नेपाली कांग्रेसया सभापति शेरबहादुर देउवा व नेपाल कम्युनिष्ट पार्टी (एमाले)या नायः केपी शर्मा ओली नापलानादीगु दु।

सभापति देउवा निवास महाराजगन्जय् थौं नाप लायेगु झ्वलय् वय्कःपिं दथुइ समसामयिक राजनीतिक बिषय खँल्हाबल्हा जूगु सभापति देउवाया सचिवालयं धाःगु खः।

उगु झ्वलय् नायः ओलीलिसे एमालेया महासचिव शङ्कर पोखरेल नं नापं च्वनादीगु खः।थ्व स्वया न्ह्यः वंगु मङ्सिर १९ गते नं सभापति देउवा व नायः ओली नापलानादीगु खः।

मिराज ढुङ्गाना नेतृत्वया जेनजी पुचःया आह्वानय् माइतीघर मण्डलाय् ग्वसाः ग्वःगु विरोध प्रदर्शनय् ब्वति काःपिं च्याम्ह युवातय्त प्रहरीं थौं नियन्त्रणय् काःगु दु।

जिल्ला प्रशासन ज्याकुथिं अनुमति मकाःसे माइतीघर मण्डला लागाय् छुं नं कथंया सभा, विरोध, धर्ना, ¥याली थेंजाःगु ज्याझ्वः याये मदूगु कानुनी व्यवस्था उल्लङ्घन यानाः प्रदर्शनय् ब्वति काःगु द्वपनय् रविकिरण हमाललिसें युवातय्त प्रहरीं नियन्त्रणय् काःगु खः।

जेन्जी पुचलं थंगु माग, मुद्दा संबोधन मजूगु धासें माइतीघर मण्डला लागाय् नाराबाजीलिसें प्रदर्शनय् कुहाँवःपिं च्याम्हेसित नियन्त्रणय् काःगु जिल्ला प्रहरी परिसर येँया प्रवक्ता नापं प्रहरी उपरीक्षक पवनकुमार भट्टराईं जानकारी बियादिल

सरकारं अनलाइन टेलिभिजनया दर्ता व सूचीकरण याइगु जूगु दु। सञ्चार लिसें सुचं प्रविधिमन्त्री जगदीश खरेलं अनलाइन टेलिभिजन लिसें अनलाइन पत्रकारिताया पेसागत सुरक्षा व संस्थागत विकासया निंतिं दर्ता व सूचीकरणया ज्या याकनं न्ह्याकेगु धयादीगु खः।

अनलाइन टेलिभिजन पत्रकारपिंनाप म्हिगः मन्त्रालय जूगु सहलहय् वय्कलं अनलाइन टेलिभिजन व उकिइ ज्या यानाच्वंपिं पत्रकारपिंत मूलधारया सञ्चार माध्यम ज्वः राज्यं बिइगु सुविधा उपलब्ध याकेत सरकार प्रतिबद्ध दूगु धयादिल। सञ्चारमन्त्री खरेलं अनलाइन टेलिभिजन व उकी ज्या याइपिं सञ्चारकःमिया सही तथ्याङ्क नापं सरकारयाके मदूगुलिं लोककल्याणकारी विज्ञापनलिसें राज्यया पाखें उपलब्ध जुइगु सुविधापाखें तापानाः च्वनेमाःगु अवस्था वःगु धयादिल।

वय्कलं थुजाःगु अवस्था अन्त्यया निंतिं सरकारं अनलाइन टेलिभिजन दर्ता व सूचीकरणया ज्या याकनं न्ह्याकेगु धयादीगु दु। सहलहय् सञ्चार लिसें सुचं प्रविधि मन्त्रालयया सचिव राधिका अर्यालं अनलाइन टेलिभिजनलिसें सञ्चारमाध्यमया सहजताया निंतिं सरकारं माःगु ज्या यानाच्वनागु धयादिल। वय्कलं स्वनिगः सिबें पिनें सञ्चालन जुयाच्वंगु सञ्चारमाध्यमया सेवायात अःपुकेत जिल्लाया हुलाक ज्याकुथिपाखें दर्ता, न्हूधाः थेंजाःगु ज्या याये फइगु यानाः कानुनी सुधारया ज्या मन्त्रालयं न्ह्याकागु नापं धयादिल।

मन्त्रालयया सहसचिव लिसें प्रवक्ता उदयबहादुर रानां डिजिटल मिडिया (युट्युब)या संस्थागत व्यवस्थापन, सहजीकरण लिसें नियमन व भावी दिशाबारे प्रस्तुती बियादीगु खः। ज्याझ्वलय् ब्वति काःपिं अनलाइन टेलिभिजन सञ्चालक, व्यवस्थापक लिसें पत्रकारपिंसं अनलाइत दर्ता लिसें सञ्चालनसम्बन्धी प्रष्ट कानुनी व्यवस्था मदुगुलिं थःपिंसं लोककल्याणकारी विज्ञापनलिसें राज्यया सुविधा कायेमखंगु ध्याचू प्वंकूगु खः।

निर्वाचन आयोगं राष्ट्रिय सभा सदस्यया निर्वाचनया निति मतदान स्थल व मतदान केन्द्र क्वःछिगु दु।

बुधवाः आयोगं न्ह्यय्गू हे प्रदेशया निति मतदान स्थल व केन्द्र क्वछिगु दु धका आयोगया प्रवक्ता नारायणप्रसाद भट्टराई न जानकारी ब्यूगु दु।राष्ट्रिय सभा सदस्यया निर्वाचनय् प्रदेश सभाया सदस्य, स्थानीय तहया प्रमुख नाप उपप्रमुख तय्स मतदाता याइ।

मतदान स्थल थुकथं दु

कोशी प्रदेशः प्रदेश निर्वाचन कार्यालय परिसर, विराटनगर मोरङ

मधेश प्रदेशः महेन्द्र नारायण निधि मिथिला संस्कृति केन्द्र, जनकपुर उपमहानगरपालिका वडा ४ धनुषा

बागमती प्रदेशः भुटनदेवी माध्यमिक विद्यालय, हेटौँडा उपमहानगरपालिका ४ मकवानपुर

गण्डकी प्रदेशः प्रदेश निर्वाचन कार्यालय परिसर, पोखरा कास्की

लुम्बिनी प्रदेशः कर्मचारी मिलन केन्द्र, घोराही, दाङ

कर्णाली प्रदेशः प्रदेश निर्वाचन कार्यालय परिसर, वीरेन्द्रनगर, सुर्खे

सुदूरपश्चिम प्रदेशः प्रदेश निर्वाचन कार्यालय परिसर, धनगढी,कैलाली

नेकपा एमालेया ११ क्वःगु महाधिवेशनय् न्हुगु नेतृत्व ल्ययेगु निति जुगु मतदान क्वचाःगु दु।

येँया भृकुटीमण्डपय्  म्हिगः सुथय् न्ह्यागु मतदान थौ विहीवाः सुथय् पौने ७ बजे क्वचाःगु खः। न्हुगु नेतृत्वया निति २ हजार २ सय ६३ प्रतिनिधि ल्यःगु खः। उकि मध्ये ३६ म्ह अनुपस्थित जुगु दु।

८० गु इलेक्ट्रोनिक मेसिनपाखे मतदान याःगु खः।मतपरिणाम थौ हे सार्वजनिक याइगु जुगु दु। थौ सुथय् ११ बजे भृकुटीमण्डपमय् मत परिणाम सार्वजनिक याइगु व प्रमाणपत्र वितरण याइगु नाप शपथग्रहण याइगु ज्याझ्वः दु।