राजावादी समूहया प्रदर्शनकारी तय्स हिमालय टेलिभिजनया गाडी तोडफोड याना ब्यूगु दु। समाचार संकलन यायेगु निति सिनामंगलय् खटे जूगु बा १९ च ८९६३ नम्बरया गाडीइ प्रदर्शनकारी तय्से आक्रमण याःगु खः।

आक्रमण याना गाडीया न्ह्यने व लिउने च्वंगु न्ह्याय्कं तछ्याना ब्यूगु दु।उगु गाडी दुने रिपोर्टर समिर जोशी, क्यामरापर्सन मिलन प्रजापति व चालक रामराजा सापकोटा च्वना वना च्वंगु अप्पां कय्का न्ह्याय्कं तछ्याना ब्यूगु खः।उगु आक्रमणणय् सामान्य घाःपाः जूगु दु।

अथेहे थौ प्रदर्शनकारी तय्सं कान्तिपुर टेलिभिजन व अन्नपूर्ण पोष्टया ज्याकूथि न आक्रमण याःगु खः।

तीनकुनेया छगू छेँय् मि च्यानाः छम्ह पत्रकार सीगु दु। उगु भवनय् च्वनाः टेलिभिजनया निंतिं छगू दृश्य सुटिङ यायेगु झ्वलय् सुरेश रजकया सीगु खः।

तीनकुनेय् जुजुवादीतय्सं याःगु प्रदर्शनया झ्वलय् प्रहरीलिसे ल्वापु जुइ धुंकाः छगू भवनय् मिँ तःगु खः। उगु घटना लिपा रजक सम्पर्कय् मवःम्ह जुगु खः।

राजावादी प्रदर्शनकारी तय्सं कोटेश्वर भाटभटेनी सुपर स्टोरय् तोडफोड याना मोबाइल फोन, घडी, अय्ला नाप थिकेगु सामान लुटे याःगु दु।

भाटभटेनी व्यवस्थापनया कथं प्रदर्शनकारी तयस छगु पुचः वया मू लुखा तछ्याना ब्यूगु खः। वया लिपा कम्पाउन्ड दुने दुहावया तोडफोड सुरु याःगु खः। अथेहे, प्रदर्शनकारी तय्स फलफूल, तरकारी तक लुटे याःगु दु। तोडफोड व लुटपाटपाखे गुलि क्षति जुगु धका सिइ मदुनि।

प्रधानमन्त्री केपी शर्मा ओलीं मन्त्रिपरिषदया आकस्मिक बैठक सःतूगु दु। बैठक प्रधानमन्त्रीयो सरकारीनिवास बालुवाटारय् च्वनेत्यःगु दु।

राजावादी तयेस याःगु प्रदर्शन हिंसात्मक जूया वनेवं प्रधानमन्त्रीं मन्त्रिपरिषदया बैठक सःतूगु खः। तीनकुनेयात केन्द्र दयका प्रदर्शन व सभा यायेगु तयारी यानाच्वपि राजावादी तयस प्रहरीनापा ल्वापू यायेवं हिंसा अप्पोया वःगु खः।

कोटेश्वरया भाटभटेनी सुपरस्टोरय् पार्किङय् तयातःगु गाडीइ तोडफोड याःगु दु। पार्किङ याना तःगु थासय् निजी व सरकारी गाडीय् न्ह्याय्कं तछ्याना ब्यूगु खः।

तीनकुनेय् राजावादी समूहया प्रदर्शन याना च्वपिन्त तितरवितर यायेवं उमिसं कोटेश्वरया भाटभटेनी सुपरस्टोर तक वःगु खः। अन मिइगु निति तयातःगु तरकारी, सपिङ ट्रली लगायतया सामान पिने हया मिँ च्याकाबिइगु नापं भाटभटेनी सुपरस्टोरया भवनय् न्ह्याय्कं तक तछ्याना ब्यूगु खः।