राष्ट्रपति रामचन्द्र पौडेललिसे राष्ट्रपति भवनय् प्रधानमन्त्री सुशीला कार्की, नेपाली कांग्रेसया सभापति शेरबहादुर देउवा, नेपाल कम्युनिष्ट पार्टी (एमाले) या नायः केपी शर्मा ओली व नेपाली कम्युनिष्ट पार्टीया कजि पुष्पकमल दाहाल ’प्रचण्डं’ मंकाः कथं नापलानादीगु दु।

वय्कःपिं दथुइ वइगु निर्वाचनया लिसें समसामयिक विषय सहलह न्ह्याना च्वंगु राष्ट्रपतिया सचिवालयं धाःगु खः। जेनजी आन्दोलनलिपा वय्कःपिं न्हापांखुसी नापलानादीगु खः।

पोखरा महानगरपालिकां मू सतक सिथय् च्वंगु वर्कसप, ग्यारेजलिसेंया संरचना चिइकेत्यंगु दु। थुकिया निंतिं महानगरं सुचं पिथनाः ३५ न्हुया ई ब्यूगु दु।

महानगर दुने लाःगु राजमार्ग लागा व नगर क्षेत्रया मू सतकय् वर्कसप व कवाडी सङ्कलन केन्द्रतय्त चिइकेत्यंगु खः। पृथ्वी राजमार्गया पोखराय् दुहांवयेगु ध्वाखा कोत्रेनिसें सेतीपुलतक, सिद्धार्थ राजमार्गया छोरेपाटननिसें पृथ्वीचोक तक व पोखरा बाग्लुङ राजमार्गया जिरोकिमीनिसें फेदीतकया सतक जःखःया वर्कसप चिइकेगु निंतिं महानगरं सुचं पिथनाः ३५ न्हुया ई ब्यूगु दु।

अथे हे, नगर क्षेत्रया मू सतकया जःखःया सटर लिसें खाली जग्गाय् सञ्चालन जुयाच्वंगु कवाडी सङ्कलन केन्द्र, वर्कसप, कारवास लिसें ग्रिल उद्योगया हुनिं सवारी आवागमनय् थाकुया च्वंगु, सहरी सौन्दर्यय् लिच्वः लाकूगु महानगरं धयातःगु दु। “थुजाःगु उद्योगपाखें महानगरया वातावरणीय स्वच्छता न्यंका तयेत अःखः लिच्वः लाकूगुलिं थुजाःगु उद्योग मेथाय् व्यवस्थापनया निंतिं सुचं पिथनागु खः”, महानगर प्रमुख धनराज आचार्यं धयादिल। अथे हे, महानगरं क्वःछिनातःगु लागाय् सञ्चालन जुयाच्वंगु हार्डवेयर पसः, डिपो लिसें मेमेगु व्यवसायीयात नापं सतक पेटीइ निर्माण सामग्री व साइनबोर्डलिसेंया वस्तु लिसें सामग्री मतयेत इनाप याःगु दु।

महानगरपालिकाया इनापयात हाचां गायाः क्वःछिनातःगु लागाय् थुजाःगु कथंया व्यवासइ लिसें उद्यम सञ्चालन लिसें सामग्री तयातःसा प्रचलित कानुन कथं कारबाही यायेगु महानगर प्रमुख आचार्यं धयादिल।राजमार्ग व मू सतक लागाय् वर्कसपलिसेंया उद्यम चिइकेगु अभियानय् ग्वाहालि यायेत नापं महानगरं नगरवासीयात अपिल याःगु दु। “महानगरया थ्व निर्णय पालना यायेगु÷याकेगु सन्दर्भय् माःगु ग्वाहालि लिसें सहजीकरण यानादीत सम्बन्धित छेँ थुवाः, व्यवसायी, नागरिक समाज व स्थानीय प्रशासनयात इनाप यानाच्वना”, सुचंनय् धयातःगु दु।

पोखराया मू बजाः लागाय् ट्राफिक जाम जुइगुलिं अव्यवस्थित पार्किङलिसें मू सतकनापं स्वानाः चायेकातःगु ग्यारेज व वर्कसपया तःधंगु ल्हाः दूगु खनेदया च्वंगु दु। गुकिया हुनिं ट्राफिक जामया समस्या जूगु व लँय् दथुइ हे दयेकेगु निंतिं दिके हइगु सवारीसाधनं यानाः सतक चिब्या जुयाः जाम जुइगु यानाच्वंगु धयातःगु दु।

प्रतिनिधिसभा सदस्य निर्वाचन कानुन लिसें व्यवस्थापनसम्बन्धी सहलह क्वचाःगु दु। म्हिगः सिंहदरबारय् जूगु सर्वपक्षीय सहलहय् प्रधानमन्त्री सुशीला कार्कीं सकलें राजनीतिक दलयात निर्वाचनय् ढुक्क जुयाः ब्वति कायेत इनाप यानादिल।

वय्कलं निर्वाचनयात सङ्कट मखु, ह्यू्रपाः व उत्साहया माध्यमया कथं कायेमाःगुलिइ बः बियादिल। ज्याझ्वलय् गृह मन्त्रालय व निर्वाचन आयोगया प्रस्तुति लिपा च्याम्ह नागरिक समाजया न्ह्यलुवा, झिंप्यम्ह थीथी राजनीतिक दलया नेता लिसें निम्ह जेनजी प्रतिनिधिं थःथःगु बिचाः तःगु खः। सहलहय् ब्वति काःपिं अप्वःसिनं निर्वाचन जुइमाःगुलिइ बः ब्यूगु खः।

