नेपाली संकिपा ‘उस्ताज जी’या ट्रेलर व उगु संकिपाय् दुथ्याःगु ‘हेर स्वर्ग झैं लाग्यो’ म्ये शनिवाः सार्वजनिक याःगु दु।

उगु संकिपाय् चर्चित संगीत संयोजक राजु खड्कां निर्देशन यानादीगु खः। संकिपाय् म्ये हालामि रेशम कुमार विश्वकर्माया मू भूमिका दु।

उगु संकिपाया निर्माता नं विश्वकर्मा हे खः। संकिपाया ट्रेलर वंगु जेष्ठ २६ गते हे सार्वजनिक याःगु खःसा उगु संकिपाय् दुथ्याःगु म्ये ‘हेर स्वर्ग झैं लाग्यो’ हाईलाईटस नेपालपाखें शनिवाः सार्वजनिक याःगु खः ।

उगु म्ये संगीत व सः गायक उत्सव सुवा लामाया दुगु खः। मिसा सः तारा शिरीष मगरया दुगु म्येय् संगीत संयोजन राजु खड्कां यानादीगु दु। रामचन्द्र राईया छायांकन व देव दोर्जे लामाया कोरियोग्राफी दुगु म्येय् नायक रेशम व नायिका लक्ष्मी तिम्सिनां मू भूमिका दु।

संकिपाय् बाखं सन्दिप स्याम्चेन तामाङ्गया दु सा पटकथा व संवाद राजु खड्का, कला निर्देशन देव दोर्जे लामाया दु।

भारतीय फिल्म प्रदर्शन मयाकेगु येँ महानगरपालिकाया मेयर बालेन शाह न याःगु दु।

‘आदिपुरुष’ विवाद नाप मेमेगु भारतीय फिल्मया प्रदर्शन मयाकेगु जुगुलि नेपाल चलचित्र संघ छथाय् च्वंगु दु। संघया पदाधिकारीपि थौं सोमवाः सुथय् निसे सहलह याःग दु।

संघया उपाध्यक्ष गोपाल कायस्थ व प्रदर्शन सभापति प्रज्वल राणाया कथं याकन हे संघ अदालतय् मेयर शाहयाःगु निर्णययात चुनौती बिइगु जुगु दु। थुकिया लागि कानुन व्यवसायपि परामर्श यानाच्वंगु दु।

मेयर शाहया गुलिं ज्या थःगु क्षेत्राधिकार स्वया पिहा वंगु अनुमान याःगु दु। तर शाह स्वयं चाहिं संविधानया धारा ५ व ५६ या उपधारा (६) न संघ, प्रदेश व स्थानीय सरकारयात राष्ट्रिय हितया संरक्षण यायेगु जिम्मेवारी तोके याःगु तर्क याना च्वंगु दु।

के बि एस लुभुया परिकल्पनाय् निपु म्येया म्युजिक भिडियोया पितब्वज्या बिहिबाः लुभुइ जूगु दु। तामाङ शैलीया म्ये ‘मैंचिया ग्वालिइ’ व ‘जिमि बाज्या’ म्येया म्यूजिक भिडियोया प्रिमियर याःगु खः।

विराटनगर महानगरपालिकाया पुलांम्ह नगर प्रमुख लिसें पुलांम्ह फिल्म बन्जाः ध्रुब नारायण श्रेष्ठ, वरिष्ठ सिने पत्रकार विजयरत्न असंबरेलिसें नं म्येया प्रिमियर यानादीगु खः। प्रिमियर जूगु निपुं म्ये शैलेश श्रेष्ठ लुभुं छायाङ्कन यानादीगु दु। “मैंचिया ग्वालिइ” म्येच्वमि कृष्ण महर्जन खःसा कृष्ण महर्जन व सरस्वति मानन्धरं सः बियातःगु दु।

