नेपाःया चित्रकारपि अजय देशार व सितु मास्के देशारं बेलायतय् चित्रकला प्रदर्शनी याःगु दु।

परम्परागत विषय चित्र च्वया च्वनादीम्ह चित्रकार अजय देशारया गुक्वःगु चित्रकला प्रदर्शनी “द लष्ट डिभाइन” नां या चित्रकला प्रदर्शनी बेलायतया फोक्सटन शहरय् जुगु खः। चित्रकार देशारया १२ क्वःगु परम्परागत संस्कृति नाप स्वागु चित्र प्रर्दशनी याःगु खः।

अथेहे आधात्मिक व दैविक विषय चित्र च्वयादीम्ह चित्रकार सितु मास्के देशारया न्हापागु याकचाःया चित्रकला प्रदर्शनी “स्प्रिच्युअल पाथ” या नामं प्रदर्शनी याःगु खः। झीगु चित्र दुथ्याःगुलि जीवनयात अध्यात्म व आत्मिक विषय नाप स्वागू खः। बेलायतया केन्ट प्रदेशया फोक्सटन नेप्लिज कम्युनिटी सेन्टया प्रदर्शनी कक्षय् जुगु उगु ज्याझ्वलय् फोक्सटनया उपमेयर नाप फोक्सटन हायातया डिस्ट्रिक काउन्सलर ज्याकी मिडिया मूपाहाँसुइ उगु ज्याझ्वः जुगु खः।

ज्याझ्वलय् फोक्सटन जिल्लाया अधिकारी लुसी मेकगर, बेलायती वरिष्ठ चित्रकार क्रिस बोन, फोक्टन नेपाली समाजया पूर्व अध्यक्ष झपिन्द्र थापा, कोषाध्यक्ष विक्रम राई, बिएफबिएस गोर्खा रेडियाया प्रमुख विनोदध्वज खड्का नापं फोक्सटन व फोक्सटन हायात क्षेत्रया पूर्व प्रमुख व पूर्व अधिकारीपिनिगु ब्बति दुगु खः।

भाषा आयोगया लोगो डिजाइन यानादीम्ह निपूर्ण वज्राचार्य मत्यवं मन्त । वय्कः २९ दँय् मदुगु खः।

छुं ई न्ह्यवंनिसें छ्यंगू सम्बन्धी क्यान्सर ल्वचं कयाच्वंम्ह मदुम्ह वज्राचार्यया अन्त्येष्टि मंगलवाः हे येँया लुतिइ जुगु खः।

भाषा आयोगया कायममुकायम सचिव डा. लोकबहादुर लोप्चनं सोमवाः छगू शोक सन्देश जारी यासें आयोगया लोगो दयेकादीम्ह कलाकारया असामयिक निधनप्रति दुःख प्वंकाः छेँजःयात बिचाः हायेकूगु दु।

प्रधानमन्त्री केपी शर्मा ओलीं तिब्बतया सीमालागाय् तसकं वा वःगुलिं रसुवाया ल्हेन्दे खुसिनापनापं भोटेकोशी व त्रिशूली खुसिइ वःगु खुसिबालं प्रभावित जूपिंत उद्धार यायेत सरकार युद्धस्तरय् ज्या यानाच्वनागु धयादीगु दु।

प्रधानमन्त्री ओलीं सामाजिक सञ्जालपाखें उद्धारय् सरकारया पाखें यायेमाःगु कुतलय् छुं नं कथं म्हो मजुइमा धकाः निर्देशन बियागु नापं धयादिल। “थ्व दुःखया इलय् अत्यावश्यक बाहेकं क्वःछिनातयागु ज्याझ्वःत स्थगित यानाः प्रभावित क्षेत्रय् जुया च्वंगु उद्धार ज्याबारे सुरक्षा निकायनाप मदिक्कं रिपोर्टिङ कायाच्वनागु दु”, प्रधानमन्त्री ओलीं धयादीगु दु, “विपद् सम्भावित क्षेत्रय् आपत्कालीन ग्वाहालि थ्यंकेत माःगु समन्वय यानागु दु।

