अमेरिकाय् च्वनाच्वंम्ह संगीतकःमि नबीन महर्जन नेवाः मचां हालादीगु “ल्यायम्ह जुया वल जिला थौं” म्येया म्युजिक भिडियोया नापनापं नबीन महर्जन नेवाः मचा व संगीता शाक्यं हालादीगु “काल रे छं जिगु मन” ज्वम्ये नं पितब्वज्या जूगु दु।

थ्व पितब्वज्याय् नांजाम्ह सिनेकःमि व साहित्यकार प्रकाश सायमि मूपाहाँ कथं झायादीगु उगु ज्याझ्वलय् नेपालभाषाया न्हापांम्ह म्युजिक भिडियो निर्देेशक विजयरत्न असंबरे, संचारकःमि व सिनेकःमि रामकृष्ण खडगी व सिद्धि गुरु गणेश भजन मण्डलया गुरु बद्री महर्जन झायादीगु खः।

उगु म्युजिक भिडियोया निर्देशन बिके जल्मीं यानादीगु खः। बीन महर्जन नेवाः मचाया नापनापं रेणु महर्जन लगायत आपालं कलाकारपिन्सं अभिनय यानातःगु दु। थ्व म्ये हंगकंगय् च्वनाच्वंम्ह संगीतकःमि कृष्णभक्त महर्जनं च्वयादीगु व लसय् हनादीगु खः।

थ्व भिडियोया किपालुमि रबिन डंगोल मचा व सम्पादक म्येहालामि नबीन महर्जन नेवाः मचा थःम्हेसिनं हे यानादीगु खः।

जि नेवाः क्रियशनया ग्वसालय् जूगु पितब्वज्या बि के जल्मीया सभाध्यक्षताय् जूगु यगु ज्याझ्वलय् सिद्धि गणेश भजन मण्डलया श्यामकृष्ण महर्जनं लसकुस यानादीगु खः।

ड्रिम्स डिजिटल प्रा.लिं छगू ज्याझ्वः यासें स्रष्टापिन्त हंगु दु। साँस्कृतिक संस्थान राष्ट्रिय नाचघर जमलय् थीथी साँस्कृतिक न्ह्यब्वया न्ह्यब्वःगु ज्याझ्वलय् ड्रिम्स डिजिटलया नायः गायक व निर्देशक दिल कुमार विश्वकर्माया सभापतित्वय् जूगु खः ।

उप–सभामुख इन्दिरा रानाया मूपाहाँसुइ जूगु ज्याझ्वलय् नुगःखँ तयादिसें सरकारं याय्माःगु ज्या ड्रिम्स डिजिटल प्रा.लिं. याःगुलिं लसता प्वंकादिल । मे हालामि, संगितकार व एरेञ्जर इन्द्र जि.सी., सर्जक लिसें गायक ऋषि अधिकारी, संगितकार लिसें एरेञ्जर वि.वि अनुरागी, गीतकार राजकुमार बगर, गायिका लक्ष्मी न्यौपाने, नायक लिसें मोडल शितल के.सी.यात उगु ज्याझ्वलय् हंगु खः ।

थथे हे मे हालामिलिसें टिका बम्जन, मे हालामि नमराज ढुङ्गाना, सञ्चारकर्मी चन्द्रमणी गौतम, एरेञ्जर लिसें संगीतकार राजु खडका, मोडल लिसें निर्माता निशान रसाइली, सर्जक शम्भु कुवँर, मे हालामि जीवन परियार, मे हालामि रेशम कुमार विश्वकर्मा, मे हालामि लिसें एरेञ्जर जि.पुन (जित बहादुर पुर्जा पुन), मे हालामि, एरेञ्जर लिसें मोडल यमन खनाल, सर्जक लिसें मे हालामि विनोद ढकाल, भिडियो निर्देशक रेशम कुमार स्याउली तामाङ, संगितकार तथा ग्राफिक्स डिजाइनर शान्त शिशिर, मे हालामि हेमराज डाँगी, मे हालामि कृष्ण प्रसाइँ, मोडल दिपेश एस.के., मोडल दिप केसी, मे हालामि भिम मगर, मे च्वमि सिकन्दर ठाकुर, मे हालामि तथा सर्जक अभिनव चौहान, सञ्चारकर्मी शिवराम भण्डारी, दोहोरी सञ्चालक सविन श्रेष्ठ, कलाकार अनिता कार्की, गायक अभिनय यादव, छायाँकार तथा सम्पादक मदन राई, मे हालामि मिना वेल्बासे, मे हालामि नविन गुरुङ, गीतकार सन्दिप मगर, भिडियो सम्पादक सुविन दाहाल, समाजसेवी शिवदेव पाण्डे तथा चाँगुनारायण रोधि कल्व परिवार सम्मानित जूगु खः ।

गायक राजकुमार सशंकर व गायिका राधा गुरुङया सलय् ‘मदानी’ पिदन । जीवन विश्वकर्माया सः दुगु म्येय् संगीत राजकुमार शशंकरया हे दु।

म्येया भिडियोय् देवेन्द्र बब्लु व सनसाइन सञ्जुया अभिनय दु। विशाल घिमिरेया निर्देशन दुगु म्येया म्यूजिक भिडियो सम्पादन अमृत चापागाईं याःगु खः ।

