Display Style:
Column Style
मौलिक बाजं पच्छिमा प्रतियोगिता
लहनान्युज | ञंलागा त्रयोदशी ११३८ ( अक्टुवर ७ २०१८ )
ख्वपया तेखाच्व त्वालय् च्वंगु पुलांसः शिवरात्री गुथिं थुगुसिया ‘भाजुवीर सिरपाः” त्याकूगु दु । मौलिक नापं न्हनावनाच्वंगु बाजं अर्थात ‘पच्छिमा’ कासाय् न्हाप जूसें उगु सिरपाः त्याकूगु खः । गुथियात सिरपाःकथं न्यय्द्वःतका लःल्हाःगु खः ।
उगु कासाय् थिमिया सिवाः साय्मि खलः व ख्वपया साःकोलना शिवरात्री गुथि ल्यू व लियांल्यू लाःगु खःसा छसिकथं उगु गुथियात स्वीद्वः तका व नीद्वःतका सिरपाः लःल्हाःगु खः । देय्न्यंकया मानन्धर समुदायया मंकाः गुथि केन्द्रीय मानन्धर संघ अन्तर्गत भाजुवीर सिरपाः उपसमितिं थुगु पच्छिमा बाजंया कासा याःगु खः ।
ज्याझ्वलय् पुलांम्ह सांसद नापं सिरपाः दाता लक्ष्मीदास मानन्धरं मौलिक बाजं न्हनावनेत्यंगु अवस्थाय् थ्यंगुलिं थुकियात संरक्षण याय्गु तातुनां वि.सं. २०४३ सालनिसें थः बाज्याया लुमन्तिइ बाजं कासा याय्गु नितिं अक्षयकोष नीस्वनागु जानकारी बियादिल । वय्कःयाकथं स्वीस्वदँ थुखे धाः बाजं, खिं बाजं नापं मेमेगु मौलिक बाजं संरक्षणया नितिं कुतः याना वयाच्वनादीगु दु ।
थुगुसिया कासाय् येँया चसांद्वः मानन्धर सनागू खलः, पाक्व पुखुद्यां मानन्धर सनाः खलः, थँहिति मानन्धर गुथि, सक्वया सक्व मानन्धर गुथि, ख्वपया पुलांसः शिवरात्री गुथि, तापालाछि, साःकोलान शिवरात्री गुथि, भ्वँतया वाङ्ख्यः दाफा भजन खलः, मध्यपुर थिमि मानन्धर संघ, सिवाः साय्मि खलःलिसें झिगू पुचःया ब्वति दुगु खः । उगु कासाया निर्णायककथं मौलिक बाजंया विज्ञपिं न्हुच्छेबहादुर डंगोल, धर्म मुनिकार व सूर्यनारायण महर्जन च्वनादीगु खः ।
‘क्या फसाद’या भिं–साइत ज्याझ्वः
लहनान्युज | ञलागा पंचमी ११३८ ( सेप्तेम्वर ३० २०१८ )
नेपालभाषा संकिपा निर्माणया ख्यलय् दकले अप्वः संकिपा निर्देशन यानाः पिथनादीम्ह निर्देशक, च्वमि व कलाकार कथं म्हस्यूम्ह निर्देशक बासु शाहीं आः न्हूगु संकिपा ‘क्या फसाद’ निर्माण याइगु जूगु दु । तर, थुगु संकिपाया निर्माण ज्या न्याला लिपा जक पूवनीगु जूगु दु ।
निर्देशक च्वमि कलाकार बासु शाहीया आःतकया दुने दकले लिपांगु संकिपा ‘वाया दुने जाकि दु’ खः । वय्कलं थ्यंमथ्यं २० गू संकिपा निर्देशन यानाः पिथनादीधुंकूगु दु ।थुगु संकिपा ‘क्या फसाद’या भिं–साइत ज्याझ्वलय् थुगु खँया जानकारी ब्यूगु खः ।