म्येय् किरण जोशी व आराध्या लक्ष्मी खडगीया नापनापं रबि डंगोल, राजाराम तण्डुकार, अन्नपुर्णेश्वरी श्रेष्ठ, महेश प्रकाश हाडा, पुजा महर्जन, रिया सुवाल, बिगेन तुलाधरलगायत आपालं कलाकारतय्सं अभिनय यानातःगु दु। थ्व भिडियोया निर्दशक बालमुकुण्द प्रजापति खः।

अथेहे “जिमि बाज्या” म्येया निर्देशन पवन जोशीं यानादीगु खःसा थुकी मनोज महर्जन, निशा डंगोल, रबि डंगोल, शान्ता महर्जन, शर्मिला सिंह महर्जन, दिलिप प्रताप सिंह, बिजेता महर्जन लगायतं अभिनय यानादीगु दु। सुरज ब्यांजुं म्ये च्वय्गु, लसय् हनेगु लिसें हाला नं दीगु दु ।

उर्दू संगीतया अतिकं लोकंह्वाःगु कवाली म्येँ नेपालभाषाया संगीत ख्यलय् नं दुहां वःगु दु ।

उर्दू संगीतय् बिस्कं पह व सवाः दुगु कवाली पहया नेपालभाषाया म्येँया म्युजिक भिडिया ‘मुसुक्क न्हिलाः’ पितब्वज्या जूगु दु। थुगु म्येँय् झिम्ह कलाकारपिनिगु सः दुथ्यानाच्वंगु दु। नेपालभाषा सांगीतिक ख्यलय् अतिकं नांजाःपिं म्येँ हालामिपिं कविता जोशी, सुरेश प्रधाननाप सुमन मानन्धर, सबिना मानन्धर, रोविन्सन कंसाकारलिसे सर्मिष्ठा शाक्य, एलिना शाक्य, राजेश महर्जन, धर्म महर्जन व मोहन शाक्यं सः बियादीगु दु ।

चण्डेश्वर महर्जनं च्वयादीगु उगु म्येँय् नील शाक्यं लसय् हनादीगु खःसा जीवित जल्मिं संगीत संयोजन यानादीगु खः। म्युजिक भिडियोय् संगीतकार नील शाक्य, नेहा मालाकार, सिमरन शाक्य, रुविका महर्जन, राजेश श्रेष्ठ, हसिना प्रधान, ममता ठाकुर, अनु ताम्राकार कंसाकार, सोफिया शाक्य, आनिया शाक्यलिसें मेपिं आपालं कलाकारं अभिनय यानादीगु दु ।

विश्वास वज्राचार्यं निर्देशन यानादीगु म्युजिक भिडियोया छायाँकन अभिषेक वज्राचार्यं व सम्पादन आक्रिस्ट शाक्यं यानादीगु खः । निसिला शाक्यं कोरियोग्राफी यानादीगु म्युजिक भिडियोया मुक्कं छायाँकन एम्बियन्स लाउन्जय् याःगु खः । ज्याझ्वलय् म्येँ च्वमि महर्जन, संगीतकार शाक्य, निर्देशक वज्राचार्य, कलाकार कंसाकारलिसें विजयरत्न असंबरे नाप निर्देशक रामकृष्ण खड्गी नुँगः खँ तयादीगु खः।

ज्यापु महागुथि नेपाः केन्द्रया ग्वसालय् अन्तर्राष्ट्रिय संगीत दिवसया लसताय् तःजिक नेपाः आर्केटिक ज्याझ्वः तःजिक येँया चकं दबूलि क्वचाःगु दु ।

उगु ज्याझ्वलय् प्रधानमन्त्री पुष्पकमल दाहाल प्रचण्डया मूपाँहासुइ ज्याझ्वः न्ह्यागू खः। ज्याझ्वः येँ महानगरपालिकां ग्वाहालिं याःगु खः ।

संस्कृति मन्त्री सुदय किराँत, येँ महानगरपालिकाया कार्यवाहक मेयर सुनिता डंगोल, नेवाः देय्  दबूया नायः पबित्र बज्राचार्य, बागमति प्रदेशया संस्कृति मन्त्री पुकार महर्जन पिन्सं थःथःगु नुगः खँ तयादीगु खः।