Display Style:
Column Style
एपिक नेपाल म्युजिक अवार्डय् विजयरत्नयात सम्मान
लहनान्युज | पोहेलाथ्व चतुर्दशी ११३९ (जनवरी १९ २०१९)
थ्वहे झ्वलय् एपिक नेपालया ग्वसालय् जूगु नेशनल एपिक नेपाल म्युजिक अवार्ड २०७५ ज्याझ्वः जूगु दुसाः उकी ६६ गु विधाय् धेंधें बल्ला याना सिरपा लःल्हागु दु ।
येँया थँबही च्वंगु छाँया कम्प्लेक्सया जूगु ज्याझ्वलय् पूर्व प्रधानमन्त्री एवं नेकपा अध्यक्ष पुष्पकमल दाहाल प्रचण्ड मूपाहाँ कथं झायादीगु खः ।
मूपाहाँ प्रचण्डं थःगु नुगः खँ तयेगु झ्वलय् थःयात संगीत ख्यः तसकं हे यःगु खँ न्ह्यथसें थुकिया विकासया निंतिं थःम्हं सदां ग्वाहालि याना च्वने धका धयादिल । मूपाहाँ प्रचण्डं थौंया एपिक नेपाल म्युजिक एवार्डय् संगीत ख्यलय् ज्वमदुगु योगदान बियादीपिं संगीतकःमिपिं मध्ये भजन सम्राट भक्तराज आचार्य व लोकगीत सम्राट कुमार बस्नेतयात हनापौ लःल्हासे अभिनन्दन यानादिल ।
ज्याझ्वलय् सञ्चारया ख्यलँ नेपाःया संगीतया ख्यलय् ज्वमदुगु योगदान ब्यूपिं सञ्चारकःमिपिन्त नं मूपाहाँ प्रचण्डं एपिक नेपाल कला पत्रकारिता सम्मान या हनापौ लःल्हाना दीगु खः ।
नांजापिं सञ्चारकःमिपिं ऋषि धमला,रवि लामिछाने,नयाँ पत्रिकाया लक्ष्मण सुबेदी , कान्तिपुर साप्ताहिकया कृष्ण भट्टराई,म्युजिकखबरया सबिता पोखरेलया नापनापं नेवाःअनलाइनन्यूजया संरक्षक विजयरत्न तुलाधर असंबरेयात एपिक कला पत्रकारिता सम्मान लःल्हागु खः ।
थौंया एवार्ड ज्याझ्वः संरक्षक राजेन्द्र पुरी खःसा ग्वसाः खलःया सदस्य सचिव गोकर्ण लामिछानें थौंया ज्याझ्वलय् लसकुुस न्वचु तयादीगु खः ।
एपिक नेपालया नायः अमन श्रेष्ठं जानकारी बियादीकथं थौंया अवार्ड ज्याझ्वःया निंतिं सिरपा क्वछीत सुमन बैरागी पण्डित व बबिता श्रेष्ठ दुगु निर्णायक मण्डलं निर्णय याःगु खँ नं ग्वसाः खलकं जानकारी ब्यूगु दु ।
अन्तर्राष्ट्रिय फिल्म फेस्टिभलय् निगु नेवाः फिल्म
लहनान्युज | पोहेलाथ्व त्रयोदशी ११३९ (जनवरी १९ २०१९)
नेपाल चलचित्र तथा साँस्कृतिक प्रतिष्ठानया ग्वसालय् थ्वहे वइगु ने.सं.११३९ सिल्लागा दुतिया (फागुनया९ गते)निसें षष्ठी (फागुन१३)तक न्यान्हुयंक जुइ त्यःगु दु ।
उगु निक्वःगु नेपाल अन्तर्राष्ट्रिय फिल्म फेस्टिभलय् “अस्तित्व” व “द मिथ जिरो” नांयागु निगु नेवाः फिल्म नं क्यनिगु जूगु दु । निक्वःगु नेपाल अन्तर्राष्ट्रिय फिल्म फेस्टिभलया औपचारिक घोषणाया निंतिं ग्वसाः ग्वःगु पत्रकार सम्मेलनय् उगु खँया जानकारी ब्यूगु खः ।
