यलय् लुनिभा प्रोडक्शनं स्वपू नेवाः म्येया म्युजिक भिडियो पितब्वज्या याःगु दु।

बुंगद्यःया जात्रा बले, जि छंगु गल्ली वया व सुथय् न्हापा लःकाः वःम्हः म्येया भिडियो पितब्वज्या ज्याझ्वलय् ख्यालिजुजु मदनकृष्ण श्रेष्ठ मूपाहाँ कथं झायादीगु खः।

मूपाहाँ श्रेष्ठं थौंकन्हे म्ये हाला रेकर्ड जक यानां मगा उकियात सकसिनं स्वयेखनि कथं म्युजिक भिडियो नं दयेकेमा धका धयादीगु खःसा बिके जल्मीया कुतःया प्रशंसा यानादिगु खः।

ज्याझ्वलय् नेवाः पत्रकार राष्ट्रिय दबूया निवर्तमान नायः सुरजबीर बज्राचार्यं कलाकारिता व पत्रकारिताया स्वापुया बारे खँ तयादीगु खःसा मनराजा नकःमि, संगीतकःमि निरन्जन महर्जन, म्येहालामि आशा नकःमि लगायतया कलाकःमि पाहाँ कथं झायादीगु खः ।

ज्याझ्वलय् नेपालभाषाया न्हांपाम्ह म्युजिक भिडियो निर्देशकं सिनेपत्रकार विजयरत्न असंबरें म्युजिक भिडियोया समालोचनात्मक खँ तयादीगु खः।

संचाःकःमि सुरज ब्यञ्जनकारया नेपालभाषाया मुक्तक मुना सफू ‘सब्बुचा  २’ छगु ज्याझ्वःया दथुइ पितब्वज्या जूगु दु।

सफूया च्वमि व्यजनकारया अबु सुरेन्द्र ब्यञ्जनकारया सभाध्यक्षताय् यलया खपिन्छे त्वालय् जूगु उगु ज्याझ्वलय् ‘सब्बुचा २’ वरिष्ठ कलाकार ख्यालिजुजु मदनकृष्ण श्रेष्ठं यानादीगु खः।

उगु पितब्वज्या ज्याझ्वलय् मूपाहाँ श्रेष्ठ, विशिष्ट पाहाँपिं यल महानगर ९ या वडाअध्यक्ष राजु महर्जन, खपिन्छे टोल सुधार समितिया नायः राजमान अवाले पिन्सं सफूयात कया थःथःगु नुगःखँ तयादीगु खःसा साहित्यकार सुधीर ख्वबिं सफूया समालोचना यानादीगु खः ।

ख्वपःया विनाता सांगितिक समाजया ग्वसालय् विक्रम सम्बत २०८० न्हूदँ व ख्वपःया तःजिगु सांस्कृतिक नखः बिस्काया लसताय् “शुभकामना तथा सांगितिक” ज्याझ्वः तःजिक क्वचाःगु दु ।

ग्वसाखलः विनाता सांगितिक समाजया नायः ओमप्रकाश श्रेष्ठया सभाध्यक्षताय् जुगु उगु सांगितिक ज्याझ्वलय् “सिलु” नायः जय श्रेष्ठ, नांजाम्ह म्येच्वमि सुभाष चन्द्र ढुंगेल, ख्वपःया वडा ५ या अध्यक्ष योगेन्द्रमान बिजुकुछे, वडा ७ या अध्यक्ष उकेश कवां, वडा ९ या अध्यक्ष रविन्द्र ज्याख्वः, संकिपामि कलाकार सुरेन्द्र श्रेष्ठ, विनाता सांगितिक समाजया संरक्षक बद्री नारायण ताम्राकार, संसार्स क्रियशनया क्रियटिभ डाइरेक्टर नांजाम्ह कलाकःमि स्वतन्त्रसंसार महर्जन, नांजापिं ख्यालि कलाकारपिं हृदय प्रसाद मिश्र, श्याम सुन्दर शिल्पकार व अर्णेश्वरी शिल्पकार, ख्वपया संगीत गुरुपिं गोविन्द भुजु व जननी मूल व वरिष्ठ सिने पत्रकार विजयरत्न असंबरे लगायतया आपालं भिंचितामिपिं विशिष्ट पाहाँ कथं झायादीगु खः ।

