अल्लु अर्जुनं म्हितूगु ‘पुष्पा २’ भारतीय बक्स अफिसय् आक्रामक रुपं ओपन जूगु दु।

भारतीय सञ्चार माध्यमया कथं थ्व फिल्मं भारतीय फिल्मया इतिहासय् दकलय् अप्वः ओपनिङ याःगु खः।थुगु संकिपां एसएस राजामौलीया संकिपा ‘आरआरआर’या कीर्तिमान त्वाःथःगु खँ न्ह्यथंगु दु।

थ्व एजेन्सीया कथं आइतवाः न्हापांगु दिं फुक्क भाषाय् संकिपां १७५.१ करोड नेट आम्दानी याःगु दु। थ्व आम्दानीलिसें “पुष्पा २“ नं “आरआरआर“या १३३ करोडया उलेज्या संकलनयात लिउने लाकूगु दु। बलिउड हुंगामां थुगु संकिपां न्हापांगु दिं हे विश्वन्यंकं २७० निसें २८० करोड आम्दानी याःगु उल्लेख याःगु दु।

थ्व पोर्टलया कथं थुगु संकिपां न्हापांगु दिं जक भारतन्यंकं २०० करोड आम्दानी याःगु दु। बलिउड हंगामां थ्व आम्दानी आःतकया भारतीय संकिपाया दकलय् अप्वः ओपनिङ जूगु रिपोर्ट याःगु दु। थुगु संकिपां ‘बाहुबली’ व ‘आरआरआर’या ग्लोबल ओपनिङयात नं लिउने लाकूगु खँ न्ह्यथनातःगु दु।

थ्व फिल्मं उत्तर भारतय् जक ७० करोड आम्दानी याःगु धाःगु दु। आजतकया कथं सुकुमारं निर्देशन याःगु थ्व संकिपां न्हापांगु दिं हिन्दी संस्करणय् ६८ करोड जक आम्दानी यानाः दकलय् अप्वः ओपनिङ हिन्दी संकिपाया रुपय् कीर्तिमान तःगु दु। शाहरुख खानया ‘जवान’या उलेज्या संग्रहं अल्लु अर्जुन स्टाररया ६५.५ करोड तकं लिउने लाकूगु खँ न्ह्यथनातःगु दु।

हिन्दी संस्करणया निंतिं ‘स्ट्री २’ ५५.४० करोड, ‘पठान’ ५५ करोड व ‘एनिमल’ ५४.७५ करोड ओपनिङया स्वंगूगु थासय् लाःगु खः। सन् २०१७ य् प्रभासया बाहुबली २४१ करोड आम्दानी यानाः दकलय् अप्वः ओपनिङ साउथ संकिपा जूगु खः।

सन् २०२२ य् ‘केजीएफ २’यात हिन्दी भासं ५४ करोडया ओपनिङ प्राप्त जूगु खः।नेपालय् ‘पुष्पा २’या उलेज्या संग्रह आःतक नं वःगु मदुनि।

स्वर सम्राट नारायण गोपालया ३४ क्वःगु लुमन्ति न्हिया लसताय् स्वम्ह श्रष्टातय्त हंगु दु। नारायण गोपाल सङ्गीत कोषं बुधबाः सनिलय् छगू ज्याझ्वः याना ‘नारायण गोपाल स्मृति सम्मान २०८१’ य् लय् चिनामि बुलु मुकारुङ, सःपाखे कुमार बस्नेत व म्येपाखे चिनामि शिवशंकर थापायात हंगु खः।

नारायण गोपालनाप सतिंक च्वनादीपिं व सङ्गीत ख्यलय् विशेष योगदान बियादीपिं श्रष्टातय्त वयकःपिनि योगदानया कदर यासें म्हतिं ५१ द्वः ध्यबाः वा हना पौ देछाना हंगु खः। ज्याझ्वलय् हंपिं मध्ये लय् चिनामि मुकारुङं नारायण गोपाल नापं नां स्वाना थःत हंगुलिं थ्व हना थःत तसकं मू वंगु जूगु दु धयादिल।

