चलचित्र कलाकार संघया अध्यक्षय् मोहन निरौला निर्वाचित जूगु दु। म्हिगः शनिवाः येँ जूगु संघया १९ क्वःगु महाधिवेशनं न्हुगु कार्यसमिति निर्वाचित जूगु खः।

निरौलां अध्यक्ष पदय् निकटतम प्रत्यासी रेजिना उप्रेतीयात २६ मतं बूकुगु खः। कूल कुहावःगु मत ४६८ मध्ये निरौलां २३५ मत काःगु खःसा उप्रेतीं २०९ मत काःगु खः। २६ मत बदर जूगु खः। संस्थाया स्थापनाकालनिसे हे निरौलां महासचिव व उपाध्यक्ष पदय् च्वना ज्या याना वये धुकुगु खः। न्हापागु कार्यसमितिइ निरौलां उपाध्यक्ष व प्रवक्ता जूया ज्या याये धुकुगु खः।

अथे हे, उपाध्यक्षय् कविता गेलाल व शिवहरि बैरागी विजयी जूगु खः। महासचिवय् सबिन श्रेष्ठ, सचिवय् रामेश्वर बुर्लाकोटी, कोषाध्यक्षय् सुनिल कटुवालपिं निर्वाचित जुगु खः। सह–कोषाध्यक्ष पवित्रा आचार्य निर्विरोध निर्वाचित जूगु खः।

दुजलय् शीतल केसीं दकलय् अप्पो ३०२ मत हया विजयी जूगु खःसा मेपि दुजलय् गोपाल ढकाल ‘छन्दे’, उद्धवप्रसाद भट्टराई, पवन केसी, नम्रता खरेल, पुकार भट्टराई, खुस्बु खड्का, सरिता राजोपाध्याय, रोशन श्रेष्ठ व समीर लामा निर्वाचित जुगु दु।

कृष्ण डंगोल व नीशा देसारया सलय् थ्वयाच्वंगु नेपालभाषाया म्येया म्यूजिक भिडियो पिहावंगु दु ।

विक्रम शाक्यं च्वयादीगु व नारायणबहादुर महर्जनं लसय् हनादीगु उगु म्येया म्यूजिक भिडियो सुजन बज्राचार्य ख्वपय्या निर्देशनय् निर्माण जूगु खः।

छेनेक्स मिडिया प्रा.लि.या न्ह्यब्वया उगु म्यूजिक भिडियोय् मनोज महर्जन व निरिशा महर्जनया मू भूमिका दुथ्यानाच्वंगु उगु म्यूजिक भिडियोया सह निर्देशन रचु शाक्य, सम्पादन व कलर अनिलकुमार महर्जनं यानादीगु दुसा छायाँकन मोहनकुमार झिल्लुं यानादीगु दु।

नेपाःया दकले न्हांपाम्ह क्यामेरा पर्सन मिसा शबनम मुखियाया ड्रिमवल्र्ड अफ फिल्म मेकर्स प्राइभेट लिमिटेडपाखें ग्वसाः ग्वःगु ‘सोसियल मिडिया फिल्म अवार्ड २०७८’ ज्याझ्वलय् “बेलुन” नांयागु शर्टफिल्मं सर्वोत्कृष्ट अवार्ड त्याकल ।

नेपाल फिल्म एकेडेमीपाखें दयेकूगु थ्व संकिपा माओवादी द्वन्द्धकालया बाखनय् आधारित संकिपा खः । थ्व ज्याझ्वलय् उत्कृष्ट यूट्युब भिडियो, भ्लग, उत्कृष्ट निर्देशक, ध्वनि संयोजक, अभिनेता, सम्पादक, निर्देशक, अभिनेत्री लगायत मुक्कं २२ विधाय्  अवार्ड बिउगु खःसा आदिबासी जनजाति विधाया दकले बाँलाःगु संकिपा कथं लिम्बु भाषाया “क” सिरपाः त्याकेत ताःलातसा सुरेश खडगीं निर्देशन याःगु “मोहनी नखः”यात जुरी अवार्ड बिउगु खः ।

थ्वहे ज्याझ्वलय् नेपाःया न्हापांम्ह नायिका भुवन चन्दलिसें राजमति, बसन्ती, वीर गणेशमानथें जाःगु ऐतिहासिक महत्वया संकिपाया कला निर्देशक निर्जल श्रेष्ठ व युवा पत्रकारिता पुरस्कार पत्रकार पारसमणि पौडेलयात १५ हजार पाँच सय ५५ तका दांलिसें हंगु खः । अवार्ड ज्याझ्वलय् निर्णायकपाखें नांजाःम्ह फोटोग्राफर राजभाई सुवाल व संकिपा निर्देशक प्रणय लिम्बुपिन्सं निर्णय प्रक्रियायात कया नुगःखँ तयादीगु खः ।

