लोकंह्वाम्ह बरिष्ठ निर्देशक पवन जोशीया निर्देशनय् मेगु छगु न्हूग म्युजिक भिडियो पितब्वज्या जूगु दु।

बरिष्ठ निर्देशक जोशीया निर्देशनय् धुकु पिकु क्यने छन्त नां याःगु बोलया उगु म्युजिक भिडियो जनगायक भृगुराम श्रेष्ठं पितब्वज्या यानादीगु खः । उगु म्युजिक भिडियो पितब्वज्याय् जनगायक श्रेष्ठं थःगु पुलांगु खँ लुमंकादिसे थौं थुगु ख्यलय् सनाच्वंपिन्त सुवाः बियादिगु खः। नांजाःम्ह म्येहालामि प्रवेशमान शाक्यं म्येयात कया नुगःखँ तयादिल ।

अथेहे नेपालभाषाया न्हापांम्ह म्युजिक भिडियो निर्देशक विजयरत्न तुलाधर असंबरें थःम्हेसिनं न्हापांगु म्युजिक भिडियो यानाबलेया खँ न्ह्यथंसे पितब्वज्या जुगु म्येया समीक्षा यानादीगु उगु ज्याझ्वलय् थ्व म्युजिक भिडियोया बारे थुकिया कलाकार, म्येहालामि, च्वमि, संगीतकःमि व प्राविधिकपिन्सं नं थःथःगु खँ तयादीगु खः। ताराराम मुनकःमिं हालादीगु थुगु म्ये विकासरत्न कंसाकारं च्वयादीगु खःसा अनिल तुलाधरं लसय् हनादीगु खः ।

थुके  नेपालभाषा संकिपाख्यःया सुपरस्टार रुपेन श्रेष्ठ थक्वाःमि व थौंकन्हेया चर्चित कलाकार नाप मोडल आराध्यालक्ष्मी खड्गीं अभिनय यानादीगु दुसा थुकिया क्यामेरा पर्सन व सम्पादक सोहन मानन्धरं यानादीगु खः ।

हरिसुन्दर लाखे श्रेष्ठया ‘भगवान खः मांबाः’ म्येया म्युजिक भिडियो सार्वजनिक जूगु दु । थिमिइ जूगु छगू ज्याझ्वलय् नेपालभाषाया म्ये ‘भगवान खः मांबा’ या म्यूजिक भिडियो मध्यपुर थिमि नगरपालिका प्रमुख मदनसुन्दर श्रेष्ठं लोकार्पण यानादिल । ज्याझ्वलय् नवासें नगर प्रमुख श्रेष्ठं सांगीतिक अभिव्यक्तियात न्ह्यागु नं समुदाय, वर्ग व भाषाय् दय्काः अन्तर्राष्ट्रियकरण याय्फइगु धासें मांअबुप्रति समर्पित हरिसुन्दरया थुगु म्येयात भाइरल दय्केत मुक्कं नगरपालिकां ग्वाहालि याय्गु आश्वासन बियादिल ।

वरिष्ठ गीतकार सुवासचन्द्र ढुंगेल व वरिष्ठ साहित्यकार लिसें प्राज्ञ ध्रुव मधिकर्मीं म्येया समीक्षा यासें म्यें विचलन वय्धुंकूगु झीगु समाजय् मांअबुप्रतिया कर्तव्यबोध याकीगु दाबी यानादिल । ज्याझ्वलय् ख्यालि जुजु मदनकृष्ण श्रेष्ठयात ‘कला दीर्घसेवा सम्मान’ अले वरिष्ठ संगीतकार रत्न बेहोसी (बज्राचार्य) यात ‘संगीत दीर्घसेवा सम्मान’ ब्यूगु खः । लिसें नगरया सच्छि दँया ज्येष्ठ नागरिक (मिजं) ज्ञानलाल श्रेष्ठ व १०३ दँया ज्येष्ठ नागरिक (मिसा) कृष्णमाया चक्रधरयात नं हंगु खः ।

