फागु पुन्हिया लसताय् यलया अशोक हलय् तजिक छगु ज्याझ्वः जुयाच्वंगु दु।

यल महानगरपालिका १६ वडा कलाकार समितिया ग्वसालय् जुयाच्वंगु खः। उगु ज्याझ्वलय् नांजापि कलाकारपिन्स ब्बति कयाच्वंगु दु।

सुरेन्द्र मानन्धरया न्हूगु नेवाः म्ये “वा ग्वारा मैं वा” या म्ये संकिपा म्युजिक भिडियोया सोमबार छगू ज्याझ्वःया दथुइ म्ये संकिपा पितब्वज्या पुलांम्ह मन्त्री रामबीर मानन्धरं यानादीगु खः।

सरस्वति मानन्धर लिसेलिसें सुरेन्द्र मानन्धर, सुरेश मानन्धर व सबिना मानन्धर जाना हालादीगु उगु म्येया च्वमि व लय् चिनामि सुरेन्द्र मानन्धर खः। थ्व म्येया निंतिं जिवित जल्मीं संगीत संयोजन यानादीगु खः।

सुरेन्द्र मानन्धर, रेवन्त लाल श्रेष्ठ, रबिता बके श्रेष्ठ व मन्जिला बज्राचार्यपिन्सं अभिनय यानादीगु दु। अथेहेतुं थ्व म्येय् क्यामरा अमन महर्जन व संपादन इन्द्र मानन्धर खः।

उगु ज्याझ्वलय् नेपालभाषाया न्हापांम्ह म्युजिक भिडियो निर्देशक व सिने पत्रकार विजयरत्न असंबरें “वा ग्वारा मैं वा” म्युजिक भिडियोयात कया समीक्षात्मक खँ तयादीगु खःसा जुजुकाजि रन्जित व संगीता शाक्य व सन्चारकःमि विराजकाजी राजोपाध्याय पिन्सं नं उगु म्युजिक भिडियोयात कया नुगःखँ तयादीगु खः।

पत्रकार संघ नेपालया गुक्वःगु महाधिबेशन जुगु दु। उगु महाधिबेसनं अध्यक्षय् समीर बलामी निर्वाचित जुगु दु। बलामी ८३ मत हया निर्वाचित जूगु खः । वयकःया निकटतम प्रतिद्वन्द्वी राजन घिमिरे न ६६ मत हःगु खः। निर्वाचनय् कुल १ सय ५२ मत कुहावःगु खः।

अथेहे उपाध्यक्षय् कुबेर गिरी, संगठन उपाध्यक्षय् विजय सुवेदी आवाज, महिला उपाध्यक्षय् सुरक्षा भट्टराई, महासचिवय् रघुनाथ सापकोटा निर्वाचित जूगु दु।

खुल्ला सचिवय् नवीन गिरी, समावेशी सचिवय् उद्धव रसाइली, कोषाध्यक्षय् मनिष कार्की, सह कोषाध्यक्षय् मनिष अन्जान दाहालपि निर्वाचित जुगु दु।

समावेशी सदस्यय् महम्मद जलिम व महिला सदस्यय् सुष्मा कार्की नाप दुजलय् कृष्ण पाण्डे अनुप भट्टराई निशा बजगाई, अर्जुन गुरागाई, सिपी जैसी व सुरेन्द्र थापापि निर्वाचित जुगु खः।

यल महानगरपालिका वडा १६ कलाकार समितिं लोक, शास्त्रीय संगीतय् समर्पितपिं कलाकारपिनिगु सृजना न्ह्यब्वयाः श्रीपञ्चमी शास्त्रीय संगीत नखः हंगु दु ।

