थुगुसी दान्यहिरा सिरपा देछाःगु ज्याझ्वलय् दाता व नेपालभाषा चान्सलर यज्ञरत्नं धाख्वां दकले यःगु म्येया सिरपा देछाःगु ‘तसकं यःम्ह’ म्येया सुटिङ क्वचाल । नीदँति न्ह्यः सुरजवीर बज्राचार्यं थुगु म्ये हालाः अन्तर क्याम्पस निभाः म्ये धेधेबल्ला कासाय् ‘दकले बांलागु सः’या सिरपा नं त्याकादीगु खः ।
 

‘दोहलपा’ म्येचाकलय् दुथ्याःगु थुगु म्ये वरिष्ठ संगीतकःमि अमरराज शर्मा च्वयादीगु अले लसय् हनादीगु म्ये खः ।

किपूया थीथी थासय् सुटिङ जूगु थुगु म्यूजिक भिडियोय् कलाकारपिं आशिष्मा नकःमि, रुपेन श्रेष्ठ थक्वाः व म्येहालामि बज्राचार्यं अभिनय यानादीगु दु ।

थुुगु म्यूजिक भिडियो रामकृष्ण खड्गीं निर्देशन यानादीगु खःसा वयकलं मतिनाया बाखनय् निर्माण जुयाच्वंगु थुगु म्येया भिडियो नेपालभाषाय् छगू न्हूगु प्रयोग खः धकाः कनादीगु दु । म्यूजिक भिडियो छाँयाकन सोहन मानन्धरं यानादीगु खःसा सम्पादन नं वयकलं हे यानादी ।

कलाकार रुपेन श्रेष्ठं निर्देशक रामकृष्ण खड्गी व लोकं ययेकूम्ह कलाकार आशिष्मानाप न्हापांगु खुसी ज्या यानागु व अतिकं लुमंके बहःजूगु खँ न्ह्यथंसें “थःत तसकं यःगु म्येया म्यूजिक भिडियोय् म्हितागुलिं नं अतिकं न्ह्याइपु ताल” धयादिल ।

म्यूजिक भिडियो सुटिङ अतिकं न्ह्याइपुक जूगु लुमंकूसे कलाकार आशिष्मा नकःमिं “थुगुसी थःगु मातृभूमि नेपाः वइगुया थ्व बांलागु चिं जुइ” धयादिल ।
 

म्येहालामि बज्राचार्यं थ्व अनुभवं अभिनय थाकुगु हे ज्या थें ताल धयादिसें “थुगु म्यूजिक भिडियो निर्माण यानाः कलाकार, प्राविधिकपिन्सं गुलि दुःख सियाः ज्या याइखनी धइगु सिल” धयादिल । वय्कलं थुगु म्यूजिक भिडियोया निर्देशक, कलाकारपिं, प्राविधिक, ग्वाहालिमिपिं सकलसित नं सुभाय् देछाना धयादिल ।

म्येहालामि बज्राचार्यया ग्यानापु स्टाइल, बूदिंया भिंतुना म्ये नं अतिकं लोकंह्वाःगु म्ये खः ।

 

म्येहालामि ध्रुबलाल ताम्रकारया याकः सलय् नेपालभाषाया म्येचा ‘धेबा’ पिदन । ताम्रकार समाजय् जूगु ज्याझ्वलय् वरिष्ठ म्येहालामि प्रेमध्वज प्रधानं म्येचाः पितब्वज्या यानादीगु खः ।

थुगु म्येचाकलय् जनकवि दुर्गालाल श्रेष्ठं च्वयादीगु, लोक गायक रत्नबहोशीया संगीत व जूगल डंगोलया संगीत संयोजनय् टाइटल म्ये ‘धेबा’ नापं म्येहालामि रीता महर्जनं व म्येहालामि ताम्रकारया सलय् राजेशमान सिँहं च्वयादीगु, सुमन कपालीया संगीत अले संगीत संयोजनय् ‘न्ह्यलय् ज्वलय् न्ह्यालबे’ व अशोक श्रेष्ठं च्वयादीगु, सुमन कपालीया हे संगीत व संगीत संयोजनय् ‘हिसि दुम्ह तुयुमैंचा’ म्ये दुथ्याः ।

निपुगु म्ये ‘न्ह्यलय् ज्लवलय् न्ह्याबलें’या म्यूजिक भिडियो नं पिदनेधुंकूगु दु गुगु राजेशमान सिँहया निर्देशनय् धिरेन शाक्य व आराध्यलक्ष्मी खड्गीं म्हितादीगु खःसा स्वपुगु म्ये हिसिदुम्ह तुयुमैंचा म्येय् ज्याझ्वलय् निरा ताम्रकार, लिजः मानन्धरं हुलाप्याखं न्ह्यब्वयादीगु खः ।

हुलाप्याखं न्ह्यब्वयादीम्ह निरा म्येहालामि ध्रुबलाल ताम्रकारया म्ह्याय् खःसा लिजः छय् खः । ज्याझ्वलय् मूपाहाँ प्रधानं म्येचाः बांलाताःगु उल्लेख यानादीसें भिंतुना देछानादीगु खःसा लोकगायक रत्न बेहोसी, संगीतकार व संगीत संयोजक जूगल डंगोलं म्ये निर्माणका अनुभवलिसें थःगु नुगःखँ तयादीगु खः ।

ताम्रकार समाजया नायः रविन्द्रराज ताम्रकारया नायःसुइ जूगु थुगु खःसा ज्याझ्वलय् समाजया निर्वतमान नायः अच्यूतकृष्ण ताम्रकार, पुलांपिं नायःपिं धर्मकृष्ण ताम्रकार, श्यामगोविन्द्र ताम्रकारं नं पाहाँकथं आशन ग्रहण यानादीगु खः ।

उग्रचण्डी ए जेड स्टोर, हौगः यलया ग्वाहालिइ थुगु ज्याझ्वः थुगु ज्याझ्वलय् समाजया न्वकू विनोद ताम्रकारं लसकुस यानादीगु खःसा सभानायः समाजया नायः रविन्द्रराव ताम्रकारं सुभाय् देछानादीगु खः ।

सुरजवीर बज्राचार्यंं न्ह्याकादीगु ज्याझ्वलय् म्येचाकलय् दुथ्याःगु म्ये च्वयादीपिं, संगीत तयादीपिं, संगीत संयोजन यानादीपिं, म्यूजिक भिडियो निर्माणय् दुथ्याःपिं व ग्वाहालि यानादीपिन्त लुमन्ति चिं नं देछाःगु खः ।