प्रधानमन्त्री सुशीला कार्कीं संविधानं सुनिश्चित यानातःगु समावेशीकरण, सामाजिक न्याय व सांस्कृतिक–भाषिक विविधताया संरक्षण लिसें प्रवद्र्धन यायेगु राज्यया दायित्व जूगु धयादीगु दु।

आदिवासी जनजाति उत्थान राष्ट्रिय प्रतिष्ठानया २६ क्वःगु सञ्चालक परिषद् बैठकया थौं उलेज्या यानादिसें वय्कलं आदिवासी जनजातिपिनिगु म्हसिका, अधिकार, संस्कृति व समग्र विकासया निंतिं प्रतिष्ठानं यानाः वयाच्वंगु योगदान च्वछायेबहः जूगु धयादीगु दु। वय्कलं परिषदया बैठकपाखें याइगु निर्णय, मार्गदर्शन नापं नीतिगत छ्यातात राष्ट्रिय नीतितयेगु प्रभावकारी कार्यान्वयनय् सान्दर्भिक जुइगु विश्वास प्वंकादिल।

प्रधानमन्त्री कार्कीं संस्थागत सुदृढीकरण, ज्याझ्वःया प्रभावकारिता, अनुसन्धानय् लिधना च्वंगु नीतिया सिफारिस, मातृभाषा नापं तजिलजिया अभिलेखीकरण व संरक्षणया नापनापं आदिवासी जनजाति पिनिगु दिगो सामाजिक–आर्थिक सशक्तीकरणया निंतिं परिषद् बैठकं सुथांलाक लँपू क्वःछिइगु अपेक्षा यानादिल।

वय्कलं सरकारं प्रतिष्ठानया ज्याझ्वः लिसें गतिविधित प्रभावकारी कथं कार्यान्वयन यायेत माःगु नीतिगत, संरचनात्मक सुधार लिसें बजेट उपलब्ध यानाः वयाच्वनागु धयादिल। प्रधानमन्त्री कार्कीं विकास साझेदार, नागरिक समाज, स्थानीय सरकार व समुदाय दथुया मंकाः ज्यायात अझं बल्लाकाः समावेशी विकासया आज्जु ताःलाकेमाःगुलिइ बः बिसें उकिया निंतिं सरकार माःगु सहजीकरण यायेत तयार दूगु धयादिल। संविधानं नाला कयातःगु गणतन्त्र, सङ्घीयता, धर्मनिरपेक्षता व समावेशीकरणया मान्यतायात सकलें जातजाति लिसें समुदायया सर्वोपरि हितया निंतिं कार्यान्वयनय् यंकेगु सरकार व आमनागरिक निम्हेसिया दायित्व जूगु वय्कःया धापू दु।

तःताजियात राष्ट्रिय छवाःखय् रूपान्तरण यायेत लिसें आदिवासी जनजातिया सांस्कृतिक हक सुनिश्चित यायेत संविधानं प्रत्याभूत यानातःगु व्यवस्थात कार्यान्वयन यायेमाःगु वय्कलं धयादिल।अन्तरराष्ट्रिय श्रम सङ्गठन (आइएलओ)–१६९ व आदिवासी जनजातिसम्बन्धी संयुक्त राष्ट्रसङ्घीय घोषणापत्रया कथं कानुन संशोधन यायेत सर्वोच्च अदालतं ब्यूगु निर्देशनात्मक आदेशया सम्मान यासें ई कथं नियम कानुन परिमार्जनया निंतिं कार्ययोजना निर्माण यानाः कार्यान्वयनय् यंकेत सरकार प्रतिबद्ध दूगु प्रधानमन्त्री कार्कीं ध्वाथुइकादिल।

आदिवासी जनजाति आयोग व थारू आयोग थें जाःगु संवैधानिक आयोगतय्गु गठनं हक अधिकार संरक्षणय् ग्वाहालि जूगु न्ह्यथनादिसें वय्कलं आयोग व प्रतिष्ठान दथुइ थःथवंय् मंकाः ज्या व समन्वयया लिधंसाय् मंकाः आज्जु ताःलाकेमाःगु खँ कुलादिल।वंगु भदौ २३ व २४ गते जूगु जेनजी आन्दोलनं ल्ह्वंगु सुशासन, समृद्धि, नातावाद, क्रिपावाद व पक्षपातया अन्त्यसम्बन्धी मागत समावेशी विकास व सामाजिक न्यायया आकांक्षाया अभिव्यक्ति जूगु प्रधानमन्त्री कार्कीया धापू दु। सकलें वर्ग व समुदायया समान पहुँच व सहभागिताय् जूगु विकास जक दिगो जुइगु व थुकिं राष्ट्रयात बल्लाकीगु वय्कलं धयादिल।

राष्ट्रपति रामचन्द्र पौडेलं आः वइगु प्रतिनिधिसभाया चुनावय् थःगु फुक्क ध्यान केन्द्रीत यायेत सरकारयात छ्याता बियादीगु दु।

राष्ट्रपति भवन शीतल निवासय् थौं ग्वसाः ग्वःगु ज्याझ्वलय् राष्ट्रिय सुरक्षा परिषद्या आर्थिक दँ २०८१÷८२ या वार्षिक प्रतिवेदन लःल्हाना यकादिसें राष्ट्रपतिं चुनावयात प्रभावित मजुइगु यानाः ज्या यायेत सरकारयात छ्याता बियादीगु वय्कःया प्रेस सल्लाहकार किरण पोखरेलं धयादिल।

