निर्देशक तुलसी घिमिरें संकिपा ‘पहाड’या थनिंनिसें छायाङ्कन न्ह्याकादीगु दु। गोरखा दरबारय् पुजा याये धुंका मदनकृष्ण श्रेष्ठ, अरुण क्षेत्री व न्हूम्ह अभिनेत्री पञ्चमी घिमिरेया दृश्ययात तयाः छायाङ्कन न्ह्याकूगु खः।

निर्देशक घिमिरें युवा जनशक्ति विदेशय् पलायन जुयाः खाली जूगु पहाड व थुकिं हइगु सामाजिक व आर्थिक समस्या यात बाखं दूगु संकिपाया छायांकन गोरखा लिक्क २५ न्हु तक जुइ। वय्कलं धयादिल, “थौंकन्हय्या समाजया खायुगु यथार्थयात स्वकुमितय् न्ह्यःने थ्यंकीगु बाखं तयार जूगु दु।

मानव बसोबास मदये धुंकूगु उच्च पहाडया बाखँ कःघाःगु संकिपाय् न्हुगु व पुलांगु निगूलिं पुस्तालिसे ज्या याये खनाः तसकं लय्तानागु दु। हाकनं संकिपा निर्देशनय् लिहाँ वयाबलय् बिस्कं ऊर्जा वःगु दु।” थुगु संकिपापाखें निर्देशक घिमिरेया म्ह्याय् पञ्चमी घिमिरें अभिनयया सुरु यानादीगु दु।

संकिपा ख्यलय् म्ह्याय् दुहाँवःगुलिं थःत तसकं लसता जूगु निर्देशक घिमिरें कनादिल। “थःगु हे पेसाय् सन्तान दुहाँ वइबलय् वा विश्वास याइबलय्या लसता क्यने हे फइमखु। मेमेगु पेसाय् थें जिपिं संकिपाकःमितय्गु नं थःगु म्हगसयात सन्तान तय्सं न्ह्यःने यंकूगु स्वये मास्तिवः”, निर्देशक घिमिरें धयादिल।

थुगु संकिपाय् नागरिकतय्गु दायित्व व देय्या आवश्यकतायात चित्रण यानातःगु दु। ओजस्वी केसी निर्माता जुयादीगु थुगु सकिंपायात प्रमोद प्रधानं छायाङ्कन याना च्वनादीगु दु। संकिपाय् विपीन कार्की, सुनिल थापालिसेंया प्याखँम्व तय्सं अभिनय याइ। थुकी रञ्जित गजमेरं सङ्गीत तयादीगु दु।

यल महानगरपालिका १६ वडा कलाकार समितिया ग्वसालय् चिहाकःगु वृत्तचित्र व चिहाकःगु बाखं संकिपा दयेकेगु तालिम ‘द आर्ट अफ भिज्युअल स्टोरी टेलिङ’ ज्याझ्वः जुइत्यःगुु दु।

थुगु तालिम थ्वहे वइगु माघ १६ गतेनिसें १८ गतेतक स्वन्हुयंकं सुथसिया ८ ताः ईनिसें सनिलया ४ ता ईतक न्ह्याइगु जानकारी ग्वसाः खलः यल महानगरपालिका १६ वडा कलाकार समितिं ब्यूगु दु।

थुगु तालिमय् सहभागी जुइगु नितिं द्वःछि तका दुतिना फी कथं तयातःगु दुसा थुगु तालिम ज्याझ्वः रिभाइभ लेजर पार्क महालक्ष्मीस्थान, लगंख्यलय् जुइगु जानकारी नं ग्वसाः खलकं ब्यूगु दु।

नेपाली सांङ्गीतिक ख्यलय् ‘कोकिला, किन्नरी’ लिसेंया उपाधि कयादीम्ह म्ये हालामि तरादेवीयात लुमंकुसें ‘लुमन्तिइ तारादेवी’ सांस्कृतिक सनिल व हना ज्याझ्वः जूगु दु। बुधबाः जमःया सांस्कृतिक संस्थानय् तारादेवी फाउन्डेसनपाखें वय्कःया १९ क्वःगु लुमन्ति दिं लसताय् लाकाः ग्वसाः ग्वःगु ज्याझ्वलय् वय्कःया लोकंह्वाःगु म्येपाखें वय्कःयात लुमंकूगु दु।

फाउन्डेसनया संरक्षक रवि श्रेष्ठं थः मां तारादेवीं नेपाःया सांङ्गीतिक ख्यलय् यानादीगु योगदानयात लुमंकेगु, सहलह ब्याकेगु यायेगु नापनापं थ्वः हे ख्यलय् स्वानाः च्वंपिंत हनेगु तातुनां संस्था (फाउन्डेसन) नीस्वनाःगु धयादिल। वय्कलं धयादिल, “फाउन्डेसनपाखें मां (तारादेवी) या लुमन्तिइ न्हि लाकाः यानाःगु ज्याझ्वलं सङ्गीतकःमियात ग्वाहाली जुइमाः धयागु तायेका जिमिसं हनावयाच्वनाःगु खः। वय्कःया म्हगसःयात पूवंकेत फाउन्डेसनं ज्या यानाः तुं च्वनाःगु दु।” थुगु ज्याझ्वलय् लय्चिनामिं लिसें म्येच्वमि सिके रसाइली, तीर्थकुमारी थापालिसेंयात म्हःतिं नीन्याद्वः द्यबाः नापं हंगु खः।

च्यादँ दुबलेनिसें म्ये हालादीम्ह तारादेवीं सः बियादीगु ‘शुभकामना भरि’, ‘उकाली ओरालीहरुमा’, ‘साँघुरी बारी नि हो”, ‘त्यो धारा पानी’, ‘कालीपारि दाइ कति राम्रो’ लिसेंया म्येत थौंया पुस्ताय्तकं लोकं ह्वानाच्वंगु दनि। तारदेवीं च्यादँ दुबले निसें म्ये हालादीगु खः।

