Display Style:
Column Style
‘जि नेवाः झी नेवाः’ म्येचाः पिदन
लहनान्युज | गुंलाथ्व चर्तुदशी ११३८ ( अगष्ट २५ २०१८ )
आनन्द रत्न बज्राचार्यं च्वयादीगु ‘जि नेवाः झी नेवाः’ मुक्कं १५ म्ये दुथ्याकातःगु नेवाः सिडि म्येचाः थौं शनिवाः छगु ज्याझ्वःया दथुइ येँया क्षेत्रपाटी पार्टी पालेसय् पितब्वज्या जूगु दु ।
मूपाहाँ नेपाःया गोल्डेन भ्वाइसया नामं म्हसीका तःम्ह वरिष्ष्ठ म्येहालामि प्रेमध्वज प्रधानं सिडि पितब्वज्या यासे संगीतकार, म्येहालामि सकसितं हनापौ नं लःल्हानादीगु खः ।
थुगु म्येचालय् मनराजा नकःमि, विजेन श्रेष्ठ, हरिशरण साय्मि, राजु सिंपिसं लय् चिनादीगु खःसा जुजुकाजी रञ्जित, सतिश महर्जन, निशा देसार दिपा महर्जन रत्नशोभा महर्जन लगायत सःतयादीगु खः ।
सुरजवीर बज्राचार्यं न्ह्याकादीगु उगु ज्याझ्वलय् च्वमि बज्राचार्यं लसकुस न्वचू तयादिसे थुगु म्येचाः पिथनेत ग्वहालि यानादीपिं थः जहान नानु बज्राचार्य लगायत सकलसित सुभाय् देछानादीगु खः ।
नुगःखँ तयेगु झ्वलय् मूपाहाँ प्रधानं न्हापाया अनुपातय् थौंकन्ह्य नेवाः म्येत आपलं पिदनाच्वंगु लसताया खँ हे जूगु न्ह्यथंसे न्हापा न्हापा छपु म्ये रिकर्ड यायेत भारतया कलकता लगायत थीथी थासय् वनेमाःगु तसकंहे थाकुगु अवस्था, आः नेपाः दुने हे रिकर्डिङया नितिं बां बांलागु प्रविधिया विकास जुइ धुंकूगुलिं अझ फयांफछि अप्वः नेवाः म्येत पिथनेमाःगु खँ कनादिल ।
बुखँ नेवाः सूचना केन्द्र
किपा राजेन्द्र रञ्जित
चीहाकगु संकिपा कासा क्वचाल
लहनान्युज | गुंलाथ्व द्धादशी ११३८ ( अगष्ट २३ २०१८ )
नेपालभाषा चीहा संकिपाः कासा बिहीवाः येँया विश्वज्योति हल जमलय् छगु ज्याझ्वः यासें क्वचाःगु दु । उगु कासाय् मुक्कं १० गु संकिपा न्ह्यब्वःगु खः ।
मूपाहाँ नेवाः न्ह्यलुवा मानव अधिकारवादी पद्मरत्न तुलाधरं उगु कासाय् हासः मदुगु सः न्हाप, द मिथ जिरो ल्यू, भकुंग्वारा ख्याः व अस्तित्व लियांल्यू लाःगु चीहाः संकिपाया प्रतिनिधिपिन्त जनकवि दुर्गालाल प्रतिष्ठान, अमेरिकापाखे ७५ द्वः तका, ५० द्वः तका, व २५÷२५ द्वः तका व दसिपौ मुक्कं प्यंगू सँकिपाःया नितिं लःल्हाःगु दु ।
पवित्र कसाःनं न्ह्याकूगु उगु ज्याझ्वलय् ग्वसाः खलः पाखें सुरेश किरण मानन्धरं संकिपाःया बारे थःगु नुँगः खँ तयादीसे नेवाः लिच्वः, झी नेवाः हे जुइ, म्हसीकाः, स्वचेतना, मांभाय्, यांभाय् मुक्कं ६ गू चीहा संकिपाःयात हःपाः सिरपाःकथं म्हतिं न्याद्वःतका व दसिपौ नं मूपाहाँ तुलाधरं लःल्हाःगु दु ।
अथेहे मेगु कासाया नितिं नेपालभाषां पिदने धुंकूगु छुंनं साहित्यिक कृतियाबारे संकिपा दयेके फइगु व उगु संकिपा नेपाल सम्बत ११३८ तछलागा आमाइ तकया दुने दुथ्याकेमाःगु खँ नं ग्वसाःखल पाखें घोषणा याःगु दु ।
बुखँ नेवाः सूचना केन्द्र
किपा अमिर मैया रञ्जित
सुधिर ख्वविया याक चिनाखँ ब्बनेज्याझ्वः
नृपेन्द्रलाल श्रेष्ठ | दिल्लागा चर्तुदशी ११३८ ( अगष्ट १० २०१८ )
नेपालभाषा नाप खस भाषा तक थःगु प्रभाव लाके फुम्ह कवि सुधिर ख्वविया याक चिनाखँ ब्बनेज्याझ्वः थौं जुइ त्यंगु दु ।
