दुबईलय् जूगु अन्तराष्ट्रिय सौन्दर्य कासाय् ‘मिस स्टार युनिभर्स २०२३’ या शिर्ष उपाधि सृष्टि महर्जनं त्याकूगु दु।

उगु कासाय् १९ देशया प्रतिस्पर्धीपिन्स ब्बति काःगु खः। २२ दँया महर्जनं उगु कासाय् ‘मिस गर्जियस’ व ‘मिस प्राइड अफ स्टार युनिभर्स’ या सवटाइट न त्याकूगु खः।

‘इन्डो इन्टरनेशनल फेसन कार्निभल एण्ड अवार्ड २०२३’ अन्तर्गत जूगु कासाय् ‘मिस स्टार युनिभर्स २०२३’ य् महर्जनयात ग्रिनआर्ट मिडियां ‘मिस स्टार युनिभर्स नेपाल २०२३’ ताज छ्वया हःगु खः।

उगु कासाया निर्णायकय् अनिला श्रेष्ठ (मिसेस युनिभर्स नेपाल २०१९), सुधा एक (वनर सुधा भेन्चर्स), इशा पफरहा कुरैशी, हनिफ शेख, अरविन्द लिम्बावली लगायतपि च्वनादीगु खः।

ग्रिनआर्ट मिडियाया सिइयो प्रविन लाकौल, ग्रीन आर्ट मिडियाया प्रबन्ध निर्देशक लिसे अन्तर्राष्ट्रिय कोरियोग्राफर अनिला श्रेष्ठं शनिवाः नेपालय् लसकुसयासे भिंतुना बिःगु खः ।

फिल्म अभिनेता सारुक ताम्राकार येँया रातोपुलस्थित थःगु छेँय् सिनाच्वंगु लुगु दु।

ताम्राकार म्हिगः बिहीवाः चान्ह्यः ११ बजे झुण्डे जुया सीनाच्वंगु धका काठमाडौं जिल्ला प्रहरी परिसरया प्रवक्ता एसपी सीताराम रिजालं जानकारी बिःगु दु। घटनास्थलय् मुचुल्का याये धुका आः सीम्ह पोस्टमार्टमया लागि त्रिवि शिक्षण अस्पतालय् यकूगु दु।

झुण्डे जुया सीगु कारणबारे सिइमदुगुनि व अनुसन्धान जूयाच्वंगु दु धका प्रवक्ता रिजालं धाःगु दु । फिल्म ‘रानी’ पाखे अभिनय करिअर न्ह्याकूम्ह सारुकं ‘मेरी मामु’ व ‘इन्टु मिन्टु लण्डन’ य् अभिनय यानादीगु खः। लिपागु इलय् फिल्म ‘ह्यासट्याग माया’ य् छायांकनय् ब्यस्त जूयाच्वंगु खः।

सारुक अभिनेता सानु ताम्राकारया काय् खः।

संसार्स अनलाइनया ग्वसालय् स्वदँ न्ह्यः क्वचाःगु संसार्स अनलाइन सिङ्गिङ स्टार २०२०–०२१ कासाय् टप टेन तक थ्यनेत ताःलापिं कासामिपिन्त अफिसियल सङ ह्याण्डओभर प्रोग्राम धका म्हतिं छपू छपू म्ये औपचारिक रुप लःल्हायेगु ज्याझ्वः जूगु दु।

संसार्स अनलाइनया क्रियटिभ डाइरेक्टर स्वतन्त्रसंसार महर्जनया सभाध्यक्षताय् जूगु उगु ज्याझ्वलय् संस्थाया संस्थापक दुजः प्रेमा संसार महर्जनं लसकुस यानादीगु खः। ज्याझ्वलय् सिंगिंग स्टार्सया फाइनलिष्टपिन्त अफिसियल सङ ह्याण्डओभरया नापनापं कलाकार राजु महर्जन जुजुया कविता संग्रह “कोपिला” सफूया नं पितब्वज्या जुःगु खः ।

नांजाम्ह साहित्यकार व फिल्म निर्देशक प्रकाश सायमी व नेपालभाषाया न्हापांम्ह पत्रकार विजयरत्न तुलाधर जाना उगु सफूया उलेज्या यानादीगु खः । उगु हे ज्याझ्वलय् नेवाः सुपरस्टारपि आर्यम नकःमि, अन्नपुर्णेश्वरी श्रेष्ठ, हिसिला महर्जन, भिन्तुना जोशी, सुरज व्यन्जनकार, राजु महर्जन, रजनी खडगी, रोजिना सुवाल, रुपेन्द्र श्रेष्ठ व भोगेन्द्र मानन्धर नापंयाना झिम्हेसित व नेवाःआइडल जुइत ताःलाम्ह मन्जिल शाक्ययात नं भिन्तुना देछागु खः ।

