कल्पना श्रेष्ठया छपु म्येया म्युजिक भिडियोया प्रिमियर सम्पन्न जुःगु दु । उगु ज्याझ्वःया मूपाहाँ मध्यपुर थिमि नगरपालिकाया मेयर मदन सुन्दर श्रेष्ठं छगु ज्याझ्वः दथुइ कल्पना श्रेष्ठया म्ये ‘छंगु लँ स्वइच्वंगु मिखा’ बोलया म्येया म्युजिक भिडियो प्रिमियर यानादिगु खः ।

ज्याझ्वलय् मेयर श्रेष्ठं नगरपालिकाका कलाकार तयेगु प्रतिभा पितब्वये मखंका च्वने मालि मखु धका धासे कलाकारिताख्यःयात फुचाःगु ग्वाहालि यायेगु प्रतिबद्धता प्वंकादिगु खः। वयकलं कलाकार, कासाख्यलं मध्यपुर थिमिया इज्जत तयाच्वंगु दु धासे वयकपिन्त ग्वाहालि यायेगु जनप्रतिनिधिया कर्तव्य खः धका धयादिल । ज्याझ्वलय् साहित्यकार शशीकला मानन्धरं लसकुस न्वचु तयादिगु खःसा वरिष्ठ सिने पत्रकार नाप नेपालभाषा म्युजिक भिडियोया न्हापाम्ह निर्देशक  विजयरत्न असंबरें  प्रिमियर जुउगु म्येया समीक्षा यानादीगु खः ।

बयकलं थौंकन्हे नेपालभाषाया म्यूजिक भिडियो  ख्यलय् लगातार म्युजिक भिडियो पिहावया च्वंगु छगु लसताया खः धका धका धयादिगु दु। थौंकन्हे नेपालभाषाया म्यूजिक भिडियोया ल्याः जक मखसे गुणस्तरया नं बिकास जुउगु   म्येहालामि कल्पना श्रेष्ठं थःम्हेसिया थुगु म्युजिक भिडीयोया लागि यक्को मिहिनेत यानागु खँ कनादिल खः ।

उगु म्युजिक भिडियोया छायाङ्कन व सम्पादन मनोजरत्न शाही, निर्देशन राजन शाहीं यानादीगु खःसा कलाकारपि रविन्द्र शाही, रेश्मी महर्जन नाप कल्पना श्रेष्ठं अभिनय यानादीगु दु । म्ये विजय कायस्थं लसय् हनादीगुलि जुगल डंगोलं संगीत संयोजक व दर्शनबीर शाक्यं  च्वयादीगु खः।

किपु नगरपालिकाया ग्वसालय् जूगु किपू दुनेया बाखं सम्वन्धी चीहाः संकिपा छगु ज्याझ्वः दथुइ येँया राष्ट्रिय सभागृहलय् क्वचाःगु।

उगु ज्याझ्वलय् मूपाहाँ पर्यटन तथा संस्कृति मन्त्री भानुभक्त ढकालं छगु ज्याझ्वः दथुइ चीहाः संकिपा कासाया उलेज्या यानादीगु खः। कासाय् न्ह्यगु संकिपा दुथ्याःगु खः। कासाय् डेल्टा मल्टिमिडिया न्ह्यब्बःगु साःगः न्हाप लाःगु खः ।न्हापा लाग्ु संकिपा साःगःयात किपू नगरपालिकाया मेयर रमेश महर्जनं सिरपाः कथं छगु लखं व हनापौ लल्हागु खः। 

अथेहे ल्यु सिरपा नेवाः यूट्युवं न्ह्यब्बःगु आजु द्यः संकिपा लाःगु खः । ल्यु लागु संकिपायात उपमेयर सरस्वति खड्कां ७५ द्धः व हनापौ लल्हागु खः। अथेतु लियाल्यु लाखय् पाःयात ५०द्धः व हःपाः कथं न्ह्यखा सिंयात २५ द्धः व हनापौ लल्हागु खः। ब्वति काःगु संकिपायात १० द्ध तका दां लः ल्हःगु खः ।

किपू नगरयात कया दय्का तःगु चीहाकःगु संकिपा कन्ह्य छगु ज्याझ्वः दथुइ क्यने ज्या जुइत्यःगु दु ।

किपू नगरपालिकाया ग्वसालय् किपू नगर दुनेया ऐतिहासिक, सांस्कृतिक, धार्मिक किपू देय् यात कया दय्का तःगु नेपालभाषा चीहाः संकिपा कासा कन्ह्य छगु ज्याझ्वः दगुइ येँया राष्ट्रिय सभागृहया हलय् क्यनिइगु ज्या जुइ त्यःगु दु ।उगु चीहाः संकिपा कासाय् न्ह्यगु सकिपा दुथ्याःगु दु ।

चीहाः संकिपाया न्हापांगु क्यनेज्या (प्रिमियर) व सिरपाः लःल्हायेगु कन्ह्य शनिवाः जुइ त्यःगु खः।

नेवाः एच.डी. टेलिभिजनपाखें न्ह्यः ब्बया वयाच्वंगु नेपालभाषा संगीत ख्यःया ज्याझ्वः नेवाः संगीत दबू ज्याझ्वः २५ ब्व  पूवंगु लसताय् छगू लसता ज्याझ्वः जुगु दु ।

उगु ज्याझ्वलय् मूपाहाँ कथं ख्यालिजुजु मदनकृष्ण श्रेष्ठं छगु ज्याझ्वः दगुइ मूपाहाँ लिसे मेमेपिं पाहापिन्सं २५ प्वाः देवा च्याकाः उलेज्या यानादीगु खः । नेवाः एचडि टिभीया अधक्ष्य नविन जोशीया सभाधक्ष्यताय् जुगु उगु ज्याझ्वलय् नेवाः संगीत दबू २५ ब्व थेकेत ग्वाहालियापिन्त हना ज्याझ्वः याःगु खः।

ज्याझ्वःया न्ह्याकामि गंगा महर्जन लसकुसयाना न्ह्यागु उगु ज्याझ्वलय् संगीतकार जुगल डंगोल, राजु सिंह, मनराजा नकःमि व धनबहादुर गोपाली, लोककवि राजभाई जकःमिपिन्सं ज्याझ्वःयां सफलताया निंतिं भिन्तुना देछानादीगु खः।