अवार्डया निंति दुहाँ वःगु सच्छि व नीगू शर्टफिल्म व डकुमेण्ट्री वृत्तचित्र स्वया निणार्यक पुचःपाखें दुवाला सिरपाः क्वःछिनागु खँ कनादिल । निर्णायक पुचलय् शर्टफिल्म, डकुमेण्ट्री व सोसियल मिडिया अवार्डपाखे सिनियर फोटोग्राफर राजभाई सुवाल, चलचित्र निर्देशक प्रणय लिम्बू, सञ्चारकःमि आरती चटौत निर्णायक कथं च्वनादीगु खःसा आदिबासी जनजाति संकिपा विधाय् निर्णायक पुचलय् अग्रज पत्रकार विजयरत्न तुलाधर, प्रणय लिम्बू व गीतकार भूमिका सुब्बा निर्णायक कथं च्वनादीगु खः ।

नांजाःम्ह संकिपा निर्देशक यादव खरेल मूपाहाँ जुयादीगु उगु अवार्ड ज्याझ्वलय् विशिष्ट पाहाँ प्रेस काउन्सिल नेपालया नायः बालकृष्ण बस्नेत अले पाहाँ कथं नेपाल चलचित्र विकास बोर्डया नायः भुवन केसी, नेपाल टेलिभिजनया कार्यकारी नायः समीरजंग शाह, नेपाल टेलिभिजन महाप्रबन्धक फूलमान बल तामाङ, चलचित्र कलाकार संघया नायः रविन्द्र खडका, निर्माता संघया नायः नवल खडका, वरिष्ठ कलाकार लय संग्रौलालिसेंया व्यक्तिपिनिगु ब्वति दूगु खः ।

यलया ऐतिहासिक शहर सुनागुथिइ संसारय् हे दकले तःधिकम्ह भिन्द्यः कथं थापना जूम्ह भिन्द्यः यात कया सुनागुथिया हे नांजाःम्ह संगीतकःमि रुपेश डंगोलं च्वयादीगु व लसय् हनादीगु म्ये ‘दर्शन याः वनेनु पासा’ बोलया म्येया म्युजिक भिडियोया छगू तःजिगु ज्याझ्वः दथुइ प्रिमियर जूगु दु ।

सुनागुथिया दकले थकालिम्ह ९८ दँ दुम्ह धनमाया महर्जनया समुपस्थितिइ जूगु उगु म्येया प्रिमियर शोया उलेज्या मदनकृष्ण श्रेष्ठ व हरिवंश आचार्यपिन्स यानादीगु खः। लाजु परिवार व सुनागुथि समाज परिवारया ग्वसालय् शनिवाः येँया दरबारमार्गय् च्वंगु किंग्स लाउण्जय् जुउगु म्येया प्रिमियर सुनागुथि समाज परिवारया नायः विनोद डंगोलं उगु भिंद्यः थापना गुकथं जुल धका कनादीगु खः ।

अथेहेतुं सिने पत्रकार विजयरत्न असंबरें म्येया म्युजिक भिडियो यात कया समीक्षात्मक टिप्पणी यानादीगु खःसा म्युजिक भिडियो निर्देशन यानाबलेया अनुभव सुरेन्द्र तुलाधरं कनादिल ।

उगु म्येय् मदनकृष्ण श्रेष्ठ व हरिवंश आचार्यया नापनापं भिम तुलाधर, बबिन प्रधान, जेम्स प्रधान, प्रवेशमान शाक्य, ज्योति घिमिरे, भुपेन्द्र बज्राचार्य, बुद्ध सायमि, नील शाक्य, यमन श्रेष्ठ, विजय गुरुङं, सचिन रौनियार, रुपेश डंगोल व लसता जोशीपिन्स सः बियादीगु खः।

अन्तर्राष्ट्रियस्तरय् प्रसिद्ध भारतीय बासुरीवादक आश्विन श्रीनिवासनंं बाँसुरी वादन न्ह्यब्वइगु जूगु दु ।

जयश्री संगीत समाजया ग्वसालय् थौं आइतवाः ‘नाद रंग–कलर्स अफ साउन्ड’ कन्सर्ट बाँसुरी लाइभ’ ज्याझ्वलय् श्रीनिवासनयात प्रख्यात तबलावादक ओजस अढियां तबलाय् साथ बियादी ।

निदँ दसांनिसें भारतीय शास्त्रीय सङ्गीत सयेकादीम्ह आश्विन संगीतकार परिवारय् हे जन्म जूम्ह खः । थः मांपाखें सितार सयेकेगु ज्या न्ह्याकादीसां न्हय्दँ दुबलय् बाँसुरीइ मन क्वसाःम्ह वय्कः मुम्बईया दकलय् ब्यस्तम्ह बाँसुरीवादक खः ।

दाफा व शास्त्रीय संगीतया थीथी बाजं फ्यूजन यानाः न्ह्यब्वयाः न्ह्याइगु थुगु ज्याझ्वलं झीगु दाफा संगीतया प्रवद्र्धनय् नं ग्वाहालि याइगु जयश्री संगीत समाजया नायः लक्ष्मी डंगोलं कनादिल ।

येँ महानगरपालिकाया ग्वाहालिइ न्ह्याइगु थुगु ज्याझ्वःपाखें मुंगु ध्यबां संगीतया विद्यार्थीपिनिगु निंतिं माःकथं छात्रवृत्ति बीगु नं तातुना दु । ज्याझ्वः येँ महानगरपालिकाका उप–प्रमुख सुनीता डंगोलया मूपाहांसुइ राष्ट्रिय नाचघर, जमलय् सनिल ५ बजे न्ह्याइ ।