राष्ट्रपति पौडेलं न्हापा लिपा सिबें तकसं तयारी यानाः सुरक्षा व्यवस्थाय् ध्यान बिइत नेपाली सेनालिसेंया सुरक्षा निकाययात निर्देशन बियादीगु खः। राष्ट्रपति पौडेलया न्ह्यने प्रधानमन्त्री नापं राष्ट्रिय सुरक्षा परिषदया अध्यक्ष सुशीला कार्कीं राष्ट्रिय सुरक्षा परिषदया आर्थिक दँ २०८१÷८२ या वार्षिक प्रतिवेदन न्ह्यब्वयादीगु खः।

वहे झ्वलय् राष्ट्रपति पौडेलं आःया अवस्थाय् थप जूगु नापं भविष्यय् वयेफइगु सुरक्षाया हाथ्यायात नापं नुगलय् तयाः राष्ट्रिय सुरक्षा परिषद्ं आः वइगु दिनय् थःगु जिम्मेवारी अभंm प्रभावकारी कथं पूवंकीगु विश्वास प्वंकादिल।

सङ्घीय संसद् सचिवालयं उत्कृष्ट कार्यसम्पादन याःपिं प्यम्ह कर्मचारीतय्त सिरपाः ब्यूगु दु।

सभामुख देवराज घिमिरे व राष्ट्रियसभाया नायः नारायणप्रसाद दाहालं १९ क्वःगु संसद् सेवा दिवसया लसताय् थौं ग्वसाः ग्वःगु ज्याझ्वलय् वय्कः पिंत सिरपाः लःल्हानादिल।

सचिवालयं सहसचिव मनोजकुमार गिरीयात सर्वाेत्कृष्ट ‘संसद् सेवा पुरस्कार’, शाखा अधिकृत जयराम खड्कायात ‘उत्कृष्ट संसद् सेवा पुरस्कार’ नापं प्रविधिक नायब सुब्बा कृष्णकला पौडेल व ज्याकुथि ग्वाहालिमि गणेश महर्जनयात ‘संसद् सेवा पुरस्कार’ लःल्हाःगु खः।

सिरपाः छसि कथं छगू लख, ७५द्वः व ५० द्वः या दु।उकिया लसताय् संसद् सेवाया मेपिं प्यम्ह माली, कुचिकार, चालक व ज्याकुथि ग्वाहालिमियात नापं हःपाः बिइगु कथं सिरपाः ध्यबा व दसिपौ लःल्हाःगु खः। थ्वसिबें न्ह्यः ज्याझ्वलय् सभामुख घिमिरे व राष्ट्रियसभाया नायः दाहालं ‘संसद् सेवा’ स्मारिका विमोचन यानादिल।

स्मारिकाया विज्ञया कथं सेवा यानादीम्ह राष्ट्रिय समाचार समिति (रासस) या आलेख शाखा प्रमुख कृष्ण अधिकारीयात नं हंगु दु। विसं २०५८ मङ्सिर २८ गते संसद्सेवा ऐन जारी जूगु दिंया लुमन्तिइ दँय् दसं थ्व दिवस हनेगु यानाच्वंगु दु।

नेपाल कम्युनिष्ट पार्टी (एमाले) या ११ क्वःगु राष्ट्रिय महाधिवेशनया बन्दसत्र न्ह्याये न्ह्यः क्वचाःगु बैठकं १० क्वःगु महाधिवेशनय् कायम केन्द्रीय कमिटी स्वसः व छम्हेसिया जुइगु निर्णय याःगु दु।

बैठकया नायः केपी शर्मा ओलीं उगु निर्णयया बारे जानकारी बियादीगु खः। वरिष्ठ उपाध्यक्ष ईश्वर पोखरेल लिसें विधान महाधिवेशन पाखें पारित विषय यात मसंकेत माग तयाच्वंगु जूगु खःसां बहुमतं १० क्वःगु महाधिवेशनया कथं हे कायम यायेगु निर्णय याःगु दु।

बैठकयात न्ह्याकादिसें नायः केपी शर्मा ओलीं महाधिवेशनया उलेज्या समारोहय् जूगु पार्टी कार्यकर्ताया उपस्थितिं देसय् राजनीतिक दलया औचित्य दूगु पुष्टि जूगु धयादीगु खः। बैठकय् महासचिव शङ्कर पोखरेलं बन्दसत्रय् न्ह्यब्वइगु निर्वाचन ज्या धलः, आचारसंहिता, समसामयिक लिसेंया एजेण्डा न्ह्यब्वयादिल।

नांजाःम्ह मूर्तिकार बालकृष्ण तुलाधर ९१ दँया उमेरय् मन्त। सहिदगेटय् च्वंगु जुजु त्रिभुवनया झ्वाताःलिसें सहिद गङ्गालाल, दशरथचन्द, धर्मभक्त व शुक्रराजया झ्वाताः व अन च्वंगु प्यगू किपाः वय्कःया सिर्जना खः।

अथेहे, तिंख्यःया सैनिक मञ्चय् च्वंगु खुम्ह सिपाही तय्गु झ्वाताः, भ्वँतया प्यकालँय् च्वंगु त्रिभुवनया झ्वाताः, शोभाभगवतीइ च्वंगु गणेशमान सिंहया झ्वाताः लिसें त्रिमूर्ति (लक्ष्मीप्रसाद देवकोटा, लेखनाथ पौडेल व बालकृष्ण सम)या झ्वाताः वय्कःया कलाकारिताया नमूना खः।

विसं १९९२ य् येँया यट्खा त्वालय् बूम्ह तुलाधरया प्यम्ह काय् व स्वम्ह म्ह्याय् दी।