युवा निर्देशक अभय डंगोलया निर्देशनय् ऐतिहासिक नेपाली संकिपा‘अंगुलीमाल’ निमार्ण जुइगु जुगु दु।

तत्कालीन ईलय् मखुगु लँ वना हिंस्रक अंगुलीमालयात सिद्धार्थ गौतम बुद्धं सद्मार्गया लागि प्रेरित यागु बाखनय् थुगु संकिपा निर्माण जुइत्यंगु खः। फोएसजी प्रोडक्सन व एए स्टार मिडियाया मंकाः व्यानरय् सुरेन्द्र श्रेष्ठं थुगु संकिपा निर्माण यायेत्यंगु खः।

म्हिगः मध्यपुर थिमिइ छगु ज्याझ्वः दथुइ संकिपा निर्माण यायेगु घोषणा यासे निर्माता व अंगुलीमाल बाखनय् दयकेगु पत्रय् हस्ताक्षर जुगु खः। ‘संकिपा वइगु मोहनी व स्वन्ति दथुइ शुभमुहूर्त याये।’ धका निर्माता श्रेष्ठं धागु खः। ऐतिहासिक बाखंयात ल्याय्म्ह निसे बुरा बुरिपिन्त तकच यइगु कथं निर्माण यायेगु योजना दु धका श्रेष्ठं धागु खः।

उगु कथं हे एनिमेसन, भिएफएक्स व प्राविधिक रूपं बालाक्क दयेकगु लागि कलाकारपिनिगु न अडिसन कायेगु तक तयारी दु धका धागु दु। ‘बुद्धया जन्म नेपालय् जुगु खः। तर थुगु विषय अन्तर्राष्ट्रिय स्तरय् गलत प्रचार जुयाच्वंगु दु।

नेपाली भाषां हे निर्माण जुइगु सिद्धार्थ गौतम बुद्ध नाप सम्बन्धित अंगुलीमाल संकिपा थुगु भ्रम चिलावनिइ धका धागु खः। देशविदेशय् संकिपा प्रदर्शन याये धुका सकारात्मक सन्देश वनिइ।’ निर्देशक डंगोलं दाबी यागु दु।

रेडियो नेशन १०३.९ मेगाहर्य्ज न्ह्याना वया च्वंगु नेवाः ज्याझ्वः रेडियो झीगु सः १०० दिं पुवंगु लसता् छगू ज्याझ्वः जुगु दु।

झीगु सः पुचःया ग्वसालय् टिभि ज्याझ्वः कथं नाइस टेलिभिजनय् झीगु सः, अनलाइनन्युज कथं झीगुसःडटकम व रेडियो ज्याझ्वः कथं रेडियो झीगु सः न्ह्याका वया च्वंगु खः। नेवाः सन्चार अभियान कथं थीथी सन्चार माध्यमय् नेवाः भाय्या ज्याझ्वः न्ह्याका वया च्वंगु झीगु सः पुचःया रेडियो झीगु सः ज्याझ्वः २०७८ सालया बैशाख १ गतेनिसें न्हयाःगु खःसा श्रावणया ७ गते सच्छिन्हू पूवंगु खः ।

सच्छि दिं पूवंगु लसता कथं जुउगु ज्याझ्वलय् झीगुसः पुचःया कजि विजयरत्न असंबरें नीन्यादँ न्ह्यः २०५३ साल भदौ १ गते रेडियो नेपालया १०० मेगाहर्जय् गुडनाइट एफएमय् थःपिनिगु कुतलय् न्ह्याकुगु नेपालभाषा ज्याझ्वःया पलाः यात लुमंकादिल। वयकलं रेडियो नेशनय् न्ह्याना च्वंगु रेडियो झीगुसःया पलाः धइगु ज्याझ्वः न्ह्याकामि पिनिगु कुतलं ताःलागु खःसां न्यनामिपिंनिगु हःपाः व विज्ञापनदाता पिनिगु तिबःया लिच्वः खः धका धयादिल। ज्याझ्वलय् रेडियो नेशन १०३.९ या कजि पुरुषोत्तम बस्नेतं स्वनिगः धइगु नेवाः तयेगु म्हसिका खः धयादिल।

थःगु एफएमय् नेवाः ज्याझ्वः तये दया थःयात लय्तागु दु धका धयादीगु खः। रेडियो झीगु सः यात थीथी कथं ग्वाहालि याना वया च्वंपिन्त सुभाय् देछानादीसे विशिष्ट पाहाँ पुरुषोत्तम बस्नेत पाखें मतिनाया चिं नं लःल्हागु खःसा रेडियो झीगु सः पुचःपाखें नायः राजु राजदेव बज्राचार्यं रेडियो नेशनया पुरुषोत्तम बस्नेत यात खादां न्येका व कजि असंबरें मतिनाया चिंलःल्हाना सुभाय् देछानादीगु खः।

रेडियो नेशन १०३.९ मेगाहर्जय् सुथसिया ९ ताः ईलं निसें १० ताः ईतक न्हिं छघौ न्ह्यानाच्वंगु खः।

हाकुमैंचा तुइसे च्वंका गन वने त्यना
न्यासेचाचां न्याकुं काकां सुइत ल्वःवंके त्यना
ब्याः याये नं त्यल मनं छंतः ल्यल
मेपिं सुं संसारय् स्वय् हे मयल ।

