराज सुवेदीं जानकारी बिउगु दु।

वय्कलं धयादिल, “थौं सुथय् गल्फुटार चोकय् सतक ब्वय् चक्रपथं हातिगौँडा चोकपाखे वयाच्वंगु बागमती प्रदेश ०२–०५२ प ५४०२ ल्याःया मोटरसाइल अनियन्त्रित जुयाः सतकया सिथय् च्वंगु विद्युतया थामय् न्याः वनाः चालक घाःपाः जूगु खः, निजयात त्रिवि शिक्षण अस्पताल छ्वःगु व उपचारया झ्वलय् सीगु खः।” उगु दुर्घटनाया विषय प्रहरीं थप माःगु अनुसन्धान यानाच्वंगु दु।

पूर्वराष्ट्रपतित डा.रामवरण यादवं विद्यादेवी भण्डारीयात नापलानादीगु दु।

नेपाली कांग्रेसया केन्द्रीय दुजः किरण यादवया निवास लाजिम्पाटय् थौं नापलायेगु झ्वलय् थौंकन्हय्या राजनीतिक अवस्थाया विषय सहलह जूगु पूर्वराष्ट्रपति भण्डारीया सचिवालयं धाःगु खः।

वय्कःपिं दथुइ आःया सरकारया ज्याखँ, वइगु फागुन २१ गते जुइगु निर्वाचन व थौंकन्हय्या राजनीतिक निकासलिसें समसामयिक विषय सहलह जूगु धका धाःगु खः।

नेपाल मेडिकल काउन्सिलया उपाध्यक्षय् डा.कुन्जाङ शेर्पा विजयी जूगु दु। मुटुरोग विशेषज्ञ डा.शेर्पा वीर अस्पतालय् ज्या याइम्ह खः।

शेर्पा थ्व स्वया न्ह्यः काउन्सिलया दुजः खः।छु ई न्ह्यः जक क्वचाःगु मतगणनाय् डा.शेर्पां ५२३४ मत हया त्याःगु खः। वयकःया प्रतिस्पर्धी डा.गुरुशरण शाहं ४३५० मत हःगु खः। अथेहे मेम्ह उपाध्यक्षया उम्मेदवार डा.अजयसिंह थापां १८४४ मत काःगु खः।

दुजलय् दकलय् अप्पो मत डा. छविलाल पन्थीं ४८५७ मत हःगु खः। डा. सारिका गोइतं ४४७९, डा. दिपेन्द्र पाण्डें ४०१५, डा.योविन कुमार यादवं ३६४८ मत, डा.अस्मिता पोखरेलं ३४०४, डा.सम्राट पराजुलीं ३२८२, निना राईं ३१११ व डा.रबिन बस्नेतं ३०७२ मत हया मेडिकल काउन्सिलया सदस्यय् निर्वाचित जुगु दु।

निर्वाचनय् स्वनिगलय् व स्वनिगःपिनें याना ११ हजार ९२२ मत कुहावःगु खः। उकि मध्ये स्वनिगलं ५ हजार ७६ मत व स्वनिगःपिनें ६ हजार ८४६ मत कुहावःगु खः।काउन्सिलय् छम्ह उपाध्यक्ष व च्याम्ह दुजः दइगु ब्यवस्था दु।

स्वनिगलय् पुस ४ व ५, स्वनिगःपिने ११ व १२ गते निर्वाचन जूगु खः।निर्वाचित उपाध्यक्ष व सदस्य तयेगु पदावधि प्यदँ दइगु व्यवस्था दु।

पूर्वपश्चिम राजमार्गअन्तर्गत रौतहटया चन्द्रनिगाहपुर–निजगढ सतकखण्डय् ग्यास बुलेट दुर्घटना जुया उगु थासय् वारी साधन सन्चालनय् पंगः वःगु दु।

मंगलवाः सुथय् ७ बजे जुया ५० मिनेटय् पूर्वपाखे वःगु युपी १७ ए २१४ नम्बरया एलपी ग्यास बुलेट दुर्घटना जुगु खः। बुलेट सतकय् तःपि लानाच्वंगु दु।

दुर्घटनाय् चालक सामान्य घाःपाः जुगु दु। तर ग्यास लिक जुयाच्वंगुलि सम्भावित जोखिम जुइ फुगुलि अन सवारी आवागमन रोके यानातःगु दु धका जिल्ला प्रहरी कार्यालय रौतहटं धाःगु दु।

प्रहरीं उगु थासय् वनिइगु सवारी चालक तय्त वैकल्पिक लँ ल्ययेत इनाप याःगु दु।

लुँ तोलां थौ ७ हजार ९ सय तका कुहावःगु दु। लुँ तोलां थौ ७ हजार ९ सय तका कुहावया तोलां २ लाख ६२ हजार १ सय तका न कारोबार जुयाच्वंगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न ३ सय ५ तका कुहावःगु दु। वहः तोलां ४ हजार ५ सय ९० तका न कारोबार जुयाच्वंगु दु धका महासङ्घं धाःगु दु।