चलचित्र विकास बोर्डं अभिनेत्री चैत्यदेवी सिंहयात सम्मान याःगु दु। म्हिगः बोर्डया ग्वसालय् जूगु राष्ट्रिय चलचित्र पुरस्कार व सम्मान समारोह ज्याझ्वलय् राष्ट्रपति रामचन्द्र पौडेलं सिंहयात ३ लख ७५ हजार नगद सिरपाः बियाः सम्मान यानादीगु खः।

सिंहं नेपालय् दकलय् न्हापां दयेकूगु संकिपा ‘आमा’पाखें अभिनय यायेगु सुरु याःगु खः। अथे हे स्वस्तिमा खड्कायात उत्कृष्ट अभिनेत्री, उत्कृष्ट कलाकार विपिन कार्की व उत्कृष्ट निर्देशक निश्चल बस्नेत घोषणा याःगु खः। अज्याःगु हे विशेष योगदानया सम्मान प्राविधिक मदुम्ह सुरेन्द्रमान श्रेष्ठयात नं लःल्हाःगु दु। ज्याझ्वलय् वय्कःया तिरिमय्जु अनिता तुलाधरं सम्मान कयादीगु खः।

हास्य कलाकार तैयर शाह, संकिपा निर्माता केशवप्रसाद रायमाझी, अभिनेत्री विद्या कार्की, द्वन्द्व निर्देशक नारायण प्रधान, निर्माता नरेन्द्र महर्जन, नन्दकिशोर प्रसाद श्रीवास्तव, भोजबहादुर गुरुङ, संगीत संयोजक अमूल कार्की ढली, संकिपा निर्माता श्रुद्ध तामाङ, अभिनेत्री सविता गुरुङपिन्त लःल्हाःगु खः।

लक्ष्मण सुवेदीं निर्माण याःगु ‘सती देवी’, लिम्बु भाषां निर्माण जूगु ‘सुगुप’ व गुरुङ भाषां निर्माण जूगु ‘मार्कली’यात विशेष संकिपा सिरपाः २०८० लःल्हाःगु खः। “बुलाकी“ संकिपां उत्कृष्ट संकिपा, उत्कृष्ट लेखन, बाखं व पटकथाया लिसें उत्कृष्ट छायांकनया सिरपाः त्याकूगु खः। लिम्बू भाषां दयेकूगु लोजिमां आदिवासी जनजातिया मातृभाषाया निंतिं उत्कृष्ट संकिपाया सिरपाः त्याकूगु खः।

निर्णायक समिति प्रोत्साहन पुरस्कार ‘तुलकी’पाखें स्वस्तिमा कार्की व ‘जरी’पाखें रामबाबु गुरुङयात लःल्हाःगु खः।

कलेज अफ जर्नालिजम एण्ड मास कम्युनिकेशन व विलक्षण क्रियसनया ग्वसालय् ‘झिंस्वक्वःगू नेपाः अफ्रिका संकिपा महोत्सव २०२५’ माघया न्हापांगु वाय् येँय् जुइत्यंगु दु।

दिं घोषणा यासांनिसेंं ब्वति काये मंदुपिंत थःगु संकिपा दर्ताया निंतिं इनाप यानाःगु महोत्सवया निर्देशक डब्बु क्षेत्रीं धयादिल। “नेपाः–अफ्रिकाया तजिलजि कालबिल यायेगु आज्जुं महोत्सव न्ह्याकेत्यनाःगु खः, महोत्सवं झीत अफ्रिका म्हसिकेत अपुइ। थुगुसि जिमिसं अफ्रिकानापं मेगु देय्या संकिपात नं दुथ्याये फयेमाः धकाः अन्तर्राष्ट्रिय विधा स्वानागु दु। महोत्सवय् नेपाःया संकिपा, चि संकिपा व वृत्तचित्र नं क्यनेगु जुइ”, निर्देशक क्षेत्रीं धयादिल।

