राष्ट्रिय सभा सदस्य डाक्टर अञ्जान शाक्य अन्तर–व्यवस्थापिका संघ (आईपीयु) या दिगो विकास स्थायी समितिया एसिया–प्रशान्त क्षेत्रपाखे नेपाःया प्रतिनिधित्व यासे न्हापागु पटक विजयी जूगु दु।

उज्वेकिस्तानया राजधानी ताश्केन्टय् जुगु उगु सम्मेलनय् शाक्यं नेपाःपाखे प्रतिनिधित्व यानादीगु खः। शाक्यनापं माल्दिभ्स व इरानपाखे उम्मेदवारी ब्यूगु खः, सभामुख घिमिरेें दिगो विकासको क्षेत्रय् अनुभव दुम्ह शाक्यं अन्तर्राष्ट्रिय मञ्चय् नेपाःपाखे सशक्त भूमिका निर्वाह याये फइगु भलसा कयादीसे आईपीयुया दिगो विकास स्थायी समितिइ दुगु ३६ देशया सभामुखयात पौ च्वयादीसे शाक्ययात समर्थन यायेत इनाप यानादीगु खः।

नेपालं थ्व हे न्हापागु पटक थुगु मञ्चय् थःगु उपस्थिति क्यःगु खः। शाक्यं सकारात्मक कुतःया निति प्रधानमन्त्री, सभामुख, संसद सचिवालयया अन्तर्राष्ट्रिय महाशाखायात सुभाय् बियादीगु दु। सांसद शाक्य राष्ट्रिय सभाय् विकास, आर्थिक मामिला लिसे सुशासन समिति सदस्य नाप उगु समितिया दिगो विकास उपसमिति संयोजक न जुयादी।

 प्रधानमन्त्री केपी शर्मा ओलीं भारतीय समकक्षी नरेन्द्र मोदीलिसे जूगु खँल्हाबल्हाय् नेपाः–भारत दथुइ सम्बन्धयात अझ तब्याकेगु, दुग्यंकेगु व सुदृढ याना यंकेगु अठोट जूगु धयादीगु दु।

थाइल्याण्डया औपचारिक भ्रमण नापं बहुक्षेत्रीय प्राविधिक व आर्थिक ग्वाहालिया निंतिं बङ्गालया खाडीया कुतः (बिम्स्टेक) खुक्वःगु शिखर सम्मेलनय् ब्वति कयाः स्वदेश लिहाँ झायेधुंकाः त्रिभुवन अन्तरराष्ट्रिय विमानस्थलया अतिविशिष्ट कक्षय् थौं ग्वसाः ग्वःगु पत्रकार सम्मेलनय् वय्कलं समकक्षीलिसेया खँल्हाबल्हा तसकं फलदायी जूगु व थः तसकं लय्ताया धकाः लिसः बियादिल।

“जःला खःला नाप छुं छुं चिची धंगु समस्या ला खने हे दयेफु, अजाःगु जु हे जूसां थवंथः संवाद यायेगु व उकियात ज्यंकेगु धइगुलिइ थुगुसी झीसं छगू तःधंगु समझदारी यानागु दु”, सञ्चारकःमितय् न्ह्यसलय् प्रधानमन्त्री ओलीं धयादिल, “थ्व नाप लायेगु ज्याझ्वः फलदायी जुल व जि तसकं लय्ताया, वय्कःया खँल्हाबल्हां वय्कः (मोदी) नं लय्ताः धइगु जिं तायेका।”

प्रधानमन्त्री ओलीं भारतीय समकक्षीलिसेया खँल्हाबल्हाय् थ वं थः ग्वाहालिया थी थी ख्यलय् सहकार्य सम्बन्धी विचाः विमर्श जूगु जानकारी बियादिल। वय्कलं धयादिल, “उगु झ्वलय् लगानी व बनेज्याया ख्यः, बहुउद्देश्यीय पञ्चेश्वर आयोजना, व दोधरा चाँदनीइ महाकालीं सिँचाइ यायेगुलिसें निगूपक्षीय थवंथः भिं जुइगु विषयय् खँल्हाबल्हा जुल।”