येँया पर्यटन बोर्डया हलय् जूगु उगु ज्याझ्वलय् विशिष्ट पाहाँ तसकं नांजाम्ह संकिपामि यादब खरेलं निक्वःगु नेपाल अन्तर्राष्ट्रिय फिल्म फेस्टिभल २०१९या औपचारिक रुपं घोषणा यानादीगु खःसा ल्यापटपय् स्वीच अन याना ज्याझ्वःया उलेज्या याना दीगु खः ।
पत्रकार सम्मेलनय् जानकारी ब्यूकथं थगुने पोखराय् न्हापांगु फिल्म फेस्टिभल जूगु खःसा थुगुसी येँया राष्ट्रिय सभागृह व पर्यटन बोर्डया हलय् जुइत्यंगु दु । थुगुसी संसारया ३१गु देशया मूक्कं ५९गु फिल्म क्यनिगु ग्वसाः दुसाः उकी मध्ये नेपाःया १६ गु फिल्म दुथ्यागु दु । थथे दुथ्याना च्वंगु नेपाली फिल्मय् डमरुको डण्डिबियो, पञ्चायत, भुईंमान्छे, भोर, हरि, डाईंग क्याण्डल नापं याना खुगु फिचर फिल्म दुसाः झिगु शर्ट फिल्मय् निगु नेवाः फिल्म नं लाना च्वंगु दु ।
ग्वसाः खलःया नायः के.पी. पाठकया सभानायसुई जूगु ज्याझ्वलय् जानकारी ब्यूकथं अन्तर्राष्ट्रिय ख्यः व नेपाली पानोरामा याना निगु बिस्कबिस्कं धेंधें बल्ला जुइगु उगु फेस्टिभलय् अन्तर्राष्ट्रियपाखेया बेस्ट फिचर फिल्मयात ट्रफी व द्वछी डलरया गौतमबुद्ध अवार्ड अले शर्ट फिल्मयात न्यासः डलर सहितया माउण्ट एभरेस्ट अवार्ड बीगु जूगु दुसाः नेपाली पानोरामापाखे बेस्ट फिचर फिल्मया न्येयद्व तका व ट्रफी अले शर्ट फिल्मयात नीन्याद्वः तका व ट्रफी सिरपा कथं बीगुया नापनापं नेपाली पानोरामाया धेंधें बल्लाखय् लाना च्वंगु फिल्मय् बेस्ट डाईरेक्शन व बेस्ट राइटिंगया सिरपा नं बीगु खँ दु ।
सिरपा क्वछिनाया निंतिं नेपाःया नांजाम्ह संकिपामि व राजमति संकिपाया निर्देशक नीर शाहया कजिसुई नेपाःया नांजाम्ह संकिपामि नबीन सुब्बा , स्विजरल्याण्डया आन्ने डेलेच,चीनया ल्याङ स्यावो व भारतया प्रेमेन्द्र मजुमदारया निर्णायक समिती क्वछिनातःगु खँ नं उगु ज्याझ्वलय् जानकारी ब्यूगु दु ।
उगु ज्याझ्वलय् ग्वसाः खलःया ल्यू नायः विजयरत्न तुलाधर असंबरें लसकुस न्वचु तयादीगु खःसा चलचित्र बिकास बोर्डया दुजः नांजाम्ह संकिपा निर्देशक दयाराम दाहाल,फिल्म सेन्सर बोर्डया दुजः नांजाम्ह संकिपा कलाकार सुभाष गजुरेल, निर्णायक समितीया कजि नांजाम्ह संकिपामि नीर शाह व नांजाम्ह संकिपामि यादव खरेलया नापनापं सभाया नायः के.पी. पाठकपिन्सं नेपाःया संकिपा ख्यःया थपुया निंतिं थःज्यागु अन्तर्राष्ट्रिय फिल्म फेस्टिभलया महत्वयात कया थःथःगु विचाः प्वंकादीगु खः ।
