नेकपा एमालेया उपाध्यक्ष रामबहादुर थापा ‘बादल’ या नां समानुपातिकपाखे आदिवासी जनजाति क्लस्टरय् १ नम्बरय् तःगु दु।एमालें निर्वाचन आयोगय् लःल्हागु धलखय् थापाया नां १ नम्बर् तःगु दु।

अथेहे क्लस्टरपाखे भूमिका लिम्बू सुब्बा, गंगादेवी श्रेष्ठ, अनिता कन्दङ्गवा, उषाकला राई, तारादेवी गुरुङ, लक्की शेर्पा, मौसम राई, नरदेवी पुन, भक्तकुमारी लामा, मीना बराम, यमुना घले, मनकुमारी तितुङ्ग, कान्ता राई, शर्मिला गुरुङ, सुमीत्रा राजवंशी, हिरुसरा राना, कुलभक्त शाक्य, वृद्धभक्त चित्रकार, इन्द्रबहादुर तामाङ, सोनामङ छिरिङ लामाया नां न्ह्यने तःगु दु।

राष्ट्रिय समाचार समितिया नायब महाप्रबन्धक राजु शाक्य ५८ दँया उमेरहदं यानाः रासस सेवापाखें निवृत्त जुयादीगु दु।

वि.सं. २०४८ मङ्सिर ५ गते अधिकृतस्तर खुगूगु तहया समाचारदाता पदपाखें सेवाय् दुहाँझाःम्ह नायव महाप्रबन्धक शाक्य थ्व हे पुस ९ गतेनिसें सेवा निवृत्त जुयादिल।थ्यंमथ्यं ३४ दँया सेवाज्वःछि वय्कलं राससया अन्तरराष्ट्रिय समाचार सम्पादन, समाचार सङ्कलन, नेपाली समाचार सम्पादन व सूचना प्रविधि शाखाया नेतृत्व कःघानादिल।

ताःईतक राससया सम्पादकीय नेतृत्व कःघानादीम्ह शाक्यं छुं भतिचा ई अङ्ग्रेजी समाचार सम्पादन शाखाय् नं ज्या यानादिल। अवकाश जुयादीम्ह नायब महाप्रबन्धक शाक्ययात थौं रासस केन्द्रीय ज्याकुथिइ औपचारिक रुपं बिदाइ ब्यूगु खः। उगु झ्वलय् नायव महाप्रबन्धक शाक्ययात रासस व्यवस्थापन, रासससम्बद्ध कर्मचारी सङ्घ, सङ्गठन व युनियन लिसें नेपाल पत्रकार महासङ्घ रासस प्रतिष्ठानपाखें प्रशंसापत्र व मतिनाया चिं लःल्हाःगु खः।बिदाइ ज्याझ्वलय् राससया कार्यकारी अध्यक्ष धर्मेन्द्र झां राससप्रति शाक्यया प्रतिबद्धता व समर्पण नालाकायेबहः जूगु धयादिल।

“नायब महाप्रबन्धक शाक्यं राससया हितयात फुक्कं तायेकाः ज्या यानादिल, राष्ट्रिय सङ्कटया हाथ्यां जाःगु इलय् दक्ष सम्पादकीय नेतृत्व यानादिल,” वय्कलं धयादिल, “सुचं प्रविधिया विकास व रासस संग्रहालय स्थापनाय् शाक्यया विशिष्ट योगदानयात राससं न्ह्याबलें लुमंकाच्वनी।” राससया महाप्रबन्धक सन्दीप राईं संस्थां लःल्हाःगु भाला इमानदारिता व निष्ठापूर्वक सम्पादन यानादीम्ह नायब महाप्रबन्धक शाक्ययाके बुखँ सेवाय् परम्परागत, आधुनिक व न्हून्हूगु प्रविधियात छ्यलेगु सम्बन्धी ज्ञानया भण्डार दूगु धयादिल । शाक्यया योगदानयात फुक्क राससकःमिपिंसं नालाकायेमाःगु वय्कःया धापू खः।

नायब महाप्रबन्धक शाक्यं स्वगू दशक ताःहाकःगु थःगु सेवाकालय् जूगु संस्थागत विकास, वःगु हाथ्या, अनुभव व अनुभूति कनादिल । नेपाली पत्रकारिताया इतिहासय् राससया बिस्कंगु व विशिष्ट म्हसीका दूगु धयादिसें वय्कलं थःगु ओझयात कायम यायेत स्रोतसाधन व सुचं प्रविधिया विकासय् ध्यान बिइत सुझाः बियादिल।राससया कार्यकारी व्यवस्थापक शीतलप्रसाद महतों संस्थाया श्रीवृद्धिइ शाक्यया विशिष्ट योगदान दूगु कनादिसें संस्थागत हितया निंतिं वय्कःया समर्पणयात राससकःमिपिंसं नालाकायेमाःगु धारणा प्वंंकादिल।