गुश्रीपञ्चमीया लसताय् यल लाय्कूलिइ जूगु उगु ज्याझ्वलय् कलाकार विशाखा शाक्यपाखें महामञ्जुश्री चर्यानृत्य न्ह्यब्वयाः न्ह्याःगु खः । ज्याझ्वलय् कलाकारपिनिगु पुचः व ज्याझ्वःया ग्वाहालिमि नेवाः सवाःयात सुभाय् पौ देछायेगु ज्या जूगु खःसा नेवाः पत्रकार राष्ट्रिय दबू केन्द्रीय समिति व नेवाः देय् दबू यल कचाया न्हूगु ज्यासना पुचःयात भिंतुना पौ नं देछाःगु खः ।

यल महानगर १६ वडा अध्यक्ष निर्मलरत्न शाक्यं लसकुस यानादीगु उगु ज्याझ्वलय् “सांस्कृतिक, सांगीतिक ख्यलय् थीथी ज्या यायेगु झ्वलय् शास्त्रीय संगीतया थुगु ज्याझ्वः छगू न्हूगु आयाम जूगु” खँ न्ह्यथनादिगु खः। ज्याझ्वःया मूपाहां यल महानगरपालिकाया मेयर चिरिबाबु महर्जनं अमूर्त सम्पदा संरक्षणय् ललितपुर महानगरपालिका १६ वडाया भूमिका नेतृत्व यानादीगु न्ह्यथंसें महानगरपालिकां थुगु ख्यलय् अझ धिसि धायेक पलाः छीगु खँ कनादीगु खः ।

ज्याझ्वलय् संगीतया माध्यमं ह्यूपा थनेगु नितिं सक्रिय “प्लइङ फर चेञ्ज नेपाल”पाखें मीना प्रजापति, उषा तिवारी, भक्तबहादुर कार्की, सुमीत श्रेष्ठ, आषिश शाक्य, कृष्णदेवी महर्जन, सन्तु महर्जन व सविना महर्जनपिन्सं सरस्वती वन्दना हालादीगु खःसा नेपालभाषाया लोकं ययेकूगु म्ये “सिरसाया हेकु” व “व छु गल्ली” हनाः भिन्तुना महर्जन, श्रीजन महर्जन, आगमन महर्जन, सुष्मा श्रेष्ठ, दिपेश तामाङ, निरञ्जना मानन्धर, पदम आले, भिदी क्षेत्री व आकाश तामाङं बाँसुरीया धूनय् फोकलोरी न्ह्यब्वयादीगु खः। थुकी मगःखिं थानादीम्ह सीजन महर्जन, धिमे थानादीम्ह प्रतीक महर्जन, टेन्बुरिन थानादीम्ह रामचन्द्र भण्डारी, ताः थानादीम्ह समन महर्जन, गितार थानादीम्ह पेशन श्रेष्ठ खः ।

थुगु पुचःया लोकंह्वाःगु म्ये “सिरिसिरि फसं जितः”य् विपाशा महर्जन, अलोयाना डंगोल, सुकृति बज्राचार्य, दिपिका महर्जनं प्याखं हुलादीगु खः । ज्याझ्वःया निगूगु न्ह्यब्वयाकथं वाद्य शिरोमणी गणेशलाल श्रेष्ठया नामय् नीस्वनातःगु वाद्यशिरोमणी संगीत घरानां राग वृन्दावणी सारंग न्ह्यब्वयादिल । थुगु घराना निरन्तर न्ह्याकेगुलिइं सक्रियम्ह शैलेन्द्र शाक्यं तबला थानादीगु थुगु न्ह्यब्वयाय् युनिका बज्राचार्य, जोया महर्जन, स्वीकृति महर्जन, युस्ना महर्जन, रुपक महर्जन, अप्रिलशा महर्जन, आहाना महर्जन, निष्ठा अमात्य, शिक्षा श्रेष्ठ, रुजेन धाख्वा व निभाः बज्राचार्यं भ्वाइलिन वादन यानादीगुख खः ।