उगु भिं–साइत ज्याझ्वलय् बरिष्ठ सिने पत्रकार विजयरत्न असंबरें नैंक्या तःछ्यानाः भिं–साइत यानादीगु खःसा नेवाः एचडी टेलिभिजनया प्रमुख नविन जोशी क्यामेरा ‘अन’ यानाः भिं–साइत यानादीगु खः । अथेहे, मूपाहाँ कथं झायादीम्ह उद्यमी ज्योतिरत्न बज्राचार्यं ‘क्ल्याप टेक’ यानाः संकिपा ‘क्या फसाद’या भिं–साइत यानादीगु खः ।अथेहे, उगु भिं–साइत ज्याझ्वलय् ‘क्या फसाद’ संकिपाया कलाकारपिन्सं अभिनय यानाः भिं–साइत चूलाकादीगु खः ।
उगु संकिपा ज्याझ्वलय् बासु शाहीं हे च्वयादीगु व निर्देशन यानादीगु ‘एक सय एक’ नेपालभाषा संकिपाया डिभिडि चाःया सार्वजनिक ज्याझ्वः नं जूगु खः ।संकिपाया डिभिडि सार्वजनिक ज्याझ्वः मूपाहाँ व्यापारी ज्योतिरत्न बज्राचार्यलिसें पाहाँपिं नविन जोशी, विजयरत्न असंबरे, ‘क्या फसाद’ संकिपाया छम्ह निर्मात्री मिञ्जु शाही, माछामासु व्यवसायी संघया नायःलिसें ज्याझ्वःया सभानायः ग्वसाः खलः कल्प प्रोडक्सनया नायः बासु शाही व थीथी पाहाँपिन्सं मंकाः कथं यानादीगु खः ।
अथेहे, मूपाहाँ बज्राचार्य निर्देशक बासु शाहीं द्वलंद्वः संकिपा निर्माण यायेफयेमा धैगु कामना यानादिसें ‘भाषा म्वाःसा जाति म्वाइ’ धैगु महाकवि सिद्धिदास महाजुया मन्त्रयात साकार यायेगु खःसा नेवाः जाति ल्यंकातयेगु खःसा सकल नेवाः समुदायं थःपिनिगु छेँय् व थः मचाखाचातलिसे नेवाः भासं खँल्हाबल्हा यायेत इनाप यानादीगु खः ।
“जिगु मनया यःम्ह” पिहाँवल
नृपेन्द्रलाल श्रेष्ठ | ञंलाथ्व त्रयोदशी ११३८ ( सेप्तेम्वर २३ २०१८ )
नेपालभाषाया संगीतख्यलय् ताःई न्ह्यःनिसें पलाः न्ह्याका वया च्वनादीम्ह म्येहालामि देबकुमारी खड्गीया म्येया म्यूजिक भिडियो मुनाकथं “जिगु मनया यःम्ह” नांयागु डिभिडी चाः छगू ज्याझ्वःया दथुइ पितब्वज्या जूगु दु ।
ख्यालि जुजु मदनकृष्ण श्रेष्ठ मूपाहाँकथं झायादीगु उगु ज्याझ्वलय् बाजं गुरु कान्छाभाइ महर्जन, संकिपा निर्देशक रामकृष्ण खड्गी, नृत्य गुरु दीपक बज्राचार्य, लोकगायक रत्न बेहोशी विशेष पाहाँकथं झायादीगु खः ।
सञ्चारकःमि व संगीतकःमि सुरज व्यन्जनकारं न्ह्याकादीगु उगु पितब्वज्या ज्याझ्वःया संयोजन कलाकार भिमसेन रिसालं यानादीगु खः ।
ज्याझ्वलय् उगु डिभिडिचाः पिथनेत ग्वाहालि यानादीपिं कलाकार, निर्देशक, प्राविधिक, विज्ञापनदातापिंलिसें विशेष पाहाँ व मूपाहाँपिन्त नं डिभिडी पिकाकः ईन्द्र खड्गीपाखें मतिनाया चिं देछानादीगु खः ।
