नेपालभाषाया लोकंह्वाःम्ह कलाकार नाप मोडल आराध्यालक्ष्मी खड्गीं गायन क्षेत्रय् नं डेब्यू याःगु दु। वयकः लिसे अमेरिकां वःम्ह विजयमान सिं हिरो जुया वःगु दु ।

किर्तिपुर सिनेप्लेक्सय् बिहीवाः आराध्या लक्ष्मी खड्गीया सलय् “मतिना देशय्” बोलया म्येया प्रिमियर जूगु खः। राजेश मान सिंहया च्वसाय्, विरेन शाक्यया संगीतय् मतिनाया देशय् म्ये पाखें आराध्यं म्येहालामि ख्यलय् डेब्यू याःगु खः। म्यूजिक भिडियोलय् आराध्या लिसें विजयमान सिंहया जोडी दु । थुगु म्येया छायाँकन व सम्पादन सोहन मानन्धरं याःगुलि निर्देशन राजेश मान सिंहं याःगु खः।

ज्याझ्वलय् बिजयमान सिंहया सलय् “भन तिमिलाइ” बोलया नेपाली भाय्या म्ये नं प्रिमियर जूगु खः। दिपक श्रेष्ठया निर्देशनय् तयार जूगु थुगु भिडियोलय् बिजयमान सिंहयात नन्दिता केसिं ग्वहालि याःगु खः। थुगु म्येय् च्वसा, संगीत व सः बिजय मान सिंहया खः।

ज्याझ्वलय् मूपाहाँ कथं ख्यालि जुजु मदनकृष्ण श्रेष्ठ झायादीगु खःसा पाहाँ कथं पुलांम्ह अभिनेत्री नारायण देवी श्रेष्ठ, वरिष्ठ म्येहालामि जुजुकाजी रंजित, संकिपा व साहित्य अन्वेषक प्रकाश साय्मि, नेपालभाषाया न्हांपाम्ह निर्देशक विजयरत्न असंबरे झायादीगु खः।

आराध्या लक्ष्मी खड्गीया मां सुर्ज लक्ष्मी खड्गीं लसकुस यानादीगु खः। म्येया प्रिमियर न्ह्यः आराध्या व बिजयया बःचाहाकःगु नृत्य नं न्ह्यब्वःगु खःसा आराध्यां हे लाइभ म्ये नं हालाः न्यंकुगु खः ।

लुभुइ स्वपू म्येया म्युजिक भिडियो प्रिमियर जूगु दु । लुभुया महालक्ष्मी ब्यांक्वेटय् जूगु प्रिमियर उगु ज्याझ्वलय् ख्यालिजुजु मदनकृष्ण श्रेष्ठ मूपाहाँ कथं झायादीगु खः ।

केबिएस लुभु प्रोडक्शन हाउसया ग्वसालय् जूगु उगु ज्याझ्वलय् मूपाहाँ श्रेष्ठं त्वाःदेवाय् मत च्याका ज्याझ्वःया उलेज्या यानादीगु खः । नेपालभाषाया न्हापांम्ह म्युजिक भिडियो निर्देशक विजयरत्न असंबरें समीक्षात्मक नुगःखँ तयादीगु खः सा संगीतज्ञ धनबहादुर गोपालि व मूपाहाँ मदनकृष्ण श्रेष्ठपिन्सं नं थःथःगु खँ तयादीगु खः ।

पितब्वज्या जूगु स्वपू म्ये मध्ये छपू खस् नेपाली म्ये “दुःख मैले झेल्न सकिंन” खः । पवन जोशीया रचना, राजेश शाक्यया संगीत दूगु उगु म्ये मचाराजा महर्जनं हालातःगु खः । अथेहे मेगु निपू “पियाचोना” व “झलझल थ्व मिखाय्” म्ये नेपालभाषाया म्ये खः ।

उकिइ मध्ये समा डंगोलं हालातःगु पियाचोनाया च्वमि चण्डेश्वर महर्जन, संगीत धनबहादुर गोपलि खःसा मथुरा महर्जनं हालातःगु झल झल मिखाय् म्येया च्वमि नं चण्डेश्वर महर्जन हे खःसा संगीत मदुम्ह नबिन महर्जन खः । उगु स्वपूं म्येया म्युजिक भिडियोया निर्देशक बालमुकुण्द प्रजापति खः ।

