सुनसरी क्षेत्र नम्बर ३ य् नेकपा एमालेया भगवती चौधरी निर्वाचित जूगु दु। चौधरी ४० हजार ७८८ मत हया निर्वाचित जुगु खः।

निकटतम प्रतिद्वन्द्वी नेपाली कांग्रेसया विजयकुमार गच्छदारं ३५ हजार ६०० मत हःगु खः। विजयकुमार गच्छदार न्हापागु पटक संसद वनेत असफल जूगु खः।

धनुषा–४ य् नेकपा एमालेया रघुवीर महासेठ विजयी जूगु दु। निर्वाचन आयोगया कथं महासेठं ३२२३६ मत हया विजयी जूगु खः।

निकटतम प्रतिद्वन्द्वी नेपाली कांग्रेसया उम्मेदवार महेन्द्र यादवयात १२४ मतं पराजित याःगु खः। पराजित महेन्द्र यादवं ३२११२ मत हःगु खः।

महासेठ वंगु चुनावय् धनुषाया ३ पाखे हे विजयी जूगु खः। धनुषा– ३ पाखे थ्व स्वया न्ह्यः महासेठया जहान जुलीकुमारी महतो विजयी जुइ धुकुगु दु। महासेठ एमाले सचिव खः।

थापाथलीस्थित बागमती खुसिइ च्वपि सुकुम्बासीपिन्स थौं येँ महानगरपालिकाया ज्याकूथि न्ह्यने प्रदर्शन याःगु दु।

थःपिनिगु उचित व्यवस्थापन मयास्ये चिइकेत्यःगुलि उमिसं थौं महानगरया ज्याकूथि न्ह्यने विरोधयासे प्रदर्शन याःगु खः।

एकीकृत वाग्मती सभ्यता विकास समितिं अतिक्रमित बस्ती खाली याकेत महानगरयात इनाप याःगु खः। म्हिगः निगु पक्ष दथुइ ल्वापूया नगर प्रहरी प्रमुख नाप ३६ म्ह घाःपाः जूूगु खः।

एकीकृत बागमती सभ्यता विकास समितिं ४ मंसिर तक लिपागु म्याद तया खँुसि सिथय् अतिक्रमित बस्ती खाली यायेत इनाप याःगु खः।

उगु सार्वजनिक छेँ थुनेगु निति छगु सूचं जारी यागुलि सुकुम्बासीपिन्स माइतीघरय् विरोध सभा तक याःगु खः।

फिफा विश्वकप फुटबलय् थौं प्यंगू कासा जुइगु दु। थौं समूह ‘ए’ व समूह ‘बी’ दथुइ निगु निगु कासा जुइगु दु।

न्हापागु कासाय् समूह ‘ए’ इक्वेडर व सेनेगल नाप नेदरल्यान्ड्स व कतार दथुइ जुगु दु। निगु हे कासा नेपाःया ई कथं बहनिसिया ८ः४५ बजे जुइगु दु।

थुगु कासां समूह ‘ए’ पाखे नकाआउट चरणय् सू थ्यनिइ सिइ दइ। अथेहे, मेगु कासा समूह ‘बी’ इरान व अमेरिका नाप वेल्स व इङ्ल्यान्ड दथुइ कासा जुइ। थुगु कासा चान्ह्यःसिया १२ः४५ बजे सुरु जुइ ।

समूह ‘बी’ पाखे नकाआउट चरणय् सू थ्यनिइ सिइ दइ। विश्वकप फुटबलय् पोर्चुगल, ब्राजिल व फ्रान्स नकआउटय् थ्यने धुकुगु दु।

मंसिर ४ य् जूूगु आम निर्वाचनय् समानुपातिकपाखे नेकपा एमालें निरन्तर न्ह्यने दु।

सुरुनिसे हे समानुपातिकय् न्ह्यने वनाच्वंगु एमाले आःतक २५ लाख ६३ हजार ६२८ मत हया न्ह्यने दु। अथेहे, नेपाली कांग्रेसं २४ लाख ३१ हजार २०४ मत हःगु दु।

एमाले कांग्रेस स्वया १ लाख ३२ हजार ४२४ मतं न्ह्यने दु। नेकपा माओवादी केन्द्रं १० लाख ८७ हजार २७९ मत, राष्ट्रिय स्वतन्त्र पार्टी न १० लाख ६८ हजार ५७८ मत, राष्ट्रिय प्रजातन्त्र पार्टी न ५ लाख ४८ लाख ६३५ मत व जसपां ३ लाख ४२ हजार ३२९ मत हःगु दु।

अथेतु, जनमत पार्टी न २ लाख ८४ हजार ८६८ मत हया थ्रेसहोल्ड कटे याये धुकुगु दु सा नेकपा एकीकृत समाजवादीं २ लाख ६९ हलार ९२९ मत हःगु दु।