प्रधानमन्त्री ओलीं नेपालं आयोजना याःगु सगरमाथा संवादय् भारतीय प्रधानमन्त्री वये मफइगु जानकारी बियादिसें उगु ज्याझ्वलय् भारतपाखें उच्चस्तरयापिं ब्वति काइ धकाः धयादिल । “मोदीजी वये लाइमखु, छाय् धाःसा वय्कःया न्हापा हे उगु इलय् युरोप वनेगु ज्याझ्वः क्वजीधुंकूगु खः, उकिं वय्कः थन वये फइमखु तर भारतपाखें उच्चस्तरया प्रतिनिधित्व जुइ।”

बिस्कं प्रसङ्गय् प्रधानमन्त्री ओलीं आन्दोलन यानाच्वंपिं शिक्षक तय्सं न्ह्यः थंगु विषययात सरकारं सकारात्मक रुपं ग्रहण यानाः संबोधन याइ धकाः धयादिल। वय्कलं धयादिल, “सरकारं थःपिनिगु खँ न्यनी धइगु वय्कःपिनि भलसा दु, उकिं वयादीगु खः, जिमिसं खँल्हाबल्हा नं याये, सरकारं वय्कःपिनिगु खँ नं न्यनी।”

शिक्षकतय्सं तःगु मागया सम्बन्धय् गे–गथे यायेफइ, गे–गथे यायेमाः धइगु खँ थवंथः च्वनाः सहलह यानाः पूवनी धइगु भलसा बियादिल। “यक्व थुकिइ वय्कःपिंत नं दुःख मजूसा ज्यू, सरकारं छुं नकारात्मक दृष्टिकोण तइ हे मखु, छाय् तये माःगु दु?”, वय्कलं धयादिल, “शिक्षकया समस्या ज्यनी।” सरकारं थ्व हे चैत १५ गते तीनकुनेय् जूगु घटनाया निष्पक्ष छानबिन याना च्वंगु वय्कलं जानकारी नं बियादिल।

प्रधानमन्त्री केपी शर्मा ओली थाइल्याण्डया औपचारिक भ्रमण व खुक्वःगु बहुक्षेत्रीय प्राविधिक नापं आर्थिक ग्वाहालिया निंतिं बङ्गालया खाडीया कुतः (बिम्स्टेक) शिखर सम्मेलनय् ब्वति कयाः थौं लिहाँझाःगु दु।

प्रधानमन्त्री ओलीयात त्रिभुवन विमानस्थलया अतिविशिष्ट कक्षय् उपप्रधानमन्त्री प्रकाशमान सिंह, गृहमन्त्री रमेश लेखक, संस्कृति, पर्यटन नापं नागरिक उड्डयनमन्त्री बद्रीप्रसाद पाण्डे, सरकारया उच्चपदस्थ अधिकृत नापं सुरक्षा अङ्गया प्रमुखं लसकुस यानादिल। प्रधानमन्त्रीयात लसकुस यायेत नेपालय् च्वंगु कूटनीतिक समुदायया डीन, नेपाःया निंतिं इजिप्टया राजदूत व नेपाःया निंतिं थाइल्याण्डया कार्यवाहक राजदुत विमानस्थलय् वनादीगु खः।

व स्वयां न्ह्यः नेपाली सेनाया छगू टुकडीं प्रधानमन्त्रीयात सम्मान देछाःगु खः।थाइल्याण्डया प्रधानमन्त्री पे थोङ् थान् शिनावातया मैत्रीपूर्ण ब्वनाय् २१ म्ह दुजःया प्रतिनिधिमण्डलया नेतृत्व यानादिसें प्रधानमन्त्री ओली थ्व हे चैत १९ गते उखे पाखे झायादीगु खः। थाइल्याण्डय् प्रधानमन्त्री ओलीं छिमेकी भारतया प्रधानन्त्री नरेन्द्र मोदीलिसें थी थी देय्या समकक्षीलिसे थ वं थः भिं जुइगु व च्यूताःया बिस्क ंबिस्कं विषय सहलह यानादीगु खः।प्रधानमन्त्री ओली थ्व हे चैत २२ गते बिम्स्टेक शिखर सम्मेलनय् संबोधन नं यानादीगु खः। व स्वयांन्ह्यः प्रधानमन्त्री ओेली चैत २१ गते बिम्स्टेक शिखर सम्मेलनय् ब्वति काःगु दुजः देय्तय् सरकार वा राष्ट्र प्रमुखया नेता तय्गु हनाय् ग्वसाः ग्वःगु भ्वजय् नं वनादीगु खः।

