स्वयम्भूया ऐतिहासिक आनन्दकुटी विहारय् थौं भिक्षुसंघयात सामूहिक संघदान यायेगु ज्या जुगु दु। उदाय् समाजया संयोजकत्वय् न्ह्याःगु उगु संघदान ज्याझ्वलय् थ्यंमथ्यं ३५० म्ह भिक्षु, भिक्षुणीलिसें अनगारिकापिनिगु उपस्थिति  दुगु खः।

वस्पोलपिन्त सामूहिक दान प्रदाननापं भोजन दान यायेगु ज्या जूगु खः। उदाय् समाजपाखें ग्वःसा ग्वःगु थ्व प्यक्वःगु संघदान ज्याझ्वः खः। थुगुसिइ समाजनाप आबद्ध मजूपिं व्यक्ति व संस्थातय्त नं दान प्रदानय् दुथ्याकाःगु धकाः ग्वसाः खलकं धाःगु दु।

संघदान न्ह्यवः आनन्दकुटी विहारया प्रमुख भिक्षु धर्ममूर्ति महास्थविरं बुद्धधर्मय् दानया महिमाबारे कनाबिज्यासें श्रद्धापूर्वक याःगु दानं आशा मयाःसां दातायात आपालं आपाः पुण्य चुलाइ धकाः धयाबिज्यागु खः।

सरकारय् ब्वति कयाच्वंगु राजनीतिक दलया शीर्ष नेतातय्गु थौं प्रधानमन्त्री निवासय् क्वचाःगु मुँज्याय् नकतिनि धइथें पिथंगु अध्यादेश सङ्घीय संसदया निगुलिं सदनं याकनं अनुमोदन यायेगु सहमति जूगु दु। याकनं अध्यादेश पारित याकेत प्रक्रियागत ज्या याकन न्ह्याकेत मुँज्याय् सहमति जूगु गृहमन्त्री रमेश लेखकं धयादिल।

“थौं जिपीं दथुइ जूगु सहमति कथं अध्यादेश न्ह्याःवनी। सकारात्मक कथं थ्व विषय क्वःजी”, मुँज्यालिपा संवाददाता तय्त वय्कलं कनादिल। छगू न्ह्यसःया लिसलय् वय्कलं जनता समाजवादी पार्टी नेपाल(जसपा)या नेतातलिसे नं सहमति जूगु खँ कनादिल । दक्व अध्यादेशत हिलेमाःगुलिं दल दथुइ सहलह जुइ धुंकाः सकसियां भावना कःघानाः प्रक्रिया न्ह्याइगु वय्कःया धापू खः।

मुँज्याय् सरकार व संसदया ज्या प्रभावकारिताया बारे नं सहलह जूगु खः। मुँज्याय् प्रधानमन्त्री नापं नेकपा(एमाले)या अध्यक्ष केपी शर्मा ओली, नेपाली कांग्रेसया सभापति शेरबहादुर देउवा, एमालेया वरिष्ठ उपाध्यक्ष ईश्वर पोखरेल, कांग्रेसया उपसभापति पूर्णबहादुर खड्का, जनता समाजवादी पार्टीया अध्यक्ष अशोककुमार राई, लोकतान्त्रिक समाजवादी पार्टीया अध्यक्ष महन्थ ठाकुर, नागरिक उन्मुक्ति पार्टीया अध्यक्ष रञ्जिता श्रेष्ठ व जनमत पार्टीया उपाध्यक्ष अब्दुुल खानलिसें ब्वति कयादीगु खः।

पोखरा भ्रमण वर्ष, २०२५ उलेज्याया झ्वलय् बेलुन तज्यानाः घाःपाः जुयादीपिं उपप्रधान व अर्थमन्त्री विष्णुप्रसाद पौडेल व पोखरा महानगर प्रमुख धनराज आचार्ययात थप उपचारया निंतिं येँय् छ्वयाहःगु दु।रिमोर्टं दीप प्रज्वलनलिपा बेलुन ब्वयेकेगु झ्वलय् मिँच्याना बेलुनय् लाःगु इलय् बेलुन तज्याःगु खः।