क्या फसाद संकिपाया पोस्टर पितब्बज्या
लहनान्युज | पोहेलाथ्व सप्तमी ११३९ (जनवरी १३ २०१९)
ननस्टप नेवाः फिल्म मेकर कथं चर्चित निर्देशक बासु शाहीं दयेकुगु नेपालभाषाया “क्या फसाद” न्हूगु संकिपाया दक्वः धइथें शुटिंग क्वचाःगु दुसाः उगु संकिपा आः याकनं हे स्वकुमि दथुइ वइगु जूगु दु ।
कल्प प्रोदक्सनपाखें निर्माण जुगु थुगु संकिपाया निर्माता मिन्जु शाही खः ।
छगु ज्याझ्वःया दथुइ उगु सकिपाया पोस्टरया उलेज्या यलया पूर्वसभासद मदनबहादुर अमात्य व नेपालभाषाया बरिष्ठ सिने पत्रकार विजयरत्न असंबरें मंकाः कथं उलेज्या यानादीगु खः ।
उगु ज्याझ्वलय् नुगःखँ तयेगु झ्वलय् पाहाँ बरिष्ठ सिने पत्रकार असंबरें खस नेपाली वा बलिउडया फिल्म ख्यलय् पोस्टरया फर्स्ट लुक पितब्वज्याः यायेगु चलन दुसाः नेपालभाषा संकिपा ख्यलय् थथे पोस्टर उलेज्याया चलन उलि मदुनि धका धयादिगु खः
अथेहे मूपाहाँ पूर्वसभासद अमात्यं नेपालभाषा संकिपाया बिकासय् थःम्हेसिनं फुगु ग्वाहालि यायेत थः तयार दु धका धयादिगु खः ।
मनराजा नकःमि याकः सनिल जुइगु
नृपेन्द्रलाल श्रेष्ठ | पोहेलाथ्व षष्ठी ११३९ (जनवरी १२ २०१८)
नेपाःया नांजाःम्ह संगीतकःमि मनराजा नकःमिं थुगु संगीत ख्यलय् यानाः वया च्वनादीगु योगदानयात कदर यासें नेपालमण्डल टेलिभिजनया ग्वसालय् तःजिगु सांगितिक ज्याझ्वः जुइगु जूगु दु ।
मनराजा नकःमि याकः सनिल थ्वहे वइगु माघ ५ गते शनिवाः कुन्हु येँया प्रज्ञाभवनया हलय् जुइगु खँया जानकारी बिइत छगु पत्रकार सम्मेलनयासें थुगु जानकारी ब्यूगु खः ।
नेपालमण्डल टेलिभिजनया प्रबन्ध निर्देशकं लसकुस न्वचू बियादीगु उगु पत्रकार सम्मेलनय् सह–संयोजक यल महानगरपालिकाया वडा न. १६ या वडा अधक्ष्य निर्मलरत्न शाक्यं प्रेस विज्ञप्ति ब्वनाः न्यंकादीगु खः ।
उगु पत्रकार सम्मेलनय् ख्यालि जुजु मदनकृष्ण श्रेष्ठ, प्रकाश सायमि, मनराजा नकःमि व म ग्वसाः खलःया कजि मंगल महर्जनपिन्सं थःथःगु नुगःखँ तयादीगु खः ।
माघ ५ गते जुइगु उगु ज्याझ्वलय् ख्यालिजुजु मदनकृष्ण श्रेष्ठ, संगीता प्रधान, कुन्ती मोक्तान, धनबहादुर गोपाली, जुजुकाजी रंजित, स्वयम्भूराज शाक्य, निशा देशार, टिका प्रसाईं, संगीता शाक्य, यम बराल, आनन्द कार्की, दीपक लिम्बु, सन्तोष लामा, रमना श्रेष्ठ, रत्नशोभा महर्जन, रामचन्द्र काफ्ले, सरीता शाही, मेनुका पौडेल, प्रकाश तिमिल्सिनापिन्सं संगीतकःमि मनराजा नकःमिया संगीत दुथ्याःगु म्ये हालादीगु खँ पत्रकार सम्मेलनय् जानकारी ब्यूगु खः ।