शिखर सम्मेलनया झ्वलय् दुजः देय्या समकक्षी नापं राष्ट्र प्रमुखलिसे नापलानाः खँल्हाबल्हा यानादिल। प्रधानमन्त्रीनापं न्हापांम्ह मिसा राधिका शाक्य, परराष्ट्रमन्त्री डा आरजु राणा देउवा, प्रधानमन्त्रीया मुख्य सल्लाहकार विष्णुप्रसाद रिमाल, आर्थिक नापं विकास सल्लाहकार डा युवराज खतिवडा, मुख्यसचिव एकनारायण अर्याल, परराष्ट्र सचिव अमृत राई नं स्वदेश लिहाँझाःगु खः।

पदयात्राया झ्वलय् कास्कीया अन्नपूर्ण गाउँपालिका–११ देउरालीइ च्वंगु चुमरुङय् हिमपहिरोय् ल्हानाः तनाच्वंम्ह २८ दँया चिनियाँ नागरिक ई–चेङ युआनया १३ न्हुलिपा थौं शव लुयावःगु दु।

सशस्त्र प्रहरी बल कालिका गण पोखराया विशेष विपद् उद्धार टोलीं थौं सुथय् देउराली चुमरुङय् च्वंगु मोदी खुसि सिथय् २० मिटर उत्तरपाखे वय्कःया शव लुइकूगु कालिका गणया गणपति प्रहरी उपरीक्षक सूर्यप्रसाद तिमिल्सिनां जानकारी बियादिल। अन्नपूर्ण आधार शिविर(एविसी)या पदयात्रा पूवंकाः घान्द्रुकपाखे लिहाँ वनेगु झ्वलय् पर्यटक तनाच्वंगुलिं वय्कःयात मालेत प्रहरी टोली वंगु खः।

प्रहरी उपरीक्षक तिमिल्सिनाया कथं वय्कःया शव पोखरा हयेगु तयारी जुयाच्वंगु दु। थ्व हे चैत ११ गते न्हिनेसिया १२.३० ताः इलय् कास्कीया अन्नपूर्ण गाउँपालिका–११ देउरालीइ च्वंगु चुमरुङय् हिमपहिरो वंगु खः। बेसक्याम्पं लिहाँवःम्ह भारतीय पर्यटकं देउरालीइ वंगु हिमपहिरोय् छम्ह ल्हाःगु सुचं प्रहरीयात ब्यूगु खः।

पर्यटक तंगुलिं स्थानीय बासिन्दा व नेपाल प्रहरीया टोलीं मालाः लुया मवःगुलिं कालिका गणं सशस्त्र प्रहरी निरीक्षक विश्वराज त्रिपाठीया कमाण्डय् थ्व हे चैत १६ गतेनिसें प्रहरी टोलीं माःवंगु खः।

चैत दसैं नखः थौं नेपाःमितय्सं नवदुर्गा भगवतीया पुजा यानाः न्यायेकी। दच्छिइ प्यंगू नवरात्र वइ ।

आषाढ व पौष शुक्ल पक्षय् लाइगु नवरात्र यक्व प्रचलनय् मदु। सुं सुं साधक तय्सं धाःसा आषाढ व पौष शुक्ल पक्षया नवरात्रय् नं शक्ति स्वरुपा देवीया आराधना याइ।

हनुमानध्वाखाय् दसैं छेँय् धाःसा घटस्थापना यानाः विधिकथं पुजा यानाः अष्टमीकुन्हु बलि बिइगु चलन नं दु । चैत दसैंकुन्हु अष्टमी व नवमीयात विशेष कथं न्यायेकीगु याइ।