उगु ज्याझ्वलय् रोजी डंगोल श्रेष्ठ, सरिता प्रजापति व एन्जिला श्रेष्ठपिं िलोकंह्वापिं सांगितिककःमिपिं लगायत प्रिया बस्नेतपिन्स सास्कृतिक ज्याझ्वः न्ह्यवःगु खः।

अवार्ड त्याकामितय्त दसिपौलिसें भिंतुना पौ अले ग्वहालितय्त सुभाय्  पौ ब्युसें नेपालभाषा स्टार म्यूजिक भिडियो अवार्ड्सया निगूगु संस्करणया औपचारिक समापन जूगु दु ।

ख्वपय् छगू समारोह यासें नेपालभाषा स्टार म्यूजिक भिडियो अवार्ड्स ११४३ या समापन याःगु खः । अवार्ड्सया निगूगु संस्करणया सकतां ज्याझ्वः क्वचाःगु घोषणा यासें ग्वसाः खलः संसार क्रिएशन्सया क्रिएटिभ डाइरेक्टर स्वतन्त्र महर्जन अवार्ड्सया स्वंगूगु संस्करणया ग्वसाः ग्वय्त सकसिगु साथ व ग्वहालि दइगु अपेक्षा प्वंकादिल ।

ज्याझ्वलय् अवार्ड त्याकामि व सम्मानित जूपिन्त संसार क्रिएसन्सपाखें दसिपौ ब्यूगु खःसा आर.बि. फिल्म्सपाखें भिंतुनापौ ब्यूगु खः । लिसें ज्याझ्वलये थीथी कथं ग्वहालि याःपिं ग्वहालिमि व प्रायोजकतय्त नं दसिपौ लःल्हाःगु खः । वरिष्ठ सिने पत्रकार विजयरत्न असंबरें दसिपौ लःल्हानादिल सा भक्तपुर इन्टरनेशनल हस्पिटलया न्वकू अशोक कुमार श्रेष्ठं भिंतुना पौ लःल्हानादिल ।

आर. बि. फिल्म्सया प्रवन्ध निर्देशक रविन्द्र शाहीं खादा न्यय्कादिल । नुगःखँया झ्वलय् वरिष्ठ सिने पत्रकार असंबरें थःपिन्सं नेपाल टेलिभिजनय् नेपालभाषाया ज्याझ्वः हसना न्ह्याकाबलय् नेपालभाषां न्ववाय्त प्रतिवन्ध तःगु ई लुमंकुसें उगु इलय् न्ह्याःगु नेपालभाषा संचार व म्यूजिक भिडियो ख्यःया पलाः आः तब्यानावंगु खनाः लय्ताःगु धयादिल । आर. बि. फिल्म्सया प्रवन्ध निर्देशक शाहीं कला ख्यः व कलाकारतय्त सकसिनं मतिना बियाः फूचाःकथं हःपाः तिबः बियाच्वनेत इनाप यानादिल ।

लोकह्वाम्ह निर्देशन पवन जोशीं म्ये ७४ गु म्ये ‘छं त्वःताः थकल हाःनाः सुं मन्त” म्येंया रेकर्डिङ यायेगु ज्याः क्वचाःगु दु ।

संगीतकार अनिल तुलाधरं लसय् हनादीगु उगु म्येय् राजेन्द्र शाक्यं सः हालादिगु खः। कमलपोखरी, येँया भ्वाइस स्टुडियोस रेकर्डिङ जुगु थुगु म्येंयात रेकर्ड व मिक्सिङ यायेगु ज्या नांजाःम्ह संगीतकःमि दीप तुलाधरं यानादीगु दु ।

थुगु म्येयात कया याकनं हे म्युजिक भिडियो निर्माण यायेगु धकाः कलाकार सुरेन्द्र श्रेष्ठं जानकारी बियादीगु दु ।

उगु म्युजिक भिडियोय् कलाकार सुरेन्द्र श्रेष्ठ व सरु भारती पिन्सं मू भूमिका म्हितीगु खँया जानकारी बिगु दु। थुगु म्युजिक भिडियो पवन जोशी निर्देशन यायेत्यःगु खः।