Display Style:
Column Style
सुरजबीरया 'तसकं यःम्ह' या म्युजिक भिडियो पिदन
थिंलागा सप्तमी ११३९ (दिसेम्वर २९ २०१८)
वरिष्ठ संगीतकःमि अमरराज शर्माया रचना व संगीतय् लोकंह्वाम्ह गायक सुरजबीर बज्राचार्यं हालादीगु 'तसकं यःम्ह' म्येया म्युजिक भिडियो थौं छगू ज्याझ्वःया दथुइ पितब्वज्या जुल ।
थुगु म्येयात थुगु दँया दान्यहिरा सिरपा लःल्हाःबलय् दाता भाइस चान्सलर यज्ञरत्न धाख्वां दकलें यःगु म्येया सिरपा देछाःगु खः । २० दँति न्ह्यः जूगु अन्तर क्याम्पस निभाः म्ये धेधेबल्ला कासाय् नेपाल कमर्स क्याम्पसया स्वनिगः साहित्य पालापाखें ब्वति कयाः म्येहालामि बज्राचार्यं 'दकले बांलाम्ह म्ये हालामि'या सिरपा नं त्याकादीगु खः ।
बूदिंया भिंतुना म्ये कासाया राष्ट्रिय नाचघरय् जूगु ज्याझ्वलय् पिदंगु दाेहलपा म्येचाःया थुगु म्येया म्यूजिक भिडियाेय् लाेकंह्वाःपिं कलाकारपिं अाशिष्मा नकःमि व रूपेन श्रेष्ठ थक्वामिनापं म्येहालामि बज्राचार्यं नं अभिनय यानादीगु दु । ज्याझ्वलय् वयकःपिन्सं म्यूजिक भिडियाे निमार्णया झ्वलय् जूगु अनुभव नं कनादीगु खः ।
नुगःखँ तयगु झ्वलय् म्ये च्वयादीम्ह व लसय् चिनादीम्ह अमरराज शर्मां थुगु म्येया सृजनाया खँ न्ह्यथनादीगु खःसा म्यूजिक भिडिया निर्देशक रामकृष्ण खड्गीं नं थःगु अनुभव न्ह्यथनादिल। किपूया थीथी थासय् सुटिङ जूगु म्यूजिक भिडियाे छायाँकन व सम्पादन साेहन मानन्धरं यानादीगु खः ।
थुगु म्यूजिक भिडियाे स्वयालि संगीतकार जुगल डंगोल व बरिष्ठ सिनेपत्रकार विजयरत्न असंबरें भिंतुना देछाःसें थःगु नुगः खँ तयादीगु खः ।
सुरजवीरया अबुजु चित्रवीर बज्राचार्यया नायःसुइ जूगु ज्याझ्वः केशा प्लाजाय् च्वंगु काेयला लञ्ज एण्ड बारय् जूगु खः ।
थुगु म्ये स्वयेगु नितिं क्वयया लिंक क्लिक यानादिसँ ।
आश्रय रंजित खपया बांलाम्ह गायक
नृपेन्द्रलाल श्रेष्ठ | थिंलागा पारु ११३९ (दिसेम्वर २३ २०१८)
आश्रय रंजितयात ख्वपयाम्हे दकलय् बांलाम्ह गायक घोषणा याःगु दु । ‘जिल्लाव्यापी माध्यमिक स्तरीय एकल गायन प्रतियोगिता २०७५’ या उपाधि नाप रंजितयात उत्कृष्ट गायक घोषणा याःगु दु ।
मध्यपुर थिमिया सुप्रिम एकेडमीइ ग्वसाः ग्वगु ज्याझ्वलय् जिल्लाया नीप्यंगु ब्बनेकुथिया ३५ म्हसिया ब्बति काःगु खः
विनायक शिक्षा निकेतनया विद्यार्थी रंजितं कर्णदासया ‘ठुला ठुला महल होइन’ बोलया म्ये हाला ३४ म्ह प्रतिस्पर्धीयात ल्युने लाकुगु खः ।
उगु ज्याझ्वलय् सिद्धार्थ विद्यापीठया शिर्षक भट्टराई ल्यू, ग्लाडस्टोन एकेडमीया निखिला बस्नेत लियाल्यु व चाणक्य माध्यमिक विद्यालयया डेविड खड्गीयात हःपा सिरपा लाःगु खः ।
कासाय् वरिष्ट संगीतकार राजु सिंह नाप चर्चित गायिका प्रास्ना शाक्य निर्णायक मण्डलय् च्वनादीगु खः ।
उगु ज्याझ्वलय् शिक्षासेवी रामकृष्ण दुवाल, निजी विद्यालयपिनिगु संगठन हिसानया केन्द्रीय अध्यक्ष रमेश कुमार सिलवाल, हिसान भक्तपुरया अध्यक्ष शिवकृष्ण श्रेष्ठ पिनिगु न दुगु खः ।
एन्. एस ११३४ ब्यान्डया भिरको म्ये पिहावल
लहनान्युज | थिंलाथ्व पंचमी ११३९ (दिसेम्वर १२ २०१८)