सञ्चारमन्त्री जगदीश खरेल सञ्चार लिसे सुचना प्रविधिमन्त्री जगदीश खरेलं यक्को राजनीतिक प्रभावया कारणं नेपाल पत्रकार महासंघया इतिहास हुइगु ज्या जुगु दु धका धयादीगु खः। सत्य व तथ्य सुचं सम्प्रेशन याइपि पत्रकार तयेगु हे इतिहास हुइगु ज्या गलत खः धका धयादीगु खः। नेवाः पत्रकार राष्ट्रिय दबू न यलय् जुगु छगु ज्याझ्वलय नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया विषय अथे धयादीगु खः।

मन्त्री खरेलं सत्य व तथ्य दस्ताबेज प्रस्तुत यायेत इनाप यानादीगु खः। वास्तविक तथ्य उपलब्ध जुल धाःसा सत्यनारायण बहादुर श्रेष्ठयात नेपाल पत्रकार महासंघया संस्थापक अध्यक्ष स्थापित यायेत थम्हेसिया माःगु कुतः याये धका मन्त्री खरेलं धयादीगु खः।

अथेहे, सत्यनारायण बहादुर श्रेष्ठया म्ह्याय् सुजिता मानन्धरं थः अबुं पत्रकारिता व शिक्षा क्षेत्रय् यानादीगु योगदानया विषय खँ ल्हानादीगु खः। तत्कालीन दरबारनाप सम्बन्धया कारणं निर्वासित जीवन हनेत भारतया कलकता वनेमाःगु खः धका धयादीसे श्रेष्ठ बहुुदलीय प्रजातन्त्र लिपा नेपाः लिहावया हाकन शिक्षा ख्यलय् ज्या यानादीगु खः धका धयादीगु खः।

नेपाल पत्रकार महासंघया संस्थापक अध्यक्ष सत्यनारायण बहादुर श्रेष्ठया ११० क्वःगु बुन्हिया लसताय् पत्रकार प्रकृति अधिकारीयात सत्यनारायण बहादुर श्रेष्ठ प्रेस स्वतन्त्रता सेनानी सिरपा ११४६ व रामकृष्ण कर्माचार्ययात सत्यनारायण बहादुर श्रेष्ठ प्रेस स्वतन्त्रता सेनानीपाखे हंगु खः।गोरखापत्र राष्ट्रिय न्हिपौया सहसम्पादक अधिकारीयात नगद राशी २५ हजार तका न लःल्हागु खः। सम्मानित जुयादीपिन्त संचारमन्त्री खरेलं हनापौ लःल्हानादीगु खःसा यल महानगरपालिका वडा न ५ या वडा अध्यक्ष बिकासमान श्रेष्ठं दोसल्ला न्यकादीगु खः।

अथेहे दबूया नायः नृपेन्द्रलाल श्रेष्ठं स्वाम्हा क्वखाय्कादीगु खःसा सत्यनारायण बहादुर श्रेष्ठया म्ह्याय् सुजिता मानन्धरं ध्यवा लःल्हादीगु खः। उगु ज्याझ्वलय् सत्यनारायण बहादुर श्रेष्ठया ज्याभ्वलय् मदिक्क ग्वहालि यागुलि यल महानगरपालिका वडा न ५ या अध्यक्ष बिकासमान श्रेष्ठयात हंगु खः।

दबूपाखे प्रकाशन याःगु आज्जु ल्याः ५ या मंकाः कथं बिमोचन याःगु खः।

नेवाः देय् दबू महालक्ष्मी नगर समितिपाखें महालक्ष्मी नगरपालिकायन मेयर हरिगोविन्द श्रेष्ठयात ध्यानाकर्षण पौ लःल्हात। शुक्रवाः नगरपालिकाया ज्याकुथिइ हे मेयर श्रेष्ठलिसे सहलह लिपा ध्यानाकर्षण पौ लःल्हाःगु खः।

