हलिमय दकलय् लोकंह्वाःगु संकिपा श्रृंखला ‘जेम्स बन्ड’या स्वामित्व छगू परिवारयाके जक सीमित जुल। तर, आइतवाः जूगु ऐतिहासिक सम्झौतां थुगु लोकंह्वाःगु संकिपाया स्वामित्व हलिउड स्टुडियो अमेजन एमजीएमया नियन्त्रणय् वःगु दु।

थ्व सम्झौता लिपा भ्याराइटी पत्रिकां च्वःगु दु, “ऐतिहासिक सम्झौता लिपा लोकंह्वाःगु श्रृंखलां न्हूगु आकार व दिशा काःगु दु।” थ्व सम्झौताया छगू ब्व कथं बन्ड सिरिजया निर्माता बारबरा ब्रोकोली व माइकल जी विल्सनं अमेजन एमजीएमलिसे सम्झौता याःगु दु, गुकिं निगूगु पक्षयात क्रिएटिभ कन्ट्रोल लःल्हाइगु जूगु दु।

‘००७ कोड’पाखें नांजाःगु जेम्स बन्ड सिरिजया निर्माणय् अमेजन एमजीएमं पलाः तये धुंकाः हलिउडयात आश्चर्यचकित याःगु दु। थुगु संकिपा श्रृंखला ’नो टाइम टु डाइ’या दकलय् लिपांगु २०२१ स पिहां वःगु खः। थ्व संकिपा जेम्स बन्डया रुपय् डैनियल क्रेगया लिपांगु संकिपा खः।

न्हूम्ह जेम्स बन्डया भूमिकाया निंतिं कलाकार मालेगु ज्या उबलेनिसें हे जुयाच्वंगु खः। अभिनेता क्रेगं जेम्स बन्डया रुपय् न्यागू सिरिजय् म्हितूगु खः। सूत्रया कथं न्हूगु सिरिजया बाखं व निर्देशकया बारे आःतक क्वचाःगु मदुनि।

४ दँ न्ह्यः अमेजनं एमजीएम स्टुडियोयात ८.५ अर्ब डलरय् न्याःगु खः।

बलिउडया सुपरस्टार सलमान खानं सन् २०२१ य् पिदनीगु अर्जेन्टिनी संकिपा ‘सेभेन डग्स’या रिमेकपाखें हलिउडय् डेब्यु यायेत्यंगु दु।

थ्व संकिपाया निर्देशक रोड्रिगो गुरेरो खः। थ्व हलिउड संकिपाया सुटिङ दुबईलय् जुयाच्वंगु खँ पिहां वःगु दु। सलमानया सेटया न्हापांगु लुक अनलाइनय् लिक जूगु दु। समाचार कथं सलमानं नकतिनि जक दुबईलय् छन्हुया निंतिं सुटिङ याःगु खः, गन मुम्बईया धारावी झुग्गी बस्ती थेंज्याःगु तःधंगु सेट विशेष रुपं दयेकूगु दु।

सलमानया रोलया विस्तृत बारे जानकारी ब्यूगु मदुनि, तर सूत्रया कथं थ्व फिल्मय् सलमानया विशेष रोल दइगु खँ धाःगु दु। संकिपाया आत्मीय व रोचक विषय वस्तुयात ध्यानय् तयाः वय्कःया पात्रं बाखंया धारय् गुकथं योगदान बियाच्वंगु दु धइगु स्वयेबलय् रोचक जुइ।

थ्व संकिपालिसें सलमान हलिउडय् दुहां वःपिं प्रियंका चोपडा, दीपिका पादुकोण, अली फजल थेंज्याःपिं भारतीय कलाकार तय्गु धलखय् दुहां वनीगु जूगु दु। सलमानया न्हूगु म्ये पितब्वज्या यायेत वया भिन्चा अयान अग्निहोत्री नं दुबई दु। ‘सेभेन डग्स’या रिमेकय् सलमानं अयानया म्युजिक लन्चय् ब्वति काःगु इलय् विशेष भूमिका म्हितेगु निर्णय याःगु सूत्रं सार्वजनिक याःगु दु। सलमानया हलिउड डेब्यु निश्चित रुपं फ्यान तय्गु निंतिं तःधंगु क्षण खः।