भिडियो या किपालुमि व सम्पादन शैलेश श्रेष्ठ लुभुं व उमेश पाण्डें समा यानादीगु खः। निगु नेवाः भिडियोस आराध्यलक्ष्मी खडगीं अभिनय यानातःगु खःसा छपू म्येय् शैलेश श्रेष्ठ व मेगु म्येय् रुपेन्द्र श्रेष्ठं वयक लिसे नायः जुया म्हितातःगु दु । खस नेपाली म्येय् किरण जोशीलिसे नतिजा पौडेल व राजी किपू लगायतं अभिनय यानातःगु दु ।

राजेन्द्र डंगोलया ‘ह्याउँ सिन्हः’ नांया म्येँचाः ख्यालिजुजु मदनकृष्ण श्रेष्ठं पितब्वज्या यानादीगु दु। छगू ज्याझ्वःया दथुइ म्येँचाःलिसें उकी दुथ्याःगु छपु म्येँया म्युजिक भिडियो नं सार्वजनिक याःगु दु ।

म्येँचालय् प्यपु म्येँ दुथ्यानाच्वंगु दु । प्यपुं म्येँ डंगोलं सः बियादीगु खःसा नातीकाजी महर्जनं च्वयादीगु खः । प्यपु म्येँ मध्ये ‘चकना ए चकना’, ‘म्हुतुसिइ लिपिष्टिक बुलाः’ व ‘बांलाः आपालं’ म्येँ जुगल डंगोलं लसय् हनादीगु व संगीत संयोजन यानादीगु खःसा ‘अय्लाः छ धात्थें’ म्येँ गायक डंगोलं लसय् हनादीगु खःसा शिव शाहीं संगीत संयोजन यानादीगु खः ।

‘म्हुतुसिइ लिपिष्टिक बुलाः’ म्येँय् निशा देसारं नं सः बियादीगु दु । उगु ज्याझ्वलय् ‘चकना ए चकना’या म्युजिक भिडियो नं सार्वजनिक याःगु खः । म्युजिक भिडियोय् सृष्टि महर्जन, दिनकर महर्जनलिसें म्येँ हालामि डंगोलया अभिनय दुथ्यानाच्वंगु दु ।

रत्नदेवी महर्जनं निर्माण यानादीगु म्युजिक भिडियोया निर्देशन व कोरियोग्राफी रोहिया महर्जनं यानादीगु खःसा छाँयाकन राजेन्द्र डंगोल व सम्पादन इन्द्र मानन्धरं यानादीगु खः ।

डा. पंचनारायण डंगोलया सभाध्यक्षताय् जूगु उगु ज्याझ्वलय् म्येँ हालामि डंगोलया ‘झुमि यंकूगु समाज’ नांया सफू नं पितब्वज्या याःगु खः ।

ख्यालिजुजु मदनकृष्ण श्रेष्ठ व गंगाबहादुर मालीं च्वयादीगु लोक लसय् आधारित ‘ज्वरा ज्वरा पर्सि’ म्ये छगु ज्याझ्वः दथुइ हरिवंश आचार्यं पितब्बज्या यानादीगु खः।

ख्यालिजुजु श्रेष्ठलिसें रोजी डंगोल श्रेष्ठ व सरीता शाहीं हालादीगु म्ये हालादिगु खः। उगु ज्याझ्वलय् प्रकाश सायमि विशेष पाहाँ व सिने पत्रकार विजयरत्न असंबरे पाहाँ कथं झायादिगु खः।

गोपालकृष्ण महर्जनया सभाध्यक्षताय् जूगु उगु ज्याझ्वलय् म्येहालामि रोजी डंगोल श्रेष्ठं लसकुस यानादिगु खः।

उगु म्युजिक भिडियोया निर्देेशक रामकृष्ण खडगी यानादीगु खःसा छायांकन लुजः सिंह, सम्पादन बालकृष्ण बंशी, म्यूजिक भिडियोया कलरिङ संजीवरत्न शाक्य, हरिशरण सायमिं रेकर्डिङ यानादीगु लोक लयया थ्व म्येया निंतिं जिवित जल्मीं बाजं ग्वसाः ग्वयादीगु खः ।

म्यूजिक भिडियोय् मदनकृष्ण श्रेष्ठ, बसुन्धरा भुषाल व सूर्यमाला शर्मा खनालपिन्सं अभिनय् यानादीगु खः।