वय्कलं धयादिल, “नारायण गोपाल संगीतया विश्वविद्यालय हे खः। वंगु ख्वीदँनिसें आःया संगीतख्यःया तकं वय्कः छम्ह प्रेरणाया स्रोत जुयाच्वंगुलिं हे वय्कःया क्षमता गुलि दु धका सिकेफइ। थुजाःगु यक्वः हुनिं वय्कः स्वर सम्राट जुयादीगु खः। थ्व हना जिगु निंतिं अस्कर अर्वाड सिबें तःधं। वय्कःया म्ये प्रत्यक्ष न्यने दूगु, सतिंक्क च्वने दूगु थःगु निंतिं तसकं गौरवया खँ खः।”‘सम्झनामा नारायण गोपाल’ ज्याझ्वलय् थीथी श्रष्टां वय्कयात म्ये हाला नं लुमंकादीगु खः।

म्ये हालामि दीव्यकुमार सिटौलां ‘मलाई छोडी मेरो छाँया...’, साजन लामां ‘यति चोखो यति मिठो ...’, राजेन्द्र श्रेष्ठं ‘गल्ती हजार हुन्छ ...’, महेन्द्र गुरुङ व रोजी श्रेष्ठं ‘ए कान्छा ठट्टैमा या वैश ...’, सम्भव जंगम थापा व संगीत तिमिल्सिानां ‘मेरो जोवन लैजाउ ...’, म्ये हालामि रामकृष्ट ढकालं ‘तिमीलाई भुल्दा ...’, छिरिङ भुटियां ‘मन्दिरमा छ कि मूर्तिमा माया ...’ लिसेंया म्येत न्ह्यब्वया नारायण गोपालयात लुंमकादीगु खः।

विसं १९९६ असोज १८ गते येँ जन्म कयादीम्ह नारायण गोपालं विसं २०४७ मंसिर १९ गते थ्व संसार त्वताः झागु खः। दँय्दसं मंसिर १९ गते वय्कः व वय्कःया म्येयात लुमंका लुमन्ति न्हि न्यायेका वयाच्वंगु दु। (रासस)

चीनया औपचारिक भ्रमणय् झायाच्वनादीम्ह प्रधानमन्त्री केपी शर्मा ओलीं थौं पेकिङ विश्वविद्यालयस् ‘नेपा–चीन स्वापूया थीथी दासु’ बारे न्वचू बीगु ज्याझ्वः दु।

परराष्ट्र मन्त्रालयया कथं प्रधानमन्त्री ओलीं थौं हे नेपाल उद्योग वाणिज्य महासंघ व चाइना काउन्सिल फर द प्रमोशन अफ इन्टरनेशनल टे«डपाखें मंकाः कथं ग्वसाः ग्वइगु नेपा–चीन व्यापार मंचयात नं सम्बोधन यानादी।

प्रधानमन्त्री ओलीं मंगलबाः राष्ट्रपति सी चिनफिङयात नापलानादीगु खः। म्हिगः हे वय्कलं थः समकक्षी ली छ्याङ व राष्ट्रिय जनकङ्ग्रेसया नायः झाओ ल जीनापं ब्यागलं ब्यागलं नापालानादीगु खः।

निगु देया देय्या प्रधानमन्त्री नेतृत्वया प्रतिनिधिमण्डल दथुइ ग्रेट हल अफ द पिपुलय् खँल्हाबल्हा लिपा निगू देय् दथुइ ग्वाहालि कालबिलया गुंगू समझदारी पत्रय् ल्हाचिं तयेगु ज्या जूगु खः।(रासस)

‘नेपाः व नेपाःमिया जापानय् म्हसीका, १४ क्वःगु नेपाः फेस्टिबलपाखें नेपालय् पर्यटन प्रवद्र्धन’ धाःगु मू नारा ज्वनां थनिनिसें जापानय् १४ क्वःगु ‘नेपाल फेस्टिवल’ न्ह्याःगु दु।

गैरआवसीय नेपाली सङ्घ (एनआरएनए) जापान, जापानया निंतिं नेपाली राजदुतावास व नेपाल आदिवासी जनजाति महासङ्घ जापानया मंकाः ग्वसालय् कन्हय् तक टोकियोया नाकानो सिकिनोमोरी पार्कय् न्ह्याइगु थुगु महोत्सवपाखें नेपाःया कला व तजिलजियात हलिमयय् म्हसीका बिइगु व देय् पिने वनाच्वंपिं नेपाःमि तय्त छधिइयासें नेपाःमितय्गु आत्मियता अनुभूति याकेत ग्वहालि जुइ धकाः धाःगु दु।

