नेपालभाषाया संकिपा तिबः (द सपोर्ट)या पोस्टर छगू ज्याझ्वःया दथुइ सार्वजनिक याःगु दु । याकनं प्रदर्शनय् वयेत्यंगु संकिपाया पोस्टरलिसें ब्यानर सार्वजनिक याःगु खः ।

सामाजिक परिवेशया घटनाया लिधंसाय् निर्माण यानातःगु संकिपा सरजु रंजित व समिता रंजितं निर्माण यानादीगु खः । ओमशंकर श्रेष्ठया बाखं व सुशील राजोपाध्यायया पटकथा संवाद दुथ्यानाच्वंगु संकिपाया निर्देशन रवि साय्मिं व छाँयाकन अमर चित्रकारं यानादीगु खः ।

ल्याय्म्ह पुस्तात विदेश वनेगु क्रम अप्वयाच्वंगु बाखनय् निर्माण जूगु संकिपाय् सुशील राजोपाध्याय, आशाकाजी थकु, पुष्करभक्त माथेमा, संघरत्न शाक्य, सरस्वति मानन्धर, सुनिता श्रेष्ठ ठाकुर, मैयाँ मुनिकार महर्जन, श्रृष्टि महर्जन, कृष्णभक्त महर्जन लिसें आपालं कलाकारया अभिनय दुथ्यानाच्वंगु दु ।

संकिपाया निंतिं संघरत्न शाक्य व राजेन्द्र महर्जनं च्वयादीगु म्येँय् भूपेन्द्र वज्राचार्य व शिव शाहीं लसय् हनादीगु खःसा सतिश महर्जन, दिपा महर्जन व सरजु रंजितं सः बियादीगु दु । रवि महर्जन व रुसिल अमात्य सहायक निर्देशक भूमिका म्हितादीगु संकिपाया वाइल्ड बुल्स प्रोडक्सन पोष्ट प्रोडक्सनया जिम्मा कयातःगु दु ।

संविधान दिवसया लसताय् नेपाल सरकार चलचित्र विकास बोर्डया ग्वसालय् नेपाःया झिम्ह संकिपाकःमिपिन्त सांस्कृतिक रूपान्तरण सिरपा देछागु दु ।

ज्याझ्वःया मूपाहाँ सञ्चार लिसे सूचना प्रविधि मन्त्री रेखा शर्मां संकिपाया माध्यमं सांस्कृतिक रूपान्तरण ज्याय् ज्वःमदुगु योगदान बिउपिं झिम्हेसित सांस्कृतिक रूपान्तरण सिरपा २०८० म्हिगः मंगलवाः छगू ज्याझ्वःया दथुइ लःल्हागु खः । मंगलवाः बिकास बोर्डया सभाकक्षय् जूगु उगु ज्याझ्वलय् ख्यालिजुजु मदनकृष्ण श्रेष्ठ व सिने पत्रकारिता ख्यःया न्ह्यलुवा विजयरत्न तुलाधर नापं झिम्हेसित सांस्कृतिक रूपान्तरण पुरस्कार, २०८० लःल्हाःगु खः ।

बोर्डया नायः नांजाम्ह कलाकार भुवन के सिया सभाध्यक्षताय् जूगु उगु ज्याझ्वलय् अभिनेत्री मिथिला शर्मा, चलचित्र निर्देेशक नापं बोर्डया निवर्तमान अध्यक्ष दयाराम दहाल, अभिनेता मुकुन्द किशोर भट्टराई, निर्माता श्याम सापकोटा, अभिनेत्री लिसे निर्माता निर्देशक निम्ह रेखा थापा व दिपाश्री निरौला, निर्देशक मनोज पण्डित व निर्देशक मीनबहादुर भामपिन्त म्हतिं नीन्याद्वः, नीन्याद्वः तका नापं दसिपौ न लःल्हागु खः ।

सामाजिक व शासकीय रूपान्तरणय् ज्वःमदुगु योगदान दुगु संस्था व सिनेकःमिपिनिगु ज्याःया कदर यासे थुगुसिइ निसें थथे सिरपा बिइगु ग्वसाः न्ह्याकागु खँ  अध्यक्ष केसीं धयादीगु खः।

बोर्डया सदस्य सचिव विशाल सापकोटां लसकुस न्वचु तयादीगु उगु ज्याझ्वलय् दयाराम दाहाल व मदनकृष्ण श्रेष्ठं नं नुगःखँ तयादीगु खः सा चलचित्र विकाश बोर्डया चलचित्रकःमि कल्याणकोष सञ्चालन समितियात नं थ्व सिरपा लःल्हागु खः ।

समयबजि नांयागु टिभि ज्याझ्वः न्ह्याका लोकंह्वाम्ह कलाकार सुरेन्द्र मानन्धरया निर्देशनय् चय्पू मल्याक म्युजिक भिडियो पिहाँवये धुंकुगु दु। मानन्धरया निर्देशनय् आः मेगु न्हुगु म्युजिक भिडियो “स्वां छफ्वः” पिहावःगु दु ।

पूर्व राज्यमन्त्री रामबीर मानन्धर मूपाहाँ कथं झायादीगु उगु ज्याझ्वलय् नेपालभाषाया न्हापांम्ह म्युजिक भिडियो निर्देेशक विजयरत्न असंबरे, नेवाः पत्रकार राष्ट्रिय दबूया नायः नृपेन्द्र लाल श्रेष्ठ व पेजथ्री पत्रिकाया सम्पादक दर्शनवीर शाक्य विशेष पाहाँ कथं झायादीगु खः।

