कमल पोखरीइ च्वंगुु भ्वाईस रेकड स्टुडियाय् माया प्रिती युगल म्ये संगीत मैदानया धरहर संगीतज्ञ दीप तुलाधरया संगीत एरेन्ज, रेकडर्, मिक्सीङ व माष्टरिङ यायेगु नापं न्हुगु नेपालभाषाया जोडी म्येया रेकर्डया ज्या ना क्वचाःगु दु।

उगु म्ये नेपाली संगीत ख्यःया लोकंह्वाम्ह गायिका रचना रिमालनाप कृष्ण श्रेष्ठया सलय् “मतिनाया नुगः केवय् रेकर्डिङ जूगु खः। गायिका रचना रिमालं न्हापागु नेपालभाषाया म्ये हाले खना थः तसकं लय्ता दु धका धयादीसे हाकनं रचनाकार जोशीया म्ये हालेगु जुइ धका वयकलं धयादीगु खः।

मुनासः ५० दँय् क्यंगु लसता छगु तःजिक ज्याझ्वः जूगु दु ।

मुनासःया नायः श्रीराम श्रेष्ठया सभाध्यक्षताय् जूगु ज्याझ्वःया उलेज्या यल महानगरपालिकाया मेयर चिरिबाबु महर्जन, येँ महानगरपालिका उपमेयर सुनिता डंगोल व किपू नगरपालिकाया कार्यवाहक मेयर सुनिता शाक्यपिन्स मंकाः कथं उलेज्या यानादीगु खः ।

उगु ज्याझ्वलय् ख्यालि जुजु लिसें मुनासःया छ्यांज्ये मदनकृष्ण श्रेष्ठं लसकुस यानाः न्ह्याःगु ज्याझ्वलय् जनगायक भृगुराम श्रेष्ठ, जनकवि दुर्गालाल श्रेष्ठ व साहित्यकार पुष्प चित्रकारयात विशेष सम्मान याःगु खः ।

अथेहे मुनासलं खुक्वः तक याःगु ख्यालः धेधेंबल्लाः कासाय् ब्वति काःपिं लेखक, निर्देशक व कलाकारपिंत लुमन्ति चिं लःल्हाःगु खः । ज्याझ्वलय् पाहांपिं हरिवंश आचार्य व प्रकाश साय्मिं भिन्तुना देछाःगु खः ।

यल महानगरपालिका १६ वडा कलाकार समितिं येँयापुन्हीया लसताय् लिटिल स्टार नेपालभाषा म्ये कासा याइगु जुइगु दु ।

थ्व हे वइगु आश्विन ११ गते विहिवाः यल लायकू पाटन म्यूजियमया भन्दा क्यबय् जुइ धका यल महानगरया १६ वडाध्यक्ष निर्मलरत्न शाक्यं धयादीगु दु।

उगु कासाय् न्हाप लाःगु म्येयात १ लाख, ल्यू लाःगु म्येयात ७५ हजार, लियांल्यू लाःगु म्येयात ५० हजार व हःपा सिरपा लाःगु म्येयात २५ हजार नगदनाप ट्रफि, दसिपौ बिइगु ज्याझ्वः दु धका वयकलं धयादीसें, सर्वोत्कृष्ट म्येहालामि, संगीतकार, रचनाकारयात २५ हजार नगद ट्रफि, दसिपौ लःल्हाइगु जुइ धका धयादीगु खः।

अथेहे कलाकार समितिया संयोजक सुरजवीर बज्राचार्यं कासाय् वरिष्ठ कलाकार ब्यक्तित्वयात ‘ललितरत्न’ उपाधि देछासें हनेगु खँ कनादिल । न्हापांगु खुसी थुगु हना वरिष्ठ संगीतकःमि मोहनप्रसाद जोशीयात लःल्हाःगु खः । कासामिपिन्सं थःगु म्येया सामान्य रेकर्ड फारामनापं दुथ्याकेमाः, थुगु हे म्येपाखें ल्यज्या जुयाः अडिशन राउण्डय् ब्वति काइगु जुइसा थुगु राउण्डय् ताःलाःपिं कासामिपिं जक लिटिल स्टार नेपालभाषा मये कासाय् दुथ्याइ ।

थुगु कासाय् कासाकिपिनिगु ग्वसाःकथं वाद्यवादकपिं तयेफइसा म्होतिं ४ म्ह वाद्यवादकपिं माःगु नं ग्वसाः खलकं धाःगु दु । थुगु कासाया प्रमुख प्रायोजक लिटिल स्टार रेकर्डस् खःसा पाटन म्यूजियम थुगु कासाया ग्वाहालिमि खः ।