येँ महानगरपालिकां स्थानीय न्यायिक निरुपणया बाखंया लिधंसाय् निर्माण याःगु चीहाः संकिपा ‘उ गरेर उ गरौं’ छगू ज्याझ्वः दथुइ सार्वजनिक याःगु दु । उगु चीहाः संकिपा मेट्रो न्युज युट्युब च्यानलपाखें सार्वजनिक याःगु खः ।

येँ महानगरपालिकाया उपप्रमुखलिसें न्यायिक समितिया संयोजक सुनिता डंगोलं चीहाः संकिपा सार्वजनिक यासें थम्हं पद बहाली यानागु इलय् हे स्थानीय विवाद निरुपणया निंतिं मेलमिलाप केन्द्र स्थापना व संचालन यायेगु व उकिया निंतिं बिस्कं मिसा संजाल गठन यायेगु निर्णय यानागु खँ कनादिल ।

केन्द्र व संजाल गठन यानाः कार्यान्वयनय् वनेगु लिसें उकिया लिच्वः नं वयेगु शुरु जूगुलिं थःत गर्व महसुस जूगु वय्कलं धयादिल । पारिवारिक व सामाजिक जीवनलिसे सम्बन्धित विवाद व समाधानया कुतलय् न्यायिक समितिंया काम, कर्तव्य, प्रक्रियाया विषययात बाखनय् उगु चीहाः संकिपा निर्माण याःगु खः ।

नांजाःपिं कलाकारद्वय मदनकृष्ण श्रेष्ठ व हरिवंश आचार्यं निर्देशन यानादीगु चीहाः संकिपाय् बाखं, पटकथा व संवाद हरिवंश आचार्यया खः । चीहाः संकिपाय् मह जोडीलिसें वसुन्धरा भुषाल, नरेन्द्र कंसाकार, रवि डंगोल, प्रदीप बास्तोला, आरजु कार्की, शालिनी विष्ट भट्टराई, विगिसा अधिकारी, मञ्जु श्रेष्ठ, सुनिता श्रेष्ठ लगायतया कलाकारया अभिनय दुथ्यानाच्वंगु दु । ‘वडा वडाय् गठन व संचालन जूगु महिला संजाल, केन्द्र व वडाय् हे निःशुल्क रुपं बिया वयाच्वनागु कानूनी सेवा थःपिनिग असल अभ्यास खः’ वय्कःया धापू दु ।

आन्तरिक प्रािप्तलिसें न्यायिक समितिया न्हापांगु राष्ट्रिय सम्मेलनया सफलता नं मेगु उपलब्धी जूगु वय्कलं धयादिल । येँ महानगरया प्रमुख प्रशासकीय अधिकृत वसन्त अधिकारीं स्थानीय तहय् न्यायिक समितिपाखें समाधान जूगु विवादया ल्याखं अदालतय् चाप म्हो जूगु खँ कनादिल । वय्कलं नागरिक, स्थानीय तह व अदालततक थुकथंया समस्यां प्रभाव लानाच्वंगु नं धयादिल । वरिष्ठ कलाकारलिसें चीहाः संकिपाया निर्देशक मदनकृष्ण श्रेष्ठं शान्तपूर्ण व सद्भावयुक्त समाज निर्माण यायेगु सन्देश प्रवाहया निंतिं महानगरपालिकालिसे सहकार्य यानाः वने खंगुलिं लय्ताःगु खँ कनादिल ।

मेम्ह निर्देशक हरिवंश आचार्यं थःपिंसं आतकया दुने म्हो इलय् दकलय् बांलाःगु संकिपा दयेकागु दु धासें कानूनी आचरणयात व्यवहारिक छ्यलाबुलाय् हयाबलय् प्राविधिक पक्षयात बांलाक अध्ययन लिपा जक आकार बीगु खँ कनादिल । उगु इलय् चीहाः संकिपाया कलाकार, प्राविधिक व न्यायिक सम्मेलनय् ग्वाहालि यानादीपिं व्यक्ति व संघसंस्थायात उपप्रमुख डंगोलं दसिपौ व प्रमुख प्रशासकीय अधिकृत अधिकारीं सुकू मतिनाया चिंकथं लःल्हानादीगु खः ।