थ्व स्वयां न्ह्यः सार्वजनिक जूगु राजकुमार सशंकरया ‘ए रमा’ बोलया म्ये तसकं चर्चित जूगु खः ।

बुद्ध जीवनीइ नां वइम्ह छम्ह विशिष्ट पात्र अंगुलीमालयात कयाः आपालं बाखं च्वयेधुंकल, नाटक दयेके धुंकल, प्याखं क्यनेधुंकल ।

तर उकियात चिन्तन यायेगु प्याःचाः धाःसा अझ नं तंगु मदुनि । थ्वहे झ्वलय् बज्र कला कुञ्जपाखें अंगुलिमालया बाखंयात हानं न्हूगु ढंगं न्ह्यब्वयेगु कुतः कथं न्हूगु नाटक न्ह्यब्वयेहःगु दु – ‘बोधिसत्व’ । टेकुया कौशी थियटरय् न्हिंन्हिं सनिलया ५ ताःइलय् न्ह्यब्वयाच्वंगु थ्व नाटकया बाखं अंगुलिमालया जीवनी खःसां उकियात प्रस्तुत यायेगु शैलीं धाःसा  दर्शकयात पूवंक हे मुग्ध याना बिउगु खनेदु। नाटकया मू कलाकार सुदनमान मुनिकारं गबलें भिंम्ह शिष्य, गबलें हिंस्रक अंगुलिमाल व गबलें बौद्ध भिक्षुया अभिनय यानाः नाटकया गुंगुलिं रस न्ह्यब्वःगु क्वातुसे च्वं ।

गुरुया भूमिकाय् दुम्ह युवाहाङ राईया अभिनय जीवन्त जू । मेपिं कलाकारतय्त खास भूमिका बियातःगु मदुसां सकस्यां थःथःगु थासय् न्याय याःगु खनेदु। थ्व बाखंयात नाट्य रुपान्तरण यानादीम्ह इँगिहोपो काँइच सुनुवारया मेहनत स्तुत्य जू । उलिमछि  न्यना तयेधुनागु बाखंयात नं वय्कलं हानं न्हूगु हे ढंगया नाटक दयेकाः न्ह्यब्वयादीगु दु। थुकिया च्वमि, परिकल्पनाकार व निर्देशक चन्द्रमान मुनिकार थ्व सजिव प्रस्तुतीकरणया लागिं सुभाय्या पात्र जुयादी ।

नाटकय् थनिं २६०० दँ न्ह्यःया भेषभुषायात विशेष ध्यान बियातःगु दुसा थुकियात नेवाः भाय् नं दुथ्याः नेवाः परिवेश दुने ग्वये हःगु ल्वःवनापु।झीसं तःदँ न्ह्यवंनिसें न्यना वयाच्वनागु पुलांगु हे बाखंयात नं कुशल नाट्यकर्मीतय्सं गथे न्हू ढंगं रोचक व सजिव जुइक न्ह्यब्वयेफु धइगु खँया छगू नमूना नं खः थ्व नाटक ।

थुगु पुचःपाखें भविष्यय् थुकथंया हे मेमेगु नं प्रस्तुतीया आशा यायेगु पाय्छि हे जुइ । नाटक पुस ४ गते तक क्यनीगु ग्वसाः दु।

किपूया नांजाःम्ह कासामि लिसें न्हूपुस्ताया संगीतकःमि भुवन महर्जनया च्वसाय्, लय् व सः दुथ्याःगु ‘छंगु ई’ बोलया नेपालभाषाया मचा म्येया म्यूजिक भिडियोया प्रिमियर शो जुइगु जूगु दु ।

किपूया पांगाय् च्वंगु कीर्तिपुर सिनेप्लेक्स हलय् थ्व हे वइगु बालाचःह्रे सोमवाः उगु म्यूजिक भिडियो प्रिमियर शो जुइगु जानकारी संगीतकःमि भुवन महर्जनं बियादीगु दु ।

बागमती प्रदेशया पर्यटन संस्कृति उद्योगलिसें सहकारी मन्त्री पुकार महर्जनया ल्हाःतं उलेज्या जुइगु मचा म्ये ‘छंगु ई’या म्यूजिक भिडियोकिपूया संचारकःमि ललेन्द्र शाक्यलिसें फिल्मी राइटर राज महर्जनं निर्देशन यानादीगु दुसा विके जल्मीं छायांकन यानादीगु दु ।

अथेहे, समाः स्वस्तिका श्रेष्ठं यानादीगु दु । उगु म्यूजिक भिडियो नेवाः सुपरस्टार रुपेन श्रेष्ठ थक्वाःमिलिसें न्हूप्रतिभा कलाकार सलिना प्रजापति व मचा कलाकार श्रवण महर्जन रोमियों मू भूमिका म्हितातःगु दुसा म्यूजिक भिडियो मेमेपिं कलाकारपिनिगु नं अभिनय दुथ्यानाच्वंगु दु ।

म्यूजिक भिडियोया सम्पादन किपूया संकिपाकःमि रजिन महर्जनं यानादीगु दु । जिवित जल्मीं संगीत संयोजन यानादीगु उगु म्युजिक भिडीयोलय् सुरेन्द्र श्रेष्ठं रिकर्डिष्ट व मिक्सिङ यानादीगु खः।