सुरजवीर बज्राचार्यं च्वयादीगु व हालादीगु न्हूगु म्ये ‘हाकुमैंचा’या म्यूजिक भिडियो पिदन । थिमिया प्यासिफिक फुड ल्याण्डय् जूगु थुगु ज्याझ्वः मध्यपुर थिमि नगरपालिकाया मेयर मदनसुन्दर श्रेष्ठया मूपाहाँसुइ जूगु खः ।

ज्याझ्वःया मूपाहां मेयर श्रेष्ठं नेवाः भासं सृजना जुइगु म्येया व्यावसायीकरण यायेमाःगुपाखें बः बियादीगु दु । गुगुं समुदाय, वर्गया नुगःखँ सांगीतिक रुपं पिथनां अन्तर्राष्ट्रियकरण यायेफइगु खँ नं वयकलं तयादीगु खः । म्येया म्यूजिक भिडियोय् थीथी ऐतिहासिक, सांस्कृतिक महत्वं जाःगु सम्पदाया प्रचार प्रसारय् तकं योगदान जुइगु धयादिसें नेपालभाषायात तिबः बीगु म्येया नितिं ग्वाहालि यायेत थः सदां प्रतिवद्ध जुइ धयादिल ।  

म्येच्वमि व हालामि सुरजवीर बज्राचार्य भम्चा काःवनीबलय् नेवाः म्ये हालेगु चलनकथं थुगु म्ये च्वयागु खँ कनादिल । मेगु म्येया लसय् च्वयादीगु ‘हाकुमैंचा’ म्ये वरिष्ठ संगीतकार जूगल डंगोल संगीतय् थुगु रूपय् पिदंगु खँ कँसें वयकलं संगीतकार डंगाेलयात सुभाय् नं देछानादिल ।  

‘हाकुमैंचा’ म्यूजिक भिडियो बालमुकुण्ड प्रजापतिया निर्देशनय् तयार जूगु खःसा देवेन्द्र प्रजापतिं  छायाँकन व सम्पादन यानादीगु खः ।  

नेपाल सांस्कृतिक उत्थान परिषदया पिथना थुगु म्यूजिक भिडियोय् मूभूमिकाय् अनु खड्का, रमेश बल्ल व आशाराम शिल्पकारं म्हितादीगु खःसा कलाकारपिं डेरिक्या छन्त्याल, आरती भासिमा, अस्मिता मानन्धर, लिजा व निशा प्रजापतिं नं अभिनय यानादीगु दु । दिपक बज्राचार्य व सागर बनमालां  कोरियोग्राफी यानादीगु, आशा तामाङं समा यानादीगु थुगु म्यूजिक भिडिया महेशप्रकाश हाडाया कजिसुइ निर्माण जूगु खः ।  

ग्यानापु स्टाइल, बुदिंया भिंतुना म्ये हालाः चर्चाय् वःम्ह भाजु बज्राचार्यं ‘तसकं यःम्ह’ म्येपाखें ‘दकले बांलाम्ह म्येहालामिकथं नेपालभाषा स्टार म्यूजिक भिडियो अवार्ड’ व निभाः म्ये धेधेबल्ला कासाय् नं दकलें बांलाम्ह म्येहालामिया सिरपा त्याकादीधुंकूगु दु ।

म्येच्वमि, हालामि भाजु बज्राचार्य नेवाः पत्रकार राष्ट्रिय दबूया केन्द्रीय नायः नं खः ।

म्ये स्वयेगु नितिं लिंक https://youtu.be/8JdBinE92JM

नेपाःया संकिपाख्यलय् चम्सुरी नामं लोकह्वाम्ह नाप नेपालभाषा संकिपाःख्यलय् नं लोकंह्वाम्ह कलाकार पल्पसा डंगोलयात जँलास्येँ समस्या वयाः जुइवं अस्पताल भर्ना जुया वासः यानाच्वंगु दु।

कलाकार पल्पसा डंगोलया तःधिम्ह म्ह्याय् लुनिभाः डंगोलं बिगु जानकारी कथं पल्पसा डंगोलया किड्नी सम्बन्धी ल्वय् न्हापां निसें जुयाःच्वंगु व खान पानय् तसकं हे ध्यान तयाच्वंगु खः ।

तर नं आकाझाकां किड्नी समस्याः वया अस्पताल हे भर्ना याये माःगु खः। आः वय्कःयात टिचिंग अस्पतालय् ३०५ नम्बरया बेडय् भर्ना याना डाय्लासिस् यानाच्वंगु खबर नं लुनिभाः डंगोलं ब्यूगु दु ।

पल्पसा डंगोल ताः ई न्ह्यः निसें मनोरंजन क्षेत्रय् संलग्न जुयाच्वंनादीगु खःसा वयकलं काठमाडौं – ए मिरर इन द स्काइ नांयागु स्पेनीस फिल्म व मसान नांयागु चर्चित खस नेपाली फिल्म नं म्हितादीगु दु अले ब्याहा यानागु लच्छि मदुनि नांयागु नेवाः फिल्म निर्माण व निर्देशन नं यानादीगु दुसाः वयकया बुद्धकालीन एतिहासिक सँकिपा घोषक पिदनेत तयार जुइ धुंकुगु दु।