सार्वजनिक जूगु म्येयात वरिष्ठ संगीतकार रत्न बेहोसीं लय् बियादीगु दुसा संगीत संयोजन सुरेन्द्र श्रेष्ठं यानादीगु दु । ल्याय्म्ह निर्देशक प्रदीप खड्गीं यानादीगु म्युजिक भिडियोस ख्यालि जुजु मदनकृष्ण श्रेष्ठ, रचना सिंह, यमन श्रेष्ठ, अनु महर्जन, सिजन कायस्थ, साहिल द्वारे, हरिसुन्दर लाखे श्रेष्ठ, रियान श्रेष्ठ, रोशन भासिमा, सम्यक मानन्धरं अभिनय यानादीगु दु । शंकर महर्जनया छायांकन व सुरेश ख्वाक श्रेष्ठं सह छायांकन यानादीगु दु।

नेपाली कांग्रेसया क्रियाशील नेता शैलेश शाक्य लगंबरेया च्वसाय् ‘भिन्तुना भिन्तुना नेपाः मांयात भिन्तुना’ बोलया राष्ट्रप्रेमं जाःगु म्येया म्यूजिक भिडियो सार्वजनिक जूगु दु । ये

य् छगू ज्याझ्वलय् वरिष्ठ गायक भृगुराम श्रेष्ठलिसें पूर्व रक्षामन्त्री नेपाली कांग्रेसया नेता भीमसेनदास प्रधान व ख्यालि जुजु मदनकृष्ण श्रेष्ठया उपस्थितीइ म्येया म्यूजिक भिडियो सार्वजनिक याःगु खः ।

सार्वजनिक जूगु म्येय् भूपेन्द्र बज्राचार्य व लसता बज्राचार्यं स बियादीगु दुसा संगीत व संगीत संयोजन नं भूपेन्द्र बज्राचार्यं हे यानादीगु दु । म्यूजिक भिडियोया परिकल्पना लिसें निर्देशन रवि सायमीयागु खः ।

नेपालभासा संकिपा व संगीत ख्यलय् बिस्कं म्हसीका दूगु डेल्टा मल्टि मिडियां न्हापा दय्कूगु सर्गः मिला संकिपा दय्कूगु खः ।

आः प्रदीप खड्गी व भाईकाजी महर्जन नयन मिले जुया अपीच्य नांयागु  खस नेपाली संकिपा दयेकीगु जूगु दु । थौं छगु ज्याझ्वः दथुइ यलया पूच्वय् च्वंगु क्वयना गणेद्यःया थाय् भिंसाइत यासे अपीच्य सकिपा घोषणा याःगु दु । वाङ्गमय शताब्दी पुरुष संस्कृतिविद् डा. सत्यमोहन जोशीया मूपाहाँसुइ जूगु उगु ज्याझ्वलय् पुलांम्ह मन्त्री बुद्धिराज बज्राचार्य विशेष पाहाँ कथं झायादीगु खः ।

अपीच्य संकिपाया च्वमि व निर्देशक प्रदिप खडगीं यानादीत्यःगु खः । डेल्टा मल्टि मिडिया व नेपाः च्यानल मिले जुया निर्माण यासे संकिपाया कार्यकारी निर्माता भाईकाजी महर्जन नयन अले निर्माताय् सुरेश महर्जन, धर्म महर्जन व सुदन श्रेष्ठपिनिगु नां बिया तःगु दुसा थुके शनिस शाक्य, सलोना बज्राचार्य, सुरेश महर्जन व सुरज व्यन्जनकार न्हापांखुसी खस नेपाली भाय्या संकिपाय् मू भूमिकाय् खनेदइगु जूगु दु ।

थुगु संकिपाय् सुशील राजोपाध्याय, लक्ष्मीकुमार महर्जन उदास, अन्नु महर्जनया नापं रवि गिरी व रचना सिंह लगायतया आपालं कलाकारपिन्सं थीथी भूमिकाय् अभिनय याइगु जूगु दु । थुगु संकिपाया च्वमि नापं निर्देशक प्रदीप खड्गी खःसा क्यामरा रबिन डंगोल व आयुष महर्जन, कला निर्देशक बिनेश श्रेष्ठ व सह कला निर्देशक बिबिन महर्जन, समाः पूजा शाही  व क्रियटिभ डाईरेक्टर सन्तोष केसी यानादीगु खः।