बाजं धेंधेंबल्ला कासाय् लूनिभाः धिमे खलः उत्कृष्ट
लहनान्युज | थिंलागा नवमी ११३९ (दिसेम्वर ३१ २०१८)
ख्वप जिल्लास्तरीय निक्वःगु धिमे बाजं धेंधेंबल्ला कासा २०७५या उपाधि सिरुटारया लूनिभाः धिमे खलकं त्याकूगु दु । उगु खलकं उपाधिया नापनापं झिंन्याद्वःतका नं सिरपाःकथं त्याकूगु खः ।
उगु कासाय् मध्यपुर थिमिया सिवाः साय्मि खलः ‘क’ ल्यू, ख्वप नासमनाया न्हूजः धिमे खलः लियांल्यू लाःगु खःसा सिवाः साय्मि खलःया हे मचा पुचः ‘ख’पाखें हःपाः सिरपाः त्याकूगु दु ।
दधिकोट पकान्द्वःया बाद्यगुरु कृष्णबहादुर मानन्धरयात दोसल्लां न्यय्काः हसें न्ह्याकूगु उगु ज्याझ्वलय् नगरप्रमुख बासुदेव थापां नगरया मौलिक कला व संस्कृति संरक्षणय् स्थानीय सरकारं मांकथं ग्वाहालि याय्गु प्रतिबद्धता प्वंकादीगु दु ।
ज्याझ्वलय् समाजसेवी कृष्णलाल गोजा श्रेष्ठ, शिक्षाासेवी बाबुकाजी कसपाल, प्राज्ञिक समाज दधिकोटया राजन विष्टलिसें थीथी गुथिया प्रतिनिधि, उद्योगी व्यवसायी, पत्रकार व स्थानीयबासीपिनिगु न्ह्यथनेबहःगु ब्वति दुगु खः ।
सरस्वती कला केन्द्रं ग्वसाः ग्वःगु उगु कासाय् मुक्कं झिंछगू पुचलं ब्वति काःगु खः । बाजं धेंधेंबल्ला कासाय् लूनिभाः धिमे खलः उत्कृष्ट ख्वप जिल्लास्तरीय निक्वःगु धिमे बाजं धेंधेंबल्ला कासा २०७५या उपाधि सिरुटारया लूनिभाः धिमे खलकं त्याकूगु दु ।
उगु खलकं उपाधिया नापनापं झिंन्याद्वःतका नं सिरपाःकथं त्याकूगु खः । उगु कासाय् मध्यपुर थिमिया सिवाः साय्मि खलः ‘क’ ल्यू, ख्वप नासमनाया न्हूजः धिमे खलः लियांल्यू लाःगु खःसा सिवाः साय्मि खलःया हे मचा पुचः ‘ख’पाखें हःपाः सिरपाः त्याकूगु दु ।
दधिकोट पकान्द्वःया बाद्यगुरु कृष्णबहादुर मानन्धरयात दोसल्लां न्यय्काः हसें न्ह्याकूगु उगु ज्याझ्वलय् नगरप्रमुख बासुदेव थापां नगरया मौलिक कला व संस्कृति संरक्षणय् स्थानीय सरकारं मांकथं ग्वाहालि याय्गु प्रतिबद्धता प्वंकादीगु दु ।
ज्याझ्वलय् समाजसेवी कृष्णलाल गोजा श्रेष्ठ, शिक्षाासेवी बाबुकाजी कसपाल, प्राज्ञिक समाज दधिकोटया राजन विष्टलिसें थीथी गुथिया प्रतिनिधि, उद्योगी व्यवसायी, पत्रकार व स्थानीयबासीपिनिगु न्ह्यथनेबहःगु ब्वति दुगु खः । सरस्वती कला केन्द्रं ग्वसाः ग्वःगु उगु कासाय् मुक्कं झिंछगू पुचलं ब्वति काःगु खः ।