थौंकन्हय् संकिपाया शुटिंग जुयाच्वंगुलिं फ्यानतय्सं थप अपडेटया उत्सुकतापूर्वक पियाच्वंगु दु। सलमानयात लिपांगुखुसि ‘टाइगर ३’य् खनेदूगु खः। ईदया दिनय् रिलिज जुइत्यंगु मेगु संकिपा ‘सिकन्दर’य् वय्कः खनेदइगु जूगु दु। थ्व फिल्मय् रश्मिका मन्दन्ना नं म्हितातःगु दु।

लिपांगु इलय् बलिउड गायक उदितनारायण झा छगू लिपा मेगु विवादय् तक्यःगु दु। छुं वाः न्ह्यः छगू कन्सर्टया झ्वलय् छम्ह मिसा फ्यानयात चुप्पा नये धुंकाः झा विवादय् तक्यना च्वंगु दु। वयात हाकनं विवादय् घ्वानाः यंकूगु दु।

थुगु खुसि वय्कःया तःधिकःम्ह कलाः रञ्जना झां भरणपोषण मुद्दा तःगु दु । वं थःगु अधिकार हनन याःगु व थःगु सम्पत्ति जफत याःगु द्वपं ब्यूगु दु। थ्व मुद्दाय् उदितनारायण सुपौल प्यामिलि कोर्टय् परिवार नाप अदालतय् उपस्थित जूगु खः। अन वं छुं नं सम्झौताय् यायेत अस्वीकार यागु खः।

एनबीटी न्यूजया कथं उदितं अदालतय् थः न्हापाया कलाः रञ्जनां आः नं ध्यबा कयाच्वंगु द्वपं ब्यूगु दु। थ्वसिबें न्ह्यः रञ्जनां विहार महिला आयोगय् नं उजुरी ब्यूगु खः। खँ ज्यंकेत निम्हं अन थ्यंगु खः। विवरण कथं उदितं रञ्जनायात मर्मत सम्भार खर्चया नितिं मासिक १५ हजार तका बीगु यानाच्वंगु खः।

२०२१ स थ्व रकम अप्वयेकाः २१ हजार तका थ्यंगु खः। उदितं रञ्जनायात बुँज्या यायेत बुँ व छेँ बियादीगु खः, गुकिया मू १ करोडया खँ धाःगु दु।विहार महिला आयोगया कथं उदितं रञ्जनायात २५ लाख बराबरया तिसा व जग्गा ब्यूगु खः। तर, रञ्जनां निगुलिं मियाबिल।

रञ्जनां थः वकिल मार्फत थःगु स्वास्थ्य स्यनाच्वंगुलिं थः भाःत उदित नारायणया वृद्धावस्थाय् च्वनेगु इच्छा दुगु खँ धाःगु दु।उदित व रञ्जनाया इहिपा सन् १९८४ स जूगु खः। उदितयात  नां जाये धुंकाः रञ्जनायात याकःचा त्वःताः वंगु द्वपं नं बियातःगु दु। रञ्जनायात थः कलाः कथं कायेत अस्वीकार याःगु द्वपं नं वयात लाःगु दु।

थ्व इलय् रञ्जना थःगु अधिकारया नितिं निरन्तर रुपं ल्वानाच्वंगु दु। सन् २००६ य् रञ्जनां मिसा आयोगपाखें ग्वाहालि फ्वंगु खः। उगु इलय् उदितं फ्ल्याट व सामग्री बीगु बचं बिउगु खः, तर पूवंके मफुत।

गायक श्यामकृष्ण तुलाधरं नांजाःम्ह गायिका निशा देशारलिसे हालातःगु ज्वःम्ये “समयबजि नयेबलय्”या पितब्वज्या बुधवाः यलया वडा २२ बुङ्गमतिया सभाहलय् पितब्वज्या जूगु दु।