नेपालमण्डल साहित्य प्रतिष्ठानया ग्वसालय् उगु ज्याझ्वःसाझा पार्टी प्यालेस यलया लगं ख्यलय् जुइ त्यंगु खः ।
लहनान्युजलिसे खँ ल्हानादिसे कवि सुधिर ख्वविं थःगु थ्व न्हापागु याक चिनाखँ ब्बने ज्याझ्वलं थः तसकं उत्साहित जुगु धयादीसे अवसर बियादीगुलि ग्वसाः खलः यात सुभाय् न बियादीगु दु ।
थौंया याक चिनाखँ ब्बने ज्याझ्वलय् नेपालभाषाया १६ गु व खस भाषाया २ गु चिनाखँ ब्वने ग्वसाः दु ।
कवि सुधिर ख्वविं चिनाखँ ४ गु, गजल १, हाइकु २ व बाखंया छगु सफू पिथने धूकुगु दु ।
नेपालभाषाया ख्यलय् थःथे ज्याझ्वः कम जक जुगु खने दु । कवि सुधिर ख्वविया थ्व दकलय् न्हापांगु याक चिनाखँ ब्बनेज्याझ्वः खः ।
थुगु ज्याझ्वःया लाइभ लहनान्युजपाखें प्रत्यक्ष न जुइगु ज्याझ्वः दु ।
https://www.facebook.com/lahananews/videos/478557325942045/?t=3
संस्कृति व स्वास्थ्यया नितिं – धिम्बा
लहनान्युज | दिल्लागाः गुरूपुन्ही ११३८ ( जुलाई २७ २०१८ )
नेवाः परम्परागत बाजा धिमे मिस्तय्सं नं थायेज्यू धकाः स्यनाः न्हूगु युगया शुरुवात याःपिं निम्ह गुरुपिन्त हंगु दु । धिम्बा डान्स एण्ड मोरं गुरु पूर्णिमाया दिनय् थुकथं हंगु खः ।
यलया बालकुमारीइ गुइतः दोमारय् जूगु उगु ज्याझ्वलय् गुरुपिं किसलाल महर्जन व कान्छाभाई महर्जनयात हनेज्या जूगु उगु ज्याभ्mवः धिम्बा डान्स एण्ड मोरया परिकल्पनाकार, नायः व गुरु सुरोज महर्जनया सभापतित्वय् जूगु खः ।
यलय् न्हापांगुखुसी धिमे थानां प्याखं हुलादीपिं मिसा कलाकारपिं मीना महर्जन, सानुमैया महर्जन, रोशनी महर्जन, शान्ति महर्जन, अनिता महर्जन, सीता महर्जन, अनिता महर्जन, रजनी महर्जनयात नं थुगु ज्याझ्वल् हंगु खः ।
ज्याझ्वलय् थःगु नुगःखँ तयेगु झ्वलय् धिम्बा स्यनेगु नितिं थाय् बियाः ग्वाहालि यानाच्वंगु ब्वनेकुथिया लिटिल फ्लावर स्कुलया अध्यक्ष लक्ष्मण महर्जनं संस्कृतिया संरक्षणया नितिं आधुनिकीकरण माः धयादिसें थुकथं न्हूगु सोचं न्ह्याःगु धिम्बाया थुगु अभियानय् थःगु ब्वनेकुथिं न्ह्याबलें ग्वाहालि याइ धयादिल ।
ज्याझ्वलय् समाजसेवी व धिमे सहायक गुरुपिं आशाकाजी महर्जन, बेखालाल महर्जन व तःननी बचत तथा ऋण सहकारी संस्थाया अध्यक्ष अष्टमान महर्जन पाहाँकथं झायादीगु खः । सजना तण्डुकारं लसकुस यानादीगु उगु ज्याझ्वलय् धिम्बा गुरु सम्झना थुसं मञ्जुश्री चचाप्याखं न्ह्यब्वयादीगु खःसा मेमेपिं कलाकारपिंपाखें धिमेप्याखं व मेमेगु हुलाप्याखं व म्ये नं न्ह्यब्वःगु खः ।
धिम्बाया परिकल्पनाकार व मूगुरु सुरोज महर्जनं उसाँय् व ब्यायामय् मनोरञ्जनया महत्वबारे उलादिसें थुगु अभियानं मेमेगु देसं संस्कृति व उकिया अतिक्रमण पनेगु जक झीगु संस्कृति न्हूगु पुस्तायात लःल्हायेगु ज्यां संरक्षण नं जुइ धयादिल । वयकलं थुगु अभियानय् ग्वाहालि यानादीपिं सकसित सुभाय् नं देछानादीगु खः ।
जीवनय् ह्यूपाया नितिं ३ घौ बीगु धासें स्वास्थ्यय् संस्कृति स्वानाः धिम्बा अभियान न्ह्याकूगु थुगु पुचलं “थः, थःगु परिवार, समाजया नितिं धिम्बा हुले, स्वस्थ जीवन म्वाये” धकाः सः बियावःगु खः ।