थौंनिसें हे कासाय् ब्वतिया नितिं फाराम दुथ्याकेफइगु थुगु कासाय् ब्वतिया नितिं माःगु जानकारी व फाराम कलाकार समितिया फेसबुक पेजं कायेफइ जुगु दु । येँया पुन्हीया न्हनावंगु वनेगु धुकुगुलि थुगु संगीत सम्मेलनया लकस लित हयेगु तातुना जूगु थुगु कासा क्वचायेकाः नेवाः भ्वय् जुइगु नं ग्वसाः खलकं जानकारी ब्यूगु दु ।

नेपाः राष्ट्रया नामं स्थापना जूगु नेपाल सम्बतया प्रवर्तक शंखधर साख्वाःया नेपाःया न्हापांगु  एनिमेटेड संकिपा “शंखधरया बाखं” दयेकुगु निति बेलायतया यन्त्रकलापाखें निर्माण जूगु निगुगु एनिमेशन संकिपा “लाखे” या निपुगु म्ये “ जय जय लाखे” या पितब्वज्या जुःगु दु ।

वाङमय शताब्दि पुरुष सत्यमोहन जोशीं च्वयादीगु “मजिपा लाखे” प्याखंया लिधंसाय् दयेकुगु थुगु एनिमेटेड संकिपाया निर्देशक संयुक्त श्रेष्ठ खः । मदुम्ह गिरधरलाल मानन्धर, समिर महर्जन व अन्जना श्रेष्ठं निर्माण यानादीगु थ्व संकिपाया एनिमेशन संयुक्त श्रेष्ठ व नियुक्त श्रेष्ठं यानादीगु खः ।

खस नेपाली व नेपालभाषा समेत याना निगुलिं भाषां पिदंगु थुगु म्ये सतिश महर्जनं हालादीगु खः। संयुक्त श्रेष्ठं हे च्वयादीगु थुगु म्ये विश्व शाहीं लसय् हनादीगु खः । थ्व म्येया येँ महानगरपालिकाया उपमेयर सुनीता डंगोल व ख्यालिजुजु वरिष्ठ कलाकार मदनकृष्ण श्रेष्ठ पिन्सं यानादीगु खः ।

ज्याझ्वलय् उपमेयर डंगोलं एनिमेशन संकिपाया माध्यमं मस्त व ल्यायम्ह पुस्तायात भाषा, संस्कृतिया ज्ञान बिइफइगु खँ धासे महानगरपालिकापाखें अजागु एनिमेशन फिल्म दयेकेया निंतिं थुगुसिया बजेटय् छगू करोड तका दाँ फ्यानातःगु दु धका धयादिल । अले बजेट छ्यलेत नं इनाप यानादिल ।

पितब्वज्या ज्याझ्वलय् ख्यालिजुजु मदनकृष्ण श्रेष्ठ व पुलांम्ह कलाकार मदनदास श्रेष्ठया नापनापं नेपालभाषा एकेडेमीया उप कुलपति मल्ल के सुन्दर पिन्सं “लाखे” बारे नुगःखँ तयादीगु खः ।

संचाःकःमिया नाप निर्दशक ललेन्द्र शाक्यया निर्देशनय् किपू देय्या आजुद्यः बाघभैरबया महिमायात न्ह्यब्वयातगु “जय जय बाघभैरब” भजनया छगू म्युजिक भिडियो पिहावःगु दु।

उगु म्युजिक भिडियो सोमवाः किपूलय् च्वंगू किर्तिपुर सिनेप्लेक्सय् पितब्वज्या जुगु खः । उगु भजनय् बाघभैरबया महिमा म्ये नापं बाघभैरब उत्पत्ति बारे प्रचलित जनश्रुतिया किम्बदन्तियात नं बाल कलाकार पिनिगु पाखें न्ह्यब्वयातगु दु ।

भिडियोया निर्देशन ललेन्द्र शाक्य, छायाँकान व सम्पादन राजेश शाक्यं यानादीगु खः। बाघभैरब भजन मण्डलया दुजःपिनिगु सलय् थ्वया च्वंगु थ्व भजनयात संगीतकार हरिशरण सायमिं संगीत संयोजन व निर्माणया संयोजन याना तयार यानादीगु खः। सोमवाः जूगु थुगु भिडियो पितब्वज्या ज्याझ्वः जनकवि दुर्गालाल श्रेष्ठ मूपाहाँसुइ जूगु खःसा हरिशरण सायमिया सभाध्यक्षताय् जूगु खः।

मूपाहाँ श्रेष्ठं त्वाःदेवाय् मत च्याका ज्याझ्वःया उलेज्या यानादीगु खः। ज्याझ्वलय् किर्तिपुर नगरपालिकाया उपमेयर शुभलक्ष्मी शाक्य, नेपालभाषाया न्हापांम्ह म्युजिक भिडियो निर्देशक विजयरत्न असंबरे व बाघभैरब भजन मण्डलया गुरु जोगमान महर्जन लगायत बिशेष पाहाँ कथं झायादिसे बाघभैरब व म्युजिक भिडियो बारे नुगःखँ तयादीगु खः।