जापानय् नेपाः व नेपाःमि तय्गु म्हसीका बिइगु नेपाली हाउस नांया बहुसांस्कृतिक केन्द्रया निर्माणया निंतिं ग्वहालि यायेत थ्व फेस्टिवलया ग्वसाः ग्वःगु एनआरएनए जापानं धाःगु दु। फेस्टिवलया आर्थिक संकलन अभियान, स्टल बुकिङ, स्वयम्सेवक टिम व थी थी वेशभूषा, मौलिक कला संस्कृति, नेपाःया तजिलजिया प्रतिभा क्यनीगु एनआरएनए जापानया नायः नापं फेस्टिवलया मू ग्वसाः खलः समितिया कजि नवीन निउरें धयादीगु दु।

धार्मिक व सामाजिक सद्भावलिसेंया नेपाल हाउस दयेकेगु मू योजनानापं थुगु दँया ‘नेपाल फेस्टिवल’ न्यायेकेत्यंगु एनआरएनए जापानया न्वकू कृष्ण शर्मा गैरें धयादीगु दु। महोत्सवय् नेपाःया नँसा व मेगु बनेज्याया निंतिं छ्यलेगु कथं ४० गू स्टल तयातःगु दु। महोत्सवय् नेपाःया मौलिक कला तजिलजि, सामाजिक रीतिरिवाज, पर्यटकीय थाय्लिसें कःघाःगु थी थी वृत्तचित्र व फोटो प्रदर्शनी याइगु एनआरएनए प्रवक्ता खगराज गौतमं धयादीगु दु।

एनआरएन जापानं सन् २०१२ निसें जापानय् थजाःगु महोत्सव न्ह्याकाः वयाच्वंगु दु।(रासस)

नेपाल भाषाया मनोरन्जन व कलाख्यलय् छम्ह धिसिलाम्ह कोरियोग्राफर या नापनापं कलाकार व निर्देशक आराध्यलक्ष्मी खडगीया स्वपू म्येया म्युजिक भिडियो पितब्बज्या जूगु दु।

म्युजिक भिडियो मध्ये निपु “ छंगु मतिना” व “पानबति मैंचा” य् आराध्य लक्ष्मीलिसे हिरो जुया खनेदयेक वःगु दु । प्रीमियर जूगु स्वपुतिं म्येया कोरियोग्राफर आराध्यलक्ष्मी हे खःसा “लिक्क लिक्क” छपूया बाहेक निपू म्येया म्युजिक भिडियो या निर्देशन नं आराध्य याःगु खः।

छपू म्येया निर्देशन राजेशमान सिं याःगु खः। प्रीमियर ज्याझ्वलय् नेपाःया नांजाम्ह कलाकार सरकारं दीर्घ साधनापाखें सम्मानित चैत्यदेवी सिं मूपाहाँ कथं झायादीगु खः। ज्याझ्वलय् पाहाँ कथं राजभाई जकःमि, जुजुकाजि रन्जित, नारायणदेवी प्रधान, हिसिला महर्जनया नापं प्रकाश सायमि व नेपालभाषाया न्हापाम्ह निर्देशक विजयरत्न असंबरे झायादीगु खः।

मतिना इन्टरटेंटमेंटया ग्वसालय् जूगु प्रीमियर ज्याझ्वः विजयमान सिंया सभाध्यक्षताय् जूगु खःसा सुर्जलक्ष्मी खडगीं लसकुस यानादीगु खः। प्रीमियर जूगु निपू म्येय् निशा देशारया सः थ्वयाच्वंगु दुसाः छपू म्येय् वयात राजकुमार मानन्धरं साथ बियातःगु दु। प्रिमियर जूगु मध्ये छपू म्येया धाःसा डबल शाक्य व रत्नशोभा महर्जनं हालादीगु “लिक्क लिक्क” बोलया म्य खः।

थ्व स्वपू मध्ये छपू “छंगु मतिना” मतिना इन्टरटेंटमेंटया युट्युबय् अपलोड जुइ धुंकुगु दु सा मेगु म्ये नं वहे युट्युबय् पिदनिगु ग्वसाः दु।