बालाजुया बाइसधाराय् लाकां कारखानाय् मिँ न्वंगु दु।

लाकां कारखानाय् मिँ न्वःगु धका बालाजुया प्रहरीं जानकारी बिउगु दु । आः अन दमकलया ग्वाहालिं मिँ स्यायेगु कुतः जुयाच्वंगु दु।

मिँ गुकथं च्याउगु धका धाःसा सिइमदुनि।

चीनय् हाकनं न्हुगु भाइरसया सङ्क्रमण खनेदुगु दु। जनावरपाखे उत्पन्न जुया न्हुगु प्रकारया हेनिपाभाइरसया सङ्क्रमण खनेदुगु धका ग्लोबल टाइम्सं धाउगु दु।

थुगु भाइरसया सङ्क्रमणं आःतक सानडोङ व हेनान प्रान्तय् खनेदुगु व ३५ म्ह सङ्क्रमित जुगु दु धका खबरय् उल्लेख याउगु दु। ज्वरोया बिरामीपिनिगु गःपःया स्वाब परीक्षण याउगुलि सङ्क्रमण पुष्टि जूगु खः।

सङ्क्रमित जूपि जनावरपि नाप सम्पर्कय् दूपि खः धका धाउगु दु। थुगु सङ्क्रमण जनावरपाखे सरे जुगु धका अनुमान याउगु दु। सङ्क्रमित जूपि मनूतयेके ज्वरो वइगु, थाके जुइगु व वाकवाकी थे जाःगु लक्षण खने दइ धका धाउगु दु।

लुँ तोलां थौं निसः थहावंगु दु। लुँ तोलां निसः थहावना ९७ हजार १ सय रुपैयाँ थ्यःगु दु धका नेपाल सुनचाँदी ब्यवसायी महासङ्घं धाउगु दु।

अथेहे वहः तोलां झीतका थहावंगु दु। वहः तोला झीतका थहावना १ हजार २ सय ३० रुपैयाँ न किनबेच जूगु दु धका महासङ्घं धाउगु दु।

ख्वपया मनोहरा खुँसि बस्तीइ दुहावंगु दु। म्हिगः मंगलबाः चान्ह्यः खुँसि बाःवया खुँसिया जःखःया बस्ती डुवे जुगु दु धका जिल्ला प्रहरी कार्यालय ख्वपं धाउगु दु।

खुँसि बाः वया करिब १०० छेँ प्रभावित जूगु दु। वडानम्बर १ दुवाकोट बेसी मनोहरा खुँसि सिथय् नीखा छेँ डुबे जुगु दु सा प्यम्हेसित उद्धार याउगु दु धका प्रहरीं धाउगु दु।

अथेहे, मध्यपुर ठिमी नगरपालिका–२ मनोहरा खुँसि सिथय् च्वंगु कृषि फर्म न डुवे जुगु दु। अनया ह्येँ न्यासम्ह व निसःम्ह बंगुर नाप साः निम्ह उद्धार याउगु दु।

वंगु चान्ह्यः खुसिवाः वया नुवाकोट व रसुवाया सतक व ताँय् क्षति जूया यातायात आवागमन अवरुद्ध जूगु दु।

रसुवाया उत्तरगया गाउँपालिका–५ बनुवा घुम्तीइ पासाङ ल्हामु राजमार्ग हे चलः वया निर्खेरं सतकय् सवारी आवागमन ठप्प जूगु दु। प्रहरीया कथं अन लँ दयेकेगु कुतः जुयाच्व्ंगु दु धका धाउगु दु। पासाङ ल्हामुइ क्षति जूया सिलू वनेपि पर्यटक व स्थानीयपि न प्रभावित जुगु दु।

जिल्ला प्रहरी कार्यालय नुवाकोटया कथं तादी खुसिइ दयका तःगु ताँ भत्के जूगु दु। नुवाकोट प्रहरीया कथं पञ्चकन्या गाउँपालिका, दुप्चेश्वर गाउँपालिका, तादी गाउँपालिका व लिखु गाउँपालिकाया सतक व ताँय् न क्षति जूगु दु।

अथेहे देवीकोटया द्यःया थाय्, खैरहनी ताँ लगायतया थासय् न चलः जूगु दु।