सरकारी निकायतय्सं उद्धारया ज्या यानाच्वंगु दु। थुकी सकसिया ग्वाहालिया अपेक्षा यानाच्वना।” प्रधानमन्त्री ओलीं खुसिबालं गुलिखय् नागरिकया ज्यान वंगु दुसा गुलिखय् बेपत्ता जूगु दुःखया खँत वःगु व तःधंगु भौतिक क्षति जूगु थःत जानकारी वःगु धयादीगु दु। वय्कलं खुसिबालय् मदूपिं नागरिकप्रति श्रद्धाञ्जलि प्वंकादीसें विपदय् दुःखय् लानाःच्वंपिं नागरिकतय्त सहानुभूति प्वंकादीगु दु।

प्रधानन्यायाधीश प्रकाशमानसिंह राउतं सर्वाेच्च अदालतया निंतिं न्हूपिं नियुक्त जुयादीपिं स्वम्ह न्यायाधीशपिंत पद लिसें गोपनियताया शपथग्रहण याकादीगु दु।

सर्वाेच्च अदालतय् थौं ग्वसाः ग्वःगु ज्याझ्वलय् प्रधानन्यायाधीश राउतं न्हू नियुक्त जुयादीपिं न्यायाधीशपिं मेघराज पोखरेल, श्रीकान्त पौडेल व शान्तिसिंह थापायात शपथग्रहण याकादीगु खः। न्याय परिषदया सिफारिसय् संसदीय सुनुवाइ समितिं नां अनुमोदन याये धुंकाः राष्ट्रपति रामचन्द्र पौडेलं सोमबाः वय्कःपिंत सर्वाेच्चया न्यायाधीश नियुक्त यानादीगु खः।

शपथग्रहण लिपा थौं हे स्वम्हं न्यायाधीशपिंसं थःगु भाला कयादीगु दु। अथे हे, प्रधानन्यायाधीश राउतं न्हू नियुक्त जुयादीम्ह न्याय परिषदया दुजः महेशकुमार नेपालयात नं पद लिसें गोपनियताया शपथग्रहण याकादिल। परिषदया नायःया ल्याखं प्रधानन्यायाधीशं न्याय परिषदया दुजः नेपालयात शपथ ग्रहण याकादीगु खः।

रसुवाय् खुसिबाः वयाः बेपत्ता जुयाच्वंपिं १८ म्हेसिगु मालेगु ज्या जुयाच्वंगु दु। सुथय् थ्यंमथ्यं ३ ता इलय् नेपाः–चीन सीमाय् लाःगु ल्हेन्दे खुसिइ खुसिबाः वयाः १८ म्ह मनूत बेवारिस जूगु दु।

बेपत्ता जूपिं खुम्ह नेपाली कामदार, खुम्ह चिनियाँ कामदार, स्वम्ह प्रहरी व स्वम्ह चालक लाःगु रसुवा जिल्ला प्रशासन ज्याकुथिं जानकारी ब्यूगु दु। छम्ह नेपाल प्रहरी व छम्ह सशस्त्र प्रहरी व न्ह्य्यम्ह स्थानीय बासिन्दायात सकुशल उद्धार याःगु रसुवा जिल्ला प्रशासन ज्याकुथिं जानकारी ब्यूगु दु।

गृह मन्त्रालयया कथं मालेगु व उद्धारया नितिं हेलिकप्टर परिचालन याःगु दु। खुसिबाः वयाः नेपाः व चीन सीमा स्वानाच्वंगु मितेरी पुल पूवंक हे क्षति जूगु दु। प्रहरीया कथं विद्युतीय सवारी साधन चार्जिङ स्टेशनय् क्षति जूगु दुसा च्यागः विद्युतीय सवारी साधन खुसिं चुइकाः यंकूगु दु। अथे हे रसुवागढी जलविद्युत केन्द्रय् नं क्षति जूगु दु।