भिमबहादुर नकःमिया भजन संग्रह पितब्बज्या
लहनान्युज | गुंलागा एकादशी ११३८ ( सैप्तेम्वर ६ २०१८ )
संगीतकार मनराजा नकःमिया अबु भिमबहादुर नकःमिया याकः च्वसां पिदंगु भजन संग्रह बलम्बु ज्ञानमाला भजन थौं छगु ज्याझ्व यासें पितब्वज्या जूगु दु ।
उगु ज्याझ्वलय मूपाँहा कथं वाङमय शताब्दी पुरुष डा. सत्यमोहन जोशी, विशिष्ट पाहाँ कथं मूपाहाँ जनकवि दुर्गालाल श्रेष्ठ, ख्यालिजुजु मदनकृष्ण श्रेष्ठ, भिक्षु पैंञारत्न, नेपाल ज्ञानमाला भजन समितिया नायः मय्जु रमना श्रेष्ठ नाप वरिष्ठ सिनेपत्रकार बिजयरत्न असंबरें मंकाः कथं पितब्बज्या यानादीगु खः ।
संगीतकार मनराजा नकःमिया सभाध्यक्षताय् जुगु उगु ज्याझ्वलय् म्येचाः पिकाकः मोहन शाक्यं लसकुस न्वचू तयादीगु खः ।
चलचित्र तथा साँस्कृतिक प्रतिष्ठान के.पी.पाठकया नेतृत्वय्
लहनान्युज | गुंलागा सप्तमी ११३८ ( सेप्तेम्वर २ २०१८ )
नेपाल चलचित्र तथा साँस्कृतिक प्रतिष्ठानया साधारणसभापाखें न्हूगु ज्यासना पुचःया नायः पदय् के.पी. पाठकयात सर्वसम्मत ल्यःगु दु ।
येँय् जूगु न्हापांगु साधारणसभां ७म्ह दुजः दुगु न्हूगु ज्यासना पुचलय् न्वकूकथं बरिष्ठ सिनेपत्रकार विजयरत्न तुलाधर “असंबरे”, मूछ्याञ्जेय् राजु के.सी., छ्याञ्जेय् राजु भण्डारी, दांभरिइ कमलप्रसाद शर्मा व दुजःकथं विश्वराज सापकोटा व रसिक पाठक सर्वसम्मतं ल्यःगु खः ।
उगु साधारणसभाय् तदर्थ समितिया नायः के.पी.पाठकं प्रतिष्ठानया बारे थःगु खँ तयादीगु खःसा तदर्थ समितिया छ्याञ्जे राजु भण्डारीं प्रतिष्ठानया वार्षिक प्रतिवेदन व दांभरि कमलप्रसाद शर्मां आर्थिक प्रतिवेदन न्ह्यब्वयादीगु खः ।
अथे हे उगु प्रतिष्ठानं थूगुसिया फागुन महिनाय् जुइगु नेपाल अन्तर्राष्ट्रिय चलचित्र महोत्सवया निक्वःगु संस्करणया नितिं संकिपा ल्ययगुया नितिं प्रतिष्ठानया उपाध्यक्ष विजयरत्न तुलाधर “असंबरे”या संयोजकत्वय् नीस्वंगु ल्यज्या समितियात लसकुस यानादिसेंसें पदभार समेत लःल्हाःगु खः ।
उगु ल्यज्या समितिइ वरिष्ठ सूचना प्रविधि विज्ञ करुण थापा, ध्वनिविद् आलोक तिवारी, चलचित्र निर्देशक रामराजा दाहाल, चलचित्र छाँयाकार शबनम मुखिया, साहित्य समालोचक अभय श्रेष्ठ व सिने पत्रकार सुशील पौडेलयात दुजःकथं दुथ्याकातःगु दु ।