प्रधानमन्त्री कार्कीं संविधान कथं प्रतिनिधिसभाया निगू अधिवेशनया दथुइ खुलासिबें अप्वःया ई मजुइगु व्यवस्थाया हुनिं निर्वाचनया विकल्प मदूगु धयादिल। वय्कलं निर्वाचन शान्तिपूर्ण कथं ह्यूपाः हयेगु माध्यम जूगुलिं हिंसा व विद्रोहसिबें थ्वहे लँपुपाखें वइगु ह्यूपाः दिगो व लोकतान्त्रिक जुइगु बिचाः तयादिल।

प्रधानमन्त्री कार्कीं भदौ २३ व २४ गते जूगु हिंसात्मक घटनायात कयाः दुःख प्वंकादिसें थुकिं समाज व राष्ट्रयात ह्यूपाः माःगु तायेका ब्यूगु धयादिल। जेनजी व युवा पुस्तां ल्ह्वंगु न्ह्यसःया समाधान यायेगु दायित्व सकसियागु जूगु धयादिसें वय्कलं हिलावंगु ई कथं राजनीतिक दलपाखें अझं अप्वः सकारात्मक भूमिकाया आस यानागु धकाः धयादिल।

प्रधानमन्त्री कार्कीं सरकार ध्याचू फयेत तयार दूगु अथे खःसां उपिं फुक्क देय्या हितया निंतिं जुइमाःगुलिइ बः बियादिल। “सरकारयात जेनजी व दलपिं निगूपिं पाखें कुंखिनाच्वंगु जुयाच्वंगु दु, जिपिं व सह यायेत तयार दु। राजनीतिक दल, नागरिक समाज, पत्रकार व कर्मचारी सकसितं देय्या उन्नति व विकासया निंतिं ग्वाहालि यायेत इनाप यानाच्वनाःगु दु।

अथे जुयाः ल्यंगु ईयात प्रभावकारी कथं छ्यलाः मदिक्कं संवाद व ज्या जुयाच्वंगु दु। थुकी झी सकलें न्ह्याये, क्वःछिनातःगु् इलय् हे निर्वाचन याये”, वय्कलं धयादिल।

जुद्ध बारुण यन्त्र ख्वपं तःजाःगु भवनय् मि नियन्त्रणया निंतिं ड्रोन प्रविधि दुतहयेगु बारे सहलह याःगु दु। म्हिगः चीनया गोञ्जाओ सिभिल एभिएसन कलेजया प्रतिनिधिया पुचःलिसे सहलह जूगु खः।

चिनियाँ पुचलय् ब्वति कयादीपिं टिन जु, हि याङविन, वाई जिनकुन, यान झियानलिसें नं बारुण यन्त्र ज्याकुथिया अवलोकन यायेगु नापनापं ड्रोन प्रविधि दुत हयेगु बारे सहलह जूगु ज्याकुथिया प्रमुख विजयप्रसाद धौभडेलं धयादिल।

उगु झ्वलय् सम्भाव्यता अध्ययन यानाः चिनियाँ ग्वाहालिइ प्रविधि हयेगु बारे सहलह जूगु वय्कलं धयादिल।चिनियाँ पुचलं ज्याकुथिइ च्वंपिं च्याम्ह अग्नि नियन्त्रकयात अग्निनियन्त्रणया न्हूगु प्रविधि, ड्रोन प्रविधि व सीपसम्बन्धी तालिम बिइगु सहमति जूगु खः।

थुकिया निंतिं चिनियाँ पुचलं थन ज्या याइपिं कर्मचारीयात चीनय् यंकाः तालिम बिइगु सहमति जूगु ज्याकुथिया प्रमुख धौभडेलं धयादिल।सहलहय् नेपाल उद्धार लिसें अग्निनिवारण सङ्घया नायः मधुसूदन थापा, ड्रोनहब नेपालया परियोजना व्यवस्थापक सुजित चौधरी, आप्सा नेपालया प्रमुख कार्यकारी अधिकृत सुशील फुयाललिसें ब्वति कयादीगु खः।

नेपाल कम्युनिष्ट पार्टी (एमाले)या नवनिर्वाचित छ्याञ्जे शेरधन राईं वइगु फागुन २१ गते प्रतिनिधिसभाया निर्वाचन जुल धाःसा एमालें ब्वति काइगु धयादीगु दु।

थौं विराटनगर विमानस्थलय् सञ्चारकःमितयलिसे खँल्हाबल्हा यानादिसें वय्कलं सरकारं क्वःछिनातःगु इलय् चुनाव जुल धाःसा एमालें ब्वति काइगु तर आःतक चुनावया वातावरण सरकारं मदयेकूनिगु वय्कलं द्वपं बियादिल। कोशी प्रदेशया न्हापांम्ह मुख्यमन्त्री तकं जुयादीम्ह राईं प्रदेश सरकार याकनं पुनर्गठन जुइगु नं धयादिल।

वय्कलं थ्वस्वयांन्ह्यः हे पुनर्गठनया तयारी जूसां नं महाधिवेशनलिसें यानाः लिबाःगुलिं आः याकनं मन्त्रिपरिषद् हिलाबुला जुइ धकाः जानकारी बियादिल।वय्कलं प्रदेश सरकार पुनर्गठनया निंतिं सत्ता साझेदार दल नेपाली कांग्रेसलिसे छन्हु निन्हुं सहलह जुइ धयादिल।