वय्कलं माघ न्हापांगु वाया निंतिं न्हि याकनं हे क्वछीगु जुइ धकाः धयादिसें नेपाःया संकिपाकःमि तय्त दर्ताया निंतिं आह्वान यानाःगु धयादिल। थ्वसिबें न्ह्यःया महोत्सवय् नेपाःया नापं अन्तर्राष्ट्रिय संकिपा कथं अफ्रिकी संकिपायात जक स्वायेगु याना च्वंगुलिइ थुगुसि धाःसा अफ्रिका बाहेकंया संकिपा नं महोत्सवय् अन्तर्राष्ट्रिय विधाकथं दुथ्याइ।

आः वइगु पुस १६ गतेतकया दुने संकिपा दर्ता याये फइगु व महोत्सवय् संकिपा क्यनेगु नापनापं संकिपा कार्यशाला, नेपाःया संकिपाया विषयय् अन्तरक्रियालिसें थीथी ज्याझ्वःत जुइगु आयोजकं धाःगु दु। (रासस)

छगू वेब–सिरिजया निर्माणय् नेटफ्ल्क्सि व शाहरुख खानया कम्पनी रेड चिल्लिज इन्टरटेनमेन्ट दथुइ सहकार्य जुइगु दु। सिरिजया निर्देशन शाहरुखया काय् आर्यनं याइगु जुगु दु।

थ्व वयागु निर्देशकीय डेब्यु जुइ। नेटफ्ल्क्सिं सोमवाः सिरिज घोषणा याइगु जुगु दु। सन् २०२५ य् रिलिज जुइगु अपेक्षा यानातःगु थुगु सिरिज रेड चिल्लिज व नेट्फिल्क्स दथुइ खुक्वःगु सहकार्य जुइ।

थ्व स्वया न्ह्यः निगु कम्पनी डार्लिङ्स, भक्षक, क्लास अफ ८३, बेताल, बार्ड अफ ब्लडय् सहकार्य याःगु खः।नेटफ्ल्क्सि इन्डियाया उपप्रमुख मोनिका शेरगिलं रेड चिल्लिजनाप हाकन सहकार्य याये दुगुलि तसकं लय्तागु दु धका धाःगु दु।

थ्व सिरिजयात आर्यन खानं निर्देशन याइ धका धाःगु खः।

किपूलिइ कर्मा व कुटुम्ब ‘ब्यान्डं’ नापं कन्सर्ट यायेत्यंगु दु।

‘छगू सलय् कीपू’ नामं थ्व हे वइगु मङ्सिर २२ गते कन्सर्ट जुइ। कुटुम्बनाप जानाः उगु ब्यान्डं किपूवासीतय्त सङ्गीतपाखें न्ह्याइपुकाबिइगु धकाः कर्मा ब्यान्डया म्ये हालामि सुरेन्द्रमान सिंहं धयादिगु दु।

आदि ग्रुप व एएसक्युया मंकाः ग्वसालय् किपूया ल्याबरोटरी ब्वनेकुथिइया लिबीइ कन्सर्ट न्ह्याकेत ग्वसाः ग्वःगु दु। कर्मा ब्यान्डया याकंचा न्ह्यब्बइगुलि कुटुम्बनाप जानाः बाःगू दर्जन म्ये न्ह्यब्वय् त्यंगु खः।

ज्याझ्वलय् थी थी जाति, समुदाय व विशेष याना नेवाः तजिलजि खनेदइगु प्याखं नापं झाँकी नं न्ह्यब्वइगु म्ये हालामि सिंहं धयादिगु दु। कन्सर्टपाखें मुनिगु दां किपू नगरपालिकाया सामाजिक सेवा व विकासया ज्याय् छ्यलिगु धाःगु दु।

अल्लु अर्जुन व रश्मिका मन्दानां अभिनयय् याःगु संकिपा ‘पुष्पा २ : द रुल’ या ट्रेलर सार्वजनिक याःगु दु।

सुकुमार निर्देशन याःगु थुगु संकिपाल ५ डिसेम्बर अर्थात् मङ्सिर २० गतेनिसे प्रदर्शन यायेगु तयारीइ दु। उगु संकिपाय् अल्लु अर्जुनलाई पुष्पराजय् भूमिकाय् खनेदइ।