उगु म्युजिक भिडियो वयकःपिन्सं मंका कथं पितब्वज्या यानादीगु खः । सुरेन्द्र मानन्धर व रबिता बके श्रेष्ठया मेनरोल दुगु उगु म्येय् रेवन्त लाल श्रेष्ठ, सुरेश मानन्धर, ध्रुब कपाली, लक्ष्मी श्रेष्ठ, रोजिता साहुखलःपिन्स अभिनय यानादीगु खः। ओमशंकर श्रेष्ठं च्वयादीगु उगु म्ये प्रविन चन्द्र बज्राचार्यं हालादीगु खःसा वयकलं हे लसय् हनादीगु खः।

दिपेश सिंहया म्युजिक अरेन्ज यानादिगु खः। थ्व भिडियोया किपालुमि बालकुमार मगर व सम्पादक इन्द्र मानन्धरं यानादीगु खः।

नेपालभाषा व खस नेपाली भाषा संकिपा ख्यःया बरिष्ठ निर्देशक, कलाकार लिसें च्वमि पवन जोशीया च्वसाय् व निर्देशनय् नेपालभाषाया न्हूगु म्ये ‘मोहनी मन्त्र’ म्यूजिक भिडियो पिदनीगु जूगु दु ।

थुगु म्येया सुटिङ ज्याझ्वः सोमवाः यलया थसि (सिद्धिपुर)या थीथी सांस्कृतिक लागाय् क्वचाःगु खः । ‘मोहनी मन्त्र’ म्येयात नांजाःम्ह संगीतकःमि अनिल तुलाधरं लसय् हनादीगु दुसा तुलाधरं हे संगीत संयोजन यानादीगु दु। अथेहे, थुगु म्ये एलन शाहीं सः बियादीगु दुसा मिक्सिङ व माष्टरिङ विजय मास्कें यानादीगु दु ।

‘मोहनी मन्त्र’ म्येया म्यूजिक भिडियो सम्पदा संरक्षण संस्था सानो पाईलां निर्माण याःगु खः। थुगु म्येया म्यूजिक भिडियो दर्जनौं कलाकारपिन्सं अभिनय यानातःगु दुसा इन्दु ज्यापुनी व प्रविण अमात्यं थुगु म्यूजिक भिडियोय् मू भूमिका म्हितादीगु दु ।

म्यूजिक भिडियो निर्माणया नितिं प्राविधिकपाखें प्रकाश निराजन कार्की, समाः व कोरियोग्राफी मीरा डंगोल, असिस्टेन्ट क्यामेरा पर्सन अमृत चौहान, क्यामेरा पर्सन निर्जन महत, सम्पादन सुरज भोछिभोय व निर्देशन पवन जोशीं यानादीगु दु ।

‘मोहनी मन्त्र’ म्येया म्यूजिक भिडियो थुगु हे वाः दुने यूट्युब च्यानलपाखें सार्वजनिक जुइगु जानकारी म्यूजिक भिडियो निर्माण संस्था सानो पाईलाया मूछ्याञ्जे सुदर्शन महर्जनं जानकारी बियादीगु दुसा थुगु म्ये संसार्स अनलाइन टिभीया अफिसियल यूट्युब च्यानलपाखें पिदनीगु जूगु दु ।

जुजुभाइ तुलाधर नांयाम्ह ज्याथःम्ह कलाकारं म्येहाला ख्यलय् पलाः न्ह्याकुगु खःसा भुपेन्द्र मान शाक्य नांयाम्ह छम्ह मेम्ह ज्याथःम्ह कलाकार म्येहालामि जुया पिदंवःगु “म्हगसय् वया” धाःगु म्येया म्युजिक भिडियो पिहावःगु दु।

सुन्धराया सिटिसि मलय् जूगु ज्याझ्वलय् ईन्जिनियर गायक भुपेन्द्रमान शाक्य सभाध्यक्षताय् जूगु उगु नेपालभाषाया म्ये “म्हगसय् वयाः“ या म्युजिक भिडियोया पितब्वज्याय् ई.बाल सुन्दर मल्ल मू पाहाँ कथं झायादीगु खः । दर्शन वीर शाक्यं च्वयादीगु उगु म्येयात सुरेन्द्र श्रेष्ठं लसय् हंसे संगीत एरेन्ज नं यानादीगु खःसा सोलो आलाप रत्नशोभा महर्जनं साथ बियातःगु दु ।

म्युजिक भिडियो दुने गायक थःहे व वयकया जहान अन्नपूर्ण तुलाधर शाक्यया नापनापं अमोघवीर बज्राचार्य व नेपालभाषाया म्युजिक भिडियोख्यलय् न्हापां खुशीइ अभिनय याम्ह कलाकार सुमि मानन्धर व बाल कलाकार संकिपा श्रेष्ठ व सहायक कलाकार उजय शाही पिन्सं अभिनय याःगु खः । अन्नपूर्ण तुलाधर शाक्यं निर्माण यानादीगु म्युजिक भिडियोया निर्देशन बिस्वास बज्राचार्यं यानादीगु खः।

सहायक निर्देशक मन्जिल शाक्य, सिनेमटोग्राफी÷एडिट÷कलर आकृष्ट शाक्य, मेकअप स्वेता शाक्य, भिएफएक्स बिजनराज बज्राचार्य, कोरियोग्राफी रोहिया महर्जनं यानादीगु थुकिया प्रोजेक्ट म्यानेजर  उजय शाही ख ।

उगु म्युजिक भिडियोयात कया म्येहालामि शाक्य, म्येच्वमि शाक्य, संगीतकार श्रेष्ठया लिसेलिसें सिने पत्रकार विजयरत्न असंबरे, सन्चारकःमि व संकिपा निर्देेशक रामकृष्ण खडगी, सुरेन्द्र तुलाधर , संकिपा निर्देशक रवि सायमिपिन्सं नुगःखँ तयादीगु खः ।