नेवाः लोक संगीतया अभिलेखीकरण यासें संरक्षण व प्रचारया नितिं सक्रिय जुयाच्वंगु प्रोजेक्ट बाजा नेपालं न्ह्यब्वःगु राग चारुकेशीं ज्याझ्वलय् रौनक तनाबिल । थुगु न्ह्यब्वयाय् सरोद वादन सुरेशराज बज्राचार्य, मिलन तण्डुकार बेला वादन, तबला, खिं वादन विपु श्रेष्ठं यानादीगु खः । थुगु हे पुचलं सुरेशराज बज्राचार्यया श्रृजना “एराउन्ड द जंगल” नं न्ह्यब्वःगु खःसा थुगु न्ह्यब्वयाय् विजय कायस्थं बबूचा थानाः खः । प्रदेशसभा सांसद रामकृष्ण चित्रकारयागु नं ब्वति दुगु थुगु ज्याझ्वः कलाकार समितिया संयोजक सुरजवीर बज्राचार्य, सचिव अनुप शाक्य व कोषाध्यक्ष सलोना बज्राचार्यं न्ह्याकादीगु खः ।

नील शाक्य, भूपेन्द्र बज्राचार्य, मोहिद्दिन खान, अमोघवीर बज्राचार्य, श्रुयति शाक्य, अमर चित्रकार, निशिला शाक्य, सिम्रन शाक्य समितिया दुजःपिं खः । समितिं वरिष्ठपिन्त हना, सक्रियपिन्त दबू व नवप्रतिभापिं मालेगु प्रशिक्षित यायेगु ज्या यानाः वयाच्वंगु दुसा झीगु संस्कृतिइ सांगीतिक (गायन, नृत्य, अभिनय) परम्परा मद्दिक्क न्ह्याकेगु नितिं नं ज्या यानाः वयाच्वंगु जुल ।

यल महानगरपालिका १६ वडा कलाकार समितिं ससुपूजाया लसताय् श्रीपञ्चमी शास्त्रीय नखःया ग्वसा ग्वःगु दु ।

थ्व हे वइगु विहिवाः यलया मंगःया दरवार क्षेत्रया कात्ति दबुलिइ थुगु ज्याझ्वः जुइत्यःगु खः। ज्याझ्वलय् लोकंह्वाःगु सांगीतिक पुचः प्रोजेक्ट बाजा नेपाल, प्लेयिङ फर चेञ्ज नेपाल व वाद्यशिरोमणी संगीत घरानां शास्त्रीय संगीतया थीथी सृजना न्ह्यब्वइसा १६ वडा कलाकार समितिया हे ग्वसालय् जूगु हुलाप्याखं कासाया सिरपा त्याकामि विशाखा शाक्यं मञ्जुश्री चचाप्याखं न्ह्यब्वयादी ।

सनिलया ५ बजे न्ह्याकेगु धयातःगु थुगु ज्याझ्वलय् नवनिर्वाचित नेवाः पत्रकार राष्ट्रिय दबू केन्द्रीय समिति व नेवाः देय् दबू यल कचायात भिंतुना देछायेगु ज्याझ्वः नं दुगु ग्वसाः खलः समितिया कजिं सुरजवीर बज्राचार्यं लहनान्युजयात कनादिगु दु । १६ वडाया अध्यक्ष निर्मलरत्न शाक्यया नायःसुइ जुइत्यःगु खः।

कलाया विकास व कलाकारपिन्त हःपाःया नितिं निदँ न्ह्यः यल महानगरपालिका १६ वडां कलाकार समिति नीस्वंगु खःसा थुकिं अनलाईन म्ये व हुलाप्याखं कासा, येँया पुन्हीया लसताय् सांस्कृतिक ज्याझ्वः, होलीया मेला, न्हूदँ हना सांस्कृतिक ज्याझ्वः, न्ह्याकाः वयाच्वंगु दुसा १६ वडाया कलाकारपिन्त कला प्रशिक्षणया नितिं कला स्यनाकुथि (पाठशाला) नं न्ह्याकाः वयाच्वंगु दु ।