यल वडा २२ या वडाध्यक्ष सागर तुलाधर मूपाहाँ कथं झायादीगु ज्याझ्वलय् वयकलं बुंगय् नं कलाकारिता ख्यलय् पलाः तयाच्वंपिं बाँलाःपिं कलाकार दुगु खँ न्ह्यथंसे कलाकारिता ख्यःया थपु यायेगु ज्याय् वडा व थःपाखें फूचाःगु ग्वाहालि याये धकाः धयादिल। ज्याझ्वलय् ख्यालि जुजु मदनकृष्ण श्रेष्ठया काय् यमन श्रेष्ठ, म्येहालामि निशा देसार लगायतं नुगःखँ तयादीगु खःसा नेपालभाषाया न्हापांम्ह म्युजिक भिडियो निर्देशक विजयरत्न असंबरें म्येया समीक्षा यानादीगु खः। थुगु म्येया संगीतकार व रचनाकार नं श्यामकृष्ण तुलाधर हे खःसा जिवित जल्मी बाजं ग्वसामि खः।

लुभु वेभ स्टुडियोस् ज्या जूगु थ्व भिडियोया निर्माण व्यवस्थापन केबिएस लुभु हाउसपाखें जूगु खः।थ्व म्येया समाः उमिशा पाण्डे, निर्माण व्यवस्थापक केबिएस लुभु, किपालुमि शैलेश श्रेष्ठ लुभु, सम्पादन अमर चित्रकारं यानादीगु खःसा मनोज महर्जन व सोनिया तुलाधरं मू भुमिकाय् अभिनय यानादीगु दु।

बहुप्रतिक्षित विश्व संगीत भ्रमण ‘लास मुजेरेस वाई नो लोरान’य् न्ह्याः वनाच्वंम्ह पप स्टार शाकिरा प्वाःया समस्यां यानाः अस्पतालय् भर्ना जूगु दु । उकिं यानाः पेरुइ जुइगु वय्कःया कन्सर्ट स्थगित जूगु अन्तर्राष्ट्रिय संचार माध्यमं समाचार पिकाःगु खः । ४८ दँ दुम्ह म्येहालामिं थःत अस्पतालया इमर्जेन्सीइ वासः याका च्वनागु जानकारी ब्यूगु दु।

सामाजिक संजालय् तःगु छगू सन्देशय् शाकिरां कन्सर्ट रद्द यायेमाःगुलिं दुःख प्वंकूगु दु। वय्कलं च्वयादी, “प्वाथय् समस्या वया अस्पताल वनेमाःगु जानकारी बियाः छिपिं सकसितं माफी फ्वनाच्वना।” जि अझ नं वासः याकाच्वनागु दु। पेरुइ थः फ्यानतय्गु निंतिं न्ह्यब्वयेगु निंतिं पिया च्वनागु कन्सर्ट रद्द यायेमाःगुलिं वय्कलं दुःख प्वंकादीगु खः।

वय्कलं पूर्वनिर्धारित तिथिइ कन्सर्ट यायेगु प्रतिबद्धता दुगु सन्देश ग्वसाः खलकं बियाच्वनागु खँ कनादिल। वं च्वःगु दु, “जिं छिपिं सकसितं मतिना याना, छिमिगु समझदारीयात कदर याना ।” स्वास्थ्यय् समस्या दुसां नं “हिप्स डोन्ट लाइ“ म्येहालामि याकनं हे मञ्चय् लिहां वइगु आशा यानाच्वंगु दु । वय्कलं सोमवाः डिस्चार्ज जुइगु व भ्रमणयात निरन्तरता बीगु आशा यानादीगु दु।

योजना कथं उसाँय् मलात धाःसा कोलम्बिया वने न्ह्यः पेरुइ पर्फर्म यायेमालीगु जूगु दु। शाकिरां फेब्रुअरी ११ तारिखय् ब्राजिलया रियो डि जेनेरिओय् भ्रमण न्ह्याकूगु खः । थुगुसीया ग्रामी अवार्डया निंतिं दकलय् बांलाःगु ल्याटिन पप एल्बम त्याकूगु छुं दिं लिपा हे वय्कलं थुगु भ्रमणय् पलाः तयादीगु खः । वय्कःया दक्षिण अमेरिकी भ्रमण मार्च ८ तक न्ह्याइ । अले व मेक्सिकोया निंतिं तयार जुइ।