एन्. एस ११३४ ब्यान्डया भिरको खोलो बोलया म्ये सार्वजनिक जुगु दु ।
नकतिनि पिहा वःगु थुगु रिकी शाक्य निर्दे्शित उगु म्युजिक भिडीयालेय् मनोज भेलें क्यामरा चले यानादगिु खः ।
उगु म्येय् सुजन शाक्यया सः, रिकी शाकयया शब्द नाप लय्, व फिरोज बज्राचार्यं (ज्योति रेकर्डस) ऐरेन्ज यानादीगु खः ।
उगु म्युजिक भिडीयोलय् नेपालभाषाया चर्चित कलाकार रुपेन्द्र श्रेष्ठ, रष्ट्रिका शाक्य, सेवा मान श्रेष्ठ, व सुदिमा शाक्य अभिनय यानादीगु खः ।
असंबरेयात ‘दुर्गादेवी पुण्य निरौला सिरपा
लहनान्युज | कछलागा द्धादशी ११३९ (दिसेम्वर ४ २०१८)
नेपाःया संकिपा ख्यःया नीजि क्षेत्रपाखें नीस्वंगु दकले न्हापांगु सिरपाः कथं कयातःगु ‘हरितारा सिरपाः’ छगू ज्याझ्वःया दथुइ लःल्हाःगु दु ।
म्हतिं नीन्याद्वः तकाया सिरपाः थुगुसी नांजाःम्ह टेलिफिल्म निर्देशक व कलाकार लय संग्रौला व नांजाःम्ह नायिका लिसें संकिपा निर्देशक रेखा थापायात लःल्हाःगु दु ।
अथेहे, म्हतिं झिद्वः तका नगद सिरपाः कथं ‘दुर्गादेवी पुण्य निरौला स्मृति सिरपाः’ थुगुसी नांजाःम्ह बरिष्ठ सिने पत्रकार विजयरत्न तुलाधर असंबरे व कलाकार उत्तम केसीयात लःल्हाःगु दु ।
उगु ज्याझ्वलय् कलाकार व उपन्यासकार शोभिता सिम्खडा, नृत्य निर्देशक शिव विक व कलाकार लिसें निर्देशक रामकाजी घिमिरेयात लःल्हाःगु दु ।
‘हरितारा सिरपाः’या संरक्षक नाप समितिया नायः मनोज शम्शेर जवराया ट्वीन्स म्ह्याय्पिं मायांका राणा व माहिका राणा या सभानायःसुइ ज्याझ्वः न्ह्याःगु खःसा वय्कःपिं निम्हं नांजाःपिं टेनिस कासामि खः ।
उगु ज्याझ्वलय् नेपाःया न्हापांगु ‘आमा’ संकिपाय् म्हितादीपिं स्वम्ह मिसा कलाकार चैत्यदेवी, भुवन चन्द, बसुन्धरा भुषालया लिसेलिसें नेपाःया न्हापांम्ह मिसाम्ह निर्देशक सुचित्रा श्रेष्ठ, न्हापांम्ह मिसा क्यामेराम्यान शबनम मुखिया व चलचित्र पत्रकार संघया उपाध्यक्ष गीता अधिकारीपिं विशिष्ट पाहाँ कथं झायादीगु खः ।
ज्याझ्वलय् ग्वसाः खलः परिवर्तन नेपालया कजि लिसें सिरपाः समितिया सदस्य सचिव मोहन निरौलां लसकुस न्वचू बियादीगु खःसा सम्मानित जूपिं रेखा थापा व लय संग्रौलापिन्सं नं नुगः खँ तयादीगु खः।
यूट्युबय् ‘नेवाः यूट्युब च्यानल’ वइगु
लहनान्युज | कछलागा द्धादशी ११३९ (दिसेम्वर ४ २०१८)
नेवाः अनलाइनन्यूजया व्यवस्थापनय् याकनं हे नेवाः यूट्युब च्यानल न्ह्याकीगु जूगु दु ।
नेवाःतय्गु भाषा, संस्कृति, व्यक्ति–व्यक्तित्वलिसें थीथी विषययात कःघानाः नेवाः यूट्युब च्यानल न्ह्याकीगु जूगु दु ।
थुगु नेवाः यूट्युबय् आःया नितिं नेवाः म्हसीका, व्यक्ति–व्यक्तित्व, चि–संकिपा, साहित्यलिसें नेपालभाषाया थीथी ज्याझ्वः न्ह्याकीगु तयारी याःगु दुसा थ्वया लिपा मद्दिक्क थीथी विषयस ज्याझ्वः तइगु जूगु दु ।
झीगु स्वनिगः, झीगु थाय्, नेवाः ल्यायम्ह, म्यूजिक भिडियो व मचातय्गु नितिं नं थीथी ज्याझ्वः दयेकीगु जूगु दु ।
नेवाः यूट्युब च्यानलं प्रोग्राम आइडी सार्वजनिक याःगु दु । याकनं हे छगू ज्याझ्वःया दथुइ नेवाः यूट्युब च्यानलया उलेज्या नं याइगु जूगु दु ।