अथेहे, आनन्दरत्न बज्राचार्यं च्वयादीगु संगीता शाक्यं हालादीगु म्येय् नांजाम्ह संकिपामि पवन जोशीं निर्देशन यानादीगु राजमति मखु जि बोलया भिडियो व निर्देशक राजेन्द्र कुमार महर्जनं निर्देशन यानादीगु छन्त स्वया म्येया भिडियो पितब्वज्या यागु खः। लुँझ्या कला कुन्जपाखें निर्माण यागु उगु भिडियो राजु महर्जन जुजु व अन्नु महर्जनं अभिनय यानादीगु दु ।

थ्व म्ये परमेश्वर नारायण जोशी व रेखा नापितं हालादीगु खः। राजमति मखु जि बोलया म्येय् धाःसा ज्यापुनि इन्दु, प्रबिन अमात्य, श्याम महत व सुमिना महर्जनपिन्सं अभिनय यानादीगु खःसा म्येया संगीतकार अनिल तुलाधर खः।

नेपाल मण्डलया बौद्ध शिक्षाय् अध्ययन अध्यापन व अभ्यास यायेगु प्राचीन परम्परागत केन्द्र बहाः बहीया बालागु थाय् कथं इतिहासकारपिन्स येँया पुर्वी उत्तर क्षेत्रय् दुगु गुंबहाः ( गुंबिहाः) व अन दुगु बज्रयोगिनी नाप मेगु प्यंगु योगिनीयात दुथ्याका दयकूगु डकुमेन्ट्री द योगिनीको प्रोमो व पोस्टर अष्ट्रेलियाया सिड्नी शहरय् छगू ज्याझ्वः दथुइ सार्वजनिक याःगु दु।

गुठीया भाषा संस्कृति अध्ययन समितिया संयोजक श्याम सैंजुया संयोजकत्वय् क्याम्प्सी सहरया छगू कम्युनिटी हलय् गुथि अष्ट्रेलियाया ग्वसालय् उगु ज्याझ्वः जूगु खः। गुथि अष्ट्रेलियाया अध्यक्ष उमेश नापितं “द योगिनी“ डकुमेन्ट्रीया सार्वजनिक यानादीसे थज्यागु ज्यां सम्पदा संस्कृतिया प्रचार प्रसार यायेगु निति हे थुगु संस्था स्थापना यानागु खँ धका धयादीगु खः।

गुठी अस्ट्रेलियाया पूर्व अध्यक्ष नाप सल्लाहकार पद्म शाक्यं“ महर्जन रत्न नेपाल भाषा नाप नेपाली सिने क्षेत्र भाषिक क्षेत्रय् वयकःया महत्त्वपूर्ण योगदान दु धका धयादीसे वयकःनाप “मुद्दा“ चलचित्रय् गुठी अस्ट्रेलियां सहकार्य यानागु लुमकादीसे “द योगिनी“ डकुमेन्ट्रीइ न ज्या याये खःगुलि लसता प्वकादील।

उगु ज्याझ्वलय् “द योगिनी“या च्वमि नाप निर्देशक महर्जन रत्नं स्वनिगःयाते रक्षा यायेत न्याम्ह योगिनी व उकिया महत्त्व बारे चर्चा यानादीसे सक्वःया गुंबहा नापं अन दुगु बज्रयोगिनीयात गुकथं माने याइगु व उकिया धार्मिक सांस्कृतिक  नाप पुरातात्वीक महत्व बारे चर्चा यासे डा. बाल गोपाल श्रेष्ठं उगु डकुमेन्ट्री निर्माण जूगु धका धयादीगु खः।

अमेरिकाया ह्वाइट फेदर प्रोडक्सननाप मिले जूया सुभाय् मिडियां उगु डकुमेन्ट्रीया निर्माण याःगु खः।

नेपाल चलचित्र संघं भारतीय फिल्मय् प्रदर्शन रोके यायेगु येँ महानगरपालिकाया मेयर बालेन शाहया निर्णयविरुद्ध उच्च अदालतय् रिट दायर याःगु दु।

बुधवाः न्हिनय् चलचित्र संघया रिट दर्ता जूगु दु धका पाटन उच्च अदालतया प्रवक्ता मन्दिरा शाही न जानकारी बिःगु दु। येँ महानगरपालिकाया मेयर बालेन शाह न फिल्म ‘आदिपुरुष’ य् सीता भारतीय म्ह्याय् धका धाःगु आशय संवाद मचिकू धका धासे महानगरपालिका दुने हलय् भारतीय फिल्म प्रदर्शनय् रोके याःगु खः।

बालेनया उगु निर्णय कानुनविपरीत धका धासे फिल्म हल सञ्चालकपि अदालत वःगु खः। उमिसं येँया हलय् हिन्दी चलचित्र सञ्चालन याकेत अन्तरिम आदेशया माग याःगु खः । उगु रिटय् बिहीवाःया लागि पेशी तोके याःगु खः।