वय्कलं चाँदनी शाह, माधवप्रसाद घिमिरे लिसें यक्वःहे म्ये च्वमि व लय्चिनामिं नातिकाजीलिसेंया सङ्गीत संयोजनय् थःगु जीवंकाःछिया दुने प्यद्वःसिबें अप्वः म्ये हालादीगु दु। तारादेवीं २०६२ सालय् थ्व संसार त्वःता झायेधुंकाः वय्कःया साङ्गीतिक कृति, योगदान व यात्रायात म्वाकातयेगु तातुनां ‘तारादेवी स्मृति फाउन्डेसन’ नीस्वंगु ज्याझ्वलय् कंगु खः।

देय्या पर्यटन प्रवद्र्धन यायेगु तातुनाः नेपाः व इन्डोनेशिया सांस्कृतिक कालबिल ज्याझ्वः जुल। पर्यटन व्यवसायी मिङ्मादोर्जे शेर्पाया न्ह्यलुवाय् द लास्ट फ्रन्टायर्स टे«किङ कम्पनीया ग्वसालय् व नेपाल पर्यटन बोर्ड नापं एएमएस म्युजिक एण्ड इन्टरटेनमेन्ट प्रालिया मंकाः ब्वतिइ आइतबाः बहनी थन ग्वसाः ग्वःगु ज्याझ्वलय् नेपाः व इन्डोनेशियाया प्याखंम्वःतय्सं सांस्कृतिक ब्वज्याः याःगु दु।

ज्याझ्वःया निंतिं इन्डोनेशियाया जेन्ट्र लेस्तारी बुदाया फाउन्डेसनया १३ म्हेस्या पुचः छुं दिं न्ह्यः थन थ्यंकवःगु खः। ग्वसाः खलःया संस्थापक लिसें प्रबन्ध निर्देशक मिङ्मादोर्जे शेर्पां ज्याझ्वलं निगू देय् दथुइया तजिलजि कालबिल जुइगु नापनापं पर्यटन ख्यःया विकासय् ग्वाहालि जुइगु धयादिल। “थुगु सांस्कृतिक कालबिल ज्याझ्वलं छगू देय् नं मेगू देय्या तजिलजि थुइका कायेगु ह्वःताः चूलाका ब्यूगु दु, कन्हेया न्हि झी निगूलिं देय्या पर्यटन ख्यलय् नं मंकाः ज्या यायेफइ”, वय्कलं धयादिल, “इन्डोनेशियाय् च्वंपिं २० लखसिबें अप्वः बौद्ध धर्मावलम्बीतय्त झीसं नेपाः हये फइ।”

उगु ज्याझ्वलय् जेन्ट्रा लेस्तारी बुदाँया फाउन्डेसनया मू दुजः नापं म्ये हालामि रत्ना देवी कार्तिकां इन्डोनेशियाया लोकंह्वाःगु नापनापं छुं पप म्ये नं हालादिल। “जेन्ट्रा लेस्तारी बुदाया फाउन्डेसनय् इन्डोनेशियाया ३८ प्रान्तय् १० द्वः सिबें अप्वः दुजःत स्वानाच्वंंंंंंंगु दु, थुकिया मू आज्जु इन्डोनेशियाया कला व तजिलजि प्रवद्र्धन खः”, म्ये हालामि कार्तिकां धयादिल, “कला, तजिलजि व निगू देय्या पर्यटन प्रवद्र्धनया निंतिं नेपाः वयेखनाः तसकं लय्ताना ।

”ज्याझ्वलय् इन्डोनेसिया पाखें लानिस्या चान्जी बार्डेल स्टेयाज, सयिफा नुरुल अज्जुरा व डिजिक्रा औरेलिया देत्रियानीलिसें नं नेतृत्व याःगु खः। नेपाःपाखें देविका बन्दना, राजेश महर्जन, खुसी कुलुङ राईलिसें म्येहालामि तय्सं नं थःथःगु म्ये न्ह्यब्वयादीगु खःसा प्याखंम्वः कमल राईया पुचलं थी थी लोकभाकाय् प्याखं ल्हूगु खः ।

थूगु ज्याझ्वलय् नेपाल पर्यटन बोर्डया प्रमुख कार्यकारी अधिकृत (सिइओ) दीपकराज जोशी, भारतीय ज्योतिष एट्लान्टा कश्यपया नापनापं पर्यटनकःमि व कलाकारपिंसं ब्वति काःगु खः।

बलिउड अभिनेता सैफ अली खानयात छुरा प्रहारं घाःपाः जूगु दु। खानयात हतियारं आक्रमण जुगुलि खुथाय् घाःपाः जुगु दु धका चिकित्सकं धाःगु दु।

खानयात निगु थासय् तसकं घाः जुगु दु सा छगु दुगक्वय् नाप घाः जुगु दु धका धाःगु दु। खानयात बान्द्रास्थित ’सतगुरु शरण’ भवनया १२ गु तल्लाय् थःगु निवासय् सुथय् २ः४५ बजेति ज्या याइम्ह मिसापि दथुइ ल्वापू जुयाच्वपिन्त छुटे यायेगु झ्वलय् घाःपाः जुगु खः।

खानया अवस्था खतरामुक्त जुगु आः स्वास्थ्यय् सुधार जुया वयाच्वंगु दु धका धयादीगु दु। लीलावती अस्पतालया चिफ अपरेटिङ अफिसर (सीओओ) डा. निरज उत्तमानीया कथं खानयात बिहीवाः सुथय् ३ बजे अस्पताल यकूगु खः।