लुँया भाः थौ च्याद्धः व सच्छि थहावःगु दु। थौ लुँया भाः च्याद्धः व सच्छि थहावनां २ लाख ४८ हजार ५ सय तका न कारोबार जुगु दु धका नेपाल सुनचाँदी व्यवसायी महासङ्घं धाःगु दु।

अथेहे वहः तोलां न १ सय पच्चास थहावंगु दु। वहः तोलां न १ सय पच्चास थहावनां ३ हजार ३ सय २५ तका थ्यःगु दु।

शेयर बजाः परिसूचक नेप्से थौ १९ दशमलव ४३ ल्याखं कुहावया २ हजार ५ सय २८ दशमलव १७ विन्दुइ कुहावःगु दु।थौ म्युचल फन्ड, मेमेगु व व्यापार बाहेक दक्को समूहया शेयर कुहावःगु दु।

थौ २ सय १४ गु कम्पनीया शेयर कुहावःगु दु सा ३३ गु कम्पनीया भाः थहावःगु दु। अथेहे न्यागु कम्पनीया शेयर स्थिर जुगु दु। समाज लघुवित्त कम्पनीया शेयर १० प्रतिशतं कुहावःगु दु। समग्र बजाः कुहावःसा शुभम् पावर व ग्रामीण विकास लघुवित्त कम्पनीया शेयर धाःसा १० प्रतिशतं थहावःगु दु। नेप्स नापं कारोबार रकम न थौ कुहावःगु दु।

म्हिगः ४ अर्ब ९७ करोडया कारोबार जुगु खःसा थौ ३ सय १७ गु कम्पनीया ७४ लाख ८८ हजार कित्ता शेयर ३ अर्ब ३६ करोड तका कारोवार जुगु दु।

सर्वाेच्च अदालतय् थनिनिसें रिट निवेदन दर्ता चालेवं प्रतिनिधिसभा विघटनविरुद्ध आःतक खुगू रिट निवेदन न्ह्यब्वःगु दु। वंगु भदौ २४ गते जूगु जेनजी प्रदर्शनय् अदालतय् मिं तया, तोडफोड व लुटपाटपाखें जूगु क्षतिलिपा बन्दी प्रत्यक्षीकरणया निवेदन नापं मदयेकं मगाःगु निवेदन दर्ता व सुनुवाइ बाहेकं मेगु फुक्क ज्या दिकातःगु खः।

थनिनिसें रिट निवेदन दर्ता व सुनुवाइ चालेवं प्रतिनिधिसभा विघटन विरुद्ध मदिक्कं रिट निवेदन वःगु खः। सर्वाेच्च अदालतया प्रवक्ता अर्जुनप्रसाद कोइरालाया कथं प्रतिनिधिसभा विघटन विरुद्ध आःतक खुगू रिट निवेदन न्हयब्वःगुलिं दर्ताया निंतिं अध्ययन जुयाच्वंगु दु।

थ्वहे असोज २६ गतेया प्रधान न्यायाधीश प्रकाशमान सिंह राउतलिसें सकल न्यायाधिशया पूर्ण बैठक (पूmल कोर्टं) थनिनिसें रिट निवेदन दर्ता लिसें सुनुवाइ न्ह्याकेगु निर्णय याःगु खः।