स्थानीय भाषा नेपालभाषायात कामकाजि भाषा कथं लागू यायेमाःगु, नेपाल संवतयात लागू यायेमाःगु नापं स्थानीय पाठ्यक्रम स्थानीय भाषा नेपाफभाषां ब्वंकेमाःगु मागयाना पौ लःल्हाःगु खः। मेयर श्रेष्ठं माघ महिनाय् जुइगु नगरसभाय् प्रस्ताव यंकेगु बचं बियादिल।

नेवाः देय् दबू महालक्ष्मी नगर समितिया नायः कृष्ण महर्जन नापं पदाधिकारी, यल जिल्लाया बरिष्ठ न्वकू बिजय महर्जन नापं पदाधिकारी अले नेवाः देय् दबू स्वनिगः विशेष प्रदेशया नायः नवीन थेच्वमि व निवर्तमान नायः श्रीकृष्ण महर्जन नं उगु सहलह ज्याझ्वलय् दुगु खः।

नेवाः पत्रकार राष्ट्रिय दबुलिं नेपाल पत्रकार महासंघया संस्थापक नायः सत्यनारायण बहादुर श्रेष्ठया ११० क्वःगु बुन्हिया लसताय् निम्ह बरिष्ठ पत्रकारयात सम्मान यायेत्यंगु दु।

ताः ई निसें पत्रकारिता ख्यलय् योगदान यानाच्वंम्ह बरिष्ठ पत्रकार रामकृष्ण कर्माचार्ययात “सत्यनारायण बहादुर श्रेष्ठ प्रेस स्वतन्त्रता सेनानी सम्मान” व गोरखापत्र दैनिकका उपसम्पादक प्रकृति अधिकारीयात “सत्यनारायण बहादुर श्रेष्ठ प्रेस स्वतन्त्रता सेनानी सिरपा” लःल्हायेत्यंगु खः। निम्हं पत्रकारयात दबुलिं थ्वहे वइगु पुस १२ गते सनिवाः यलया मानभवनस्थित आदर्श विद्या मन्दिरय् जुइगु बुन्हि हना ज्याझ्वलय् हनीगु पत्रकार राष्ट्रिय दबूया नायः नृपेन्द्रलाल श्रेष्ठं कनादिल।

वय्कलं पत्रकारिता पाखें समतामूलक समाज निर्माण व सकारात्मक ह्यूपाःया नितिं म्हितूगु भूमिकाया मूल्यांकन यासें हनेत्यनागु कनादिल। नेपाल पत्रकार महासंघया संस्थापक नायः कथं श्रेष्ठंयात न्हयब्वयेगु नितिं पत्रकार राष्ट्रिय दबुलिं छगू दशक निसें निरन्तर अभियान न्हयाकावयाच्वंगु ज्याझ्वःया कजि राजु नापितं कनादिल। श्रेष्ठया नेतृत्वय् २००८ वैशाख ९ गते नेपाली पत्रकारतय्त दकले न्हापां पेशागत संगठनया रुपय् नेपाल पत्रकार संघ निस्वनादीगु खः।

फुक्क पत्रकारतय्त संगठित यायेगु तातुनां निस्वंगु संघया दच्छि लिपा २००९ वैशाख २८ गते श्रेष्ठया नेतृत्वय् न्हूधाः जूगु इतिहास दु । नेपाल टुडेया सम्पादक तकं जुयादीम्ह श्रेष्ठया नेतृत्वय् गठन जूगु पत्रकार संघ कालान्तरय् नेपाल पत्रकार महासंघ जुल। तर थ्व तथ्ययात तोडमोड याना २०१२ चैत १६ गते पुनर्गठन जूगु महासंघय् नेपाल पुकारया सम्पादक नापं सन्त नेता कृष्णप्रसाद भट्टराई उपाध्यायया नां नायः कथं न्हयवयेगु ज्या जुल।

बुन्हि हनेगु झ्वलय् पत्रकार राष्ट्रिय दबुलिं उगु हे दिं स्वक्वःगु सत्यनारायण बहादुर श्रेष्ठ मिडिया कप फुटसल प्रतियोगिता ११४६ यायेत्यंगु दु। संस्थापक नायःयात न्ययोचित ढंगं राज्यं अपनत्व कायेकेगु दबूया अभियानलाई प्रवद्र्धन यायेत तिवः जुइ कथं वंगु स्वदँ निसें फुटसल प्रतियोगिता यानावयाच्वंगु फुटसल कासाया कजि प्रजित शाक्यं कनादिल। पत्रकार, कलाकार व पेशागत संघसस्थाय् आवद्ध कासामिपिन्त दुथ्याका फुटसल कासा याना वयाच्वंगु दु।