बेलुनया मिं अर्थमन्त्री पौडेल व महानगर प्रमुख आचार्य घाःपाः जूगु खः। अर्थमन्त्री पौडेलयात उपचार यायेत गण्डकी मेडिकल कलेज शिक्षण अस्पताल यंकूगुलिइ थप उपचार यायेत येँया किपुली च्वंगु अस्पतालय् यंकूगु नेपाल कम्युनिष्ट पार्टी (एमाले) कास्कीया नायः बैनबहादुर अधिकारी क्षेत्रीं धयादिगु दु।

मन्त्री पौडेलयात गण्डकी मेडिकल कलेज शिक्षण अस्पतालं पोखरा अन्तर्राष्ट्रिय विमानस्थलय् एम्बुलेन्सं यंकूगु खः। मन्त्री पौडेलया निपाः ल्हाः, ख्वाः व ककुइ लिक्क क्षति जूगु धाःगु दु। महानगर प्रमुख आचार्ययात उपचार यायेत फिस्टेल अस्पताल यंकूगुलिइ थप उपचारया निंतिं येँय् छ्वयाहःगु वय्कःया प्रेस संयोजक भीम थापां धयादिल। महानगर प्रमुख आचार्यया ख्वालय् व न्यतालय् क्षति जूगु दु।

पोखरा भ्रमण वर्ष, २०२५ उलेज्याया झ्वलय् बेलुन तज्यानाः उपप्रधान व अर्थमन्त्री विष्णुप्रसाद पौडेल व पोखरा महानगर प्रमुख धनराज आचार्ययात घाःपाः जूगु दु।

रिमोर्टं दीप प्रज्वलनलिपा बेलुन ब्वयेकेगु झ्वलय् बेलुन मुया तस्सलं बेलुन तज्याःगु खः। बेलुन तज्यायेधुंकाः महानगरप्रमुख आचार्य ककुइ मिँपूं छ्वम्हुया लात धाःसा उपप्रधान व अर्थमन्त्री पौडेलया कोट मिँ नःगु खः।महानगर प्रमुख आचार्ययात उपचार यायेत फिस्टेल हस्पिटल यंकूगु वय्कःया प्रेस संयोजक भीम थापां कनादिल।

उपपप्रधान व अर्थमन्त्री पौडेलयात नं उपचार यायेत गण्डकी मेडिकल कलेज शिक्षण अस्पताल यंकूगु व वय्कःयात सामान्य घाःपाः जक जूगु नेकपा (एमाले) कास्कीया नायः बैनबहादुर अधिकारी क्षेत्रीं कनादिल।

प्रधानमन्त्री केपी शर्मा ओलीयात लगानीसम्बन्धी एसियाया न्ह्यलुवाः संस्था सर्वना जुरोङ ग्रुपया कार्यकारी प्रमुख सिन चाओया पुचलं नेपाःया पूर्वाधार व सहरी विकासया थीथी ख्यलय् लगानी विस्तार यायेगु विषय थौ सहलह याःगु दु।

प्रधानमन्त्री निवास, बालुवाटारय् जुगु उगु ज्याझ्वलय् कार्यकारी प्रमुख सिनं नेपाःया ऊर्जा, पर्यटन, रेल्ले, सुरुङमार्ग, स्मार्ट सिटी, एक्प्रेस–वेया परियोजना पहिचान, प्रस्तावना तयारी व लगानी यायेगु इच्छा याःगु दु। सिङ्गापुर सरकारया स्वामित्वय् दुगु हलियक लगानीसम्बन्धी निकाय तेमासेक अन्तर्गतं उगु कम्पनीं थौकन्ह्यः नेपालय् ज्याकू स्थापना याना ज्या न्ह्याके धुकुगु दु।

नापलायेगु झ्वलय् प्रधानमन्त्री ओलीं ‘समृद्ध नेपाल, सुखी नेपाली’ या राष्ट्रिय आकांक्षा पूरा यायेगु झ्वलय् नेपालं विश्वया प्रतिष्ठित लगानीकतानाप ग्वहालि व सहकार्यया निति माःगु सहजीकरणया वातावरण सृजना यायेगु धका धयादीगु खः।