लोकंह्वाःम्ह कलाकार व धिम्बा गुरु सुरज ब्यञ्जनकारं न्ह्याकादीगु थुगु समारोहय् धिम्बा डान्स एण्ड मोरपाखें सकतां जात दुथ्याःगु पुचलं उत्साहजनक जुइक बुंगद्यः जात्राया झ्वलय् याकः मिसाया भुज्याः व जाह्वलाजात्राय् समावेशी धिमे प्याखं न्ह्यब्वयागु जानकारी नं ब्यूगु खः ।
“तापलय्”संकिपां हाकनं त्याकल सिरपा
लहनान्युज | तछलागा चौथी ११३८ ( जुलाई २ २०१८ )
नेवाः फिल्म सोसाइटीया ग्वसालय् थगुुने जूगु नेवाः फिल्म नखःबलय् पब्लिक च्वइस अवार्ड त्याकूगु संकिपा “तापलय्” आदीबासी जनजाति चलचित्र महासंघया ग्वसालय् जूगु निक्वःगु आदीबासी जनजाति चलचित्र महोत्सवय् नं पब्लिक च्वइस सिरपा त्याकेत ताःलागु दु ।
नेपालभाषा , तामाङ्ग,गुरुङ्ग,मगर, किरात राई,शेर्पा,माझी,थारु,राजवंशी,सुनुवार व थीथी भाय्या मूक्कं १४गु संकिपा दथुइ जूगु धेंधें बल्लाखय् थुकथं “तापलय्” संकिपां सिरपा त्याकेत ताःलागु खः । महोत्सवया झ्वलय् संकिपा स्वःवःपिं स्वकुमितय्सं कुर्कुगु मतया लिधंसाय् बीगु थ्व सिरपाया निंतिं मगर भाय्या रैंया , सुनुवार भाय्या गो सु नङा व नेवाः भाय्या तापलय् दथुइ धेंधें बल्ला जूगु खःसा सिरपा धाःसा तापलय् संकिपा त्याकूगु खः ।
येँया पर्यटन बोर्डय् आइतबार जूगु संकिपा नखःया समापन ज्याझ्वलय् सञ्चार तथा सुचना प्रविधी मन्त्री गोकुलप्रसाद बाँस्कोटा मूपाहाँ कथं झायादीगु खःसा वय्कलं सिरपा त्याकूपिन्त सिरपा लःल्हानादीगु खः । पब्लिक च्वइस सिरपा त्याकूगु संकिपा तापलय् यात मू पाहाँ मन्त्री बाँस्कोटां नीन्याद्व(२५द्व) तका दांया नापनापं हनापौ लःल्हानादीगु खः । थ्व सिरपा उगु संकिपाया निर्देशक बालमुकुन्द प्रजापतिं लःल्हाना कयादीगु खः ।
अथेहे तुं ज्याझ्वलय् आदिबासी संकिपामि अरुणकुमार प्रधानं निस्वनादीगु झिंछद्वतकाया हःपाः सिरपा किरात राई समुदाय्या “ढ्वाङकुम” संकिपायात लःल्हागु खः । थ्व संकिपाया निर्देशक शन्तकुमार राई खः । समापन ज्याझ्वलय् निक्वःगु आदिबासी जनजाति संकिपा नखः ताःलाकेत ग्वाहाली याःपिन्त नं मूपाहाँ मन्त्री बाँस्कोटापाखे सुभाय् पौ लःल्हानादीगु खःसा उगु संकिपा नखलय् ब्वति काःगु १४गुलिं संकिपायात म्हतिं ५द्वतका दां नं किपुकथं लःल्हाःगु खः ।
ज्याझवय् मूपाहाँ मन्त्री बाँस्कोटां नेपाःया म्हसीका धइगु हे जातिय विविधता व संस्कृतिया विविधता जूगुलिं थुकिया जगेर्ना व विकास यायेत संकिपा छगु बांलागु माध्यम जुइगुलिं आदिबासी जनजाति भाय्या संकिपायात तिबः बिइत नेपाल सरकार न्ह्याब्लें तयार दु धका धयादिल ।
आदिबासी जनजाति चलचित्र महासंघया नायः अमृतबहादुुर सुनुवारया सभानायसुइ न्ह्याःगु बिजं ज्याझ्वलय् महासंघया संस्थापक न्वकू आदिबासी जनजाति मातृभाषाया न्हापांम्ह संकिपा पत्रकार विजयरत्न तुलाधर असंबरे,तामाङ्ग संकिपामि जेनिश डोङ,माझी संकिपामि बिन्दु माझी व मेमेपिं वक्तपिन्सं आदिबासी संकिपा नखः व आदिबासी जनजाति मातृभाषाया संकिपा ख्यःयात कया थःथःगु नुगः खँ प्वंका दीगु खः ।
