चन्द्रागिरि नगरपालिका–१२ सतुङ्गलय् म्हिगः बहनी मोटरसाइकल दुर्घटना जुयाः छम्ह सीत।

प्रदेश ३–०२–००६प ९५३२ ल्याःया मोटरसाइकल व बाप्र०२–०६१प३८३५ ल्याःया मोटरसाइकल न्यानाः प्रदेश३–०२–००६प ९५३२ ल्याःया मोटरसाइकल चालक वहे थासय् च्वनिम्ह नीन्यादँ दुम्ह आयुष महर्जन सीगु प्रहरीं धाःगु दु।

दुर्घटनाय् तच्वकलं घाःपाः जुम्ह महर्जनयात एपीएफ अस्पताल बलम्बुइ वासः याकेगु झ्वलय् मदूगु खः। दुर्घटनाय् घाःपाः जुम्ह मेम्ह मोटरसाइकल चालकया वहे अस्पतालय् उपचार जुयाच्वंगु दु।

नेपाल कम्युनिष्ट पार्टी (एमाले)या ११ क्वःगु राष्ट्रिय महाधिवेशनय् थौं सुथय् ८ बजेनिसे नेतृत्व ल्ययेगु निंतिं मतदान जुइत्यंगु दु।

पार्टीया केन्द्रीय निर्वाचन आयोगया अध्यक्ष डा.विजय सुब्बाया कथं म्हिगः सनिलया ४ ताः इलंनिसें मतदानया ई क्वःछिनातःगु दु।वय्कःया कथं मुक्कं ३०१ केन्द्रीय सदस्य, २५ सदस्यीय लेखा आयोग व २५ सदस्यीय अनुशासन आयोगया यानाः ३५१ पदया निंतिं निर्वाचन जुइत्यंगु खः। एमालें थुगुसीया महाधिवेशनय् विद्युतीय भोटिङ मेसिन छ्यलाः निर्वाचन यायेत्यंगु दु।

मतदानय् ८० विद्युतीय भोटिङ मेसिनपाखें मतदानया व्यवस्था यानातःगु दु।रामलक्ष्मण इनोभेसन प्रालिया सञ्चालक लक्ष्मण रिमालं आः विद्युतीय भोटिङ मेसिनय् उम्मेदवारया नां ‘इन्ट्री’ यायेगु ज्या जुगु खः।नायः पदया निंतिं आःयाम्ह नायः केपी शर्मा ओली व आः याम्ह वरिष्ठ उपाध्यक्ष ईश्वर पोखरेलया दथुइ धेंधेंबल्ला जुइत्यंगु दु।

महासचिवय् शङ्कर पोखरेल व सुरेन्द्र पाण्डें उम्मेदवारी बियादीगु दु । मतदानय् मुंक्कं नीनिसः व खुइस्वम्ह महाधिवेशन प्रतिनिधितय्सं मतदान याइगु जूगु दु।

प्रधानमन्त्री सुशीला कार्कीयान्ह्यःने राष्ट्रिय योजना आयोगया नवनियुक्त उपाध्यक्ष डा. प्रकाशकुमार श्रेष्ठ व दुजः प्रा. सुनीति श्रेष्ठ (हाडां) पद व गोपनीयताया शपथ काःगु दु।

थौं थन ग्वसाः ग्वःगु छगू ज्याझ्वलय् उपाध्यक्ष श्रेष्ठ व दुजः प्रा. श्रेष्ठं प्रधानमन्त्री कार्कीया न्ह्यःने शपथ कयादिल। ज्याझ्वलय् आयोगया दुजः लिसें मूछ्याञ्जे सुमनराज अर्याल, प्रधानमन्त्री ज्याकुथिया सचिव राजकुमार श्रेष्ठ, आयोगया छ्याञ्जे रविलाल पन्थलिसें सरकारी उच्च अधिकारीतय्सं ब्वति काःगु खः।

शपथ काये धुंकाः प्रधानमन्त्री कार्कीं नवनियुक्त न्वकू व दुजःतय्त बधाई ज्ञापन बिसें सफल कार्यकालया भिंतुना बियादिल। वय्कलं देय्या अवस्थायात बांलाक अध्ययन यानाः व जेनजी युवातय् आकाङ्क्षा कथं योजनाया तयारी यायेत निर्देशन बियादिल।“जिमिसं छिकिपिंत विज्ञकथं थ्व भाला बियागु खः, देय्या परिस्थितिबारे थु हे जुइ, थ्व परिस्थिति थुइकाः झीसं पलाः न्ह्याकेमाः।

देय्या योजना व ज्याझ्वःत नं ह्यूपाःया निंतिं युवां याःगु आन्दोलनया भावना कथं तर्जुमा यायेमाः”, प्रधानमन्त्री कार्कीं धयादिल, “आःया परिस्थिति बांलाक अध्ययन यानाः देय्या नां तयेगु ल्याखं ज्या यायेमाः। जिं आशा याना, छिकिपिं थ्व ज्याय् सफल जुयादी।”सोमबाः मन्त्रिपरिषद् बैठकं आयोगया न्वकू व दुजः नियुक्त याःगु खः।

नेकपा (एमाले) या ११ क्वःगु महाधिवेशनय् १९ म्ह पदाधिकारीया निति ४२ म्हेसिया उम्मेदवारी दर्ता याःगु दु।

केन्द्रीय निर्वाचन आयोगं सोमवाः बहनि उम्मदेवारीया प्रारम्भिक नां सार्वजनिक याःगु दु। अध्यक्ष पदय् केपी शर्मा ओली व ईश्वर पोखरेलं उम्मदेवारी ब्यूगु दु।

सरकारं राष्ट्रिय योजना आयोगया न्वकूलय् डा.प्रकाशकुमार श्रेष्ठ व दुजलय् प्राडा. सुनिति श्रेष्ठ हाडायात नियुक्त याःगु दु।

थौं च्वंगु मन्त्रिपरिषलया बैठकं उगु निर्णय याःगु सञ्चार नापं सूचना प्रविधिमन्त्री जगदीश खरेलं जानकारी बियादिल।

बैठकं चलेजूगु कानुनय् व्यवस्था जूगु अवस्थाय् बाहेक सेवा प्रवाहया प्रक्रियाय् कागजातय् आधिकारिकताया निंतिं आय–टिकटया कथं हुलाक टिकट तिकेगु प्रचलन मदयेकेगु निर्णय नं याःगु वय्कलं कनादिल।