Display Style:
Column Style
नृत्य निर्देशक हनी श्रेष्ठयात हन
लहनानयुज | चौलागा षष्ठी ११३८ (अप्रिल ६ २०१८)
नृत्य निर्देशक संघ नेपालं येँय् ग्वसाः ग्वःगु ‘नृत्य गुरुमा हनी श्रेष्ठ सम्मान साँझ २०७४ नाप सांस्कृतिक ज्याझ्वः याःगु दु ।
उगु ज्याझ्वलय् मूपाहाँ कानून न्याय तथा संघीय मामिलामन्त्री शेरबहादुर तामाङं थःगु खँ तयादीसें कलाकार मनोरन्जनया माध्यम जक मखसें, देय्या म्हसीका हे जूगु धासें कलाकारिता ख्यःया विकासया नितिं थम्हं हर सम्भव कुतः यायेगु धयादिल । राज्यं कला ख्यः अले कलाकारया सम्मान इलय् हे यायेमाःगु खँय् तामाङं बः बियादिल ।
संघया ग्वसालय् कानूनमन्त्री तामाङं नेपाःया न्हापांम्ह नृत्य प्राध्यापक लिसें नृत्य निर्देशक हनी श्रेष्ठयात ताम्रपत्र नाप २५,५५५ ध्यबा बिया हनादिगु खः ।
सम्मान ज्याझ्वलय् लसकुस यासें ज्याझ्वः कजि लिसें संघया केन्द्रिय दांभरिं भावना कार्कीं राज्यं कलाकारिता ख्यःयात राज्यया न्यागूगु अंगया रुपं मान्यता बीमाःगु माग लिसा कयादिल । कलाकार ब्वयेगु ज्वलं जक मखसें राज्यया म्हसीका हे जूगुलिं कलाकारिता ख्यःयात राज्यया न्यागूगु अंगया रुपं मान्यता बीमाःगु कार्कीया धापू खः ।
देय्न्यंकया नृत्य निर्देशकपिं संगठित जुयाः संघ नीस्वंगु दिं श्रावण २६यात राष्ट्रिय नृत्य दिवसया रुपं घोषणा यायेमाःगु माग नं कार्कीं न्ह्यःने तयादिल ।
२०१५ सालय् विद्यार्थी जीवननिसें हे नृत्यया शुरुवात यासें थौंतक्क नं न्हूपिं नृत्यकारपिन्त प्रशिक्षण बीगु, नृत्य सयेकाच्वंपिं विद्यार्थीपिनिगु लागिं नृत्य सम्बन्धि पाठ्यपुस्तक विकास यायेगुनिसें थुगु ख्यलय् निरन्तर योगदानयात च्वछासें हनी श्रेष्ठयात सम्मानित यानागु ज्याझ्वलय् जानकारी ब्यूगु खः ।
संघं थ्वयां न्ह्यः नेपाःया न्हापांम्ह नृत्य गुरु भैरवबहादुर थापायात हंगु खःसा अन्तर्राष्ट्रिय नृत्य दिवसया झ्वलय् न्याम्ह नृत्यगुरुपिन्त नं हंगु खः ।
गोर्जियस एटायर शो जुइगु
लहनान्युज | चौलागा चौथी ११३८ (अप्रिल ४ २०१८ं)
गोर्जियस इन्टित्यूट अफ फेसन टेक्नोलोजी (गीफ्ट)या ग्वसालय् गोर्जियस एटायर शो २०१८ थ्व हे वइगु २३ चैतय् जुइत्यंगु दु ।
थौं छगु पत्रकार सम्मेलन यासें गीफ्टया निर्देशक शोभा महर्जन थुकिया बारे जानकारी बियादीगु खः ।
थुगु फेसन शो यात कोरियोग्राफी म्यानहण्ट २०१२ सनिश शाक्यं यानादीगु खःसा मुक्कं २६म्ह मिज व मिसा मोडल ब्बति काइगु न जानकारी बियादीगु खः ।
थुगुु ज्याझ्वलय् मूपाहाँ कथं लोकंह्वाम्ह कलाकार सरोज खनाल व विशेष पाहाँ कथं लोकंह्वाःपिं कर्ण दास, बबिनप्रधान, भीमतुलाधर व दिपक बज्राचार्य नाप अथेहे नांजाम्ह फोटोग्राफर राजभाइ सुवाल झायादी धःका थौंया पत्रकार सम्मेनलय् जानकारी बियादीगु खः ।
थुगु ज्याझ्वःया ब्यवस्थापन क्लबमाण्डु इन्टरटेन्मेन्ट पाखें जुइ त्यःगु खः ।
मिस नेवाः पोखराया उपाधि प्रीति बुद्धाचार्यं त्याकल
लहनान्युज | चौलागा पारु ११३८ (अप्रिल १ २०१८)
प्रीति बुद्धाचार्य मिस नेवाः पोखरा ११३८ जुइत ताःलाःगु दु । वय्कलं २०म्ह प्रतिस्पर्धीयात ल्यूने लाकाः थुगु उपाधि त्याकेत ताःलाःगु खः । वय्कःयात मिस नेवाः ११३७या विजेता अंशु शाक्यं ताज पुइकादीगु खः ।थुगु उपाधिया ताजया नापनापं पीद्वःतका दां व गिफ्ट ह्याम्पर नं त्याकादीगु दु ।
उगु कासाय् प्रियंका श्रेष्ठ फष्ट रनरअप व जेनिफर श्रेष्ठ सेकेण्ड रनरअप जुयादीगु खः । फष्ट रनरअप प्रियंकां नीन्याद्वः तका व थीथी गिफ्ट ह्याम्पर व सेकेण्ड रनरअप जेनिफर श्रेष्ठं झिंन्याद्वः तका नगद व थीथी गिफ्ट ह्याम्पर त्याकादीगु खः ।
थ्व हे झ्वलय् ‘मिस पोखरा’ जुयादीम्ह प्रीति बुद्धाचार्यं मिस नेवाःया ताजलिसें बेष्ट ट्यालेन्ट व बेष्ट नेपालभाषा सिरपाः नं त्याकादीगु खः । अथे हे बेष्ट पर्सनालिटी रोजिना ताम्राकार, बेष्ट फोटोजेनिक स्मृति श्रेष्ठ, बेष्ट फ्रेण्डली सन्ध्या श्रेष्ठ, बेष्ट भ्यूअर्स च्वाइस सचिता ताम्रकार, बेस्ट स्माइल रिया श्रेष्ठ जुयादीगु खः । वय्कःपिन्सं म्हतिं न्याद्वः÷न्याद्वः तका दां सिरपाः त्याकादीगु खः ।
उगु ज्याझ्वलय् ४ नम्बर प्रदेशया सांसद कृष्ण थापा, मिस नेवाः पोखराया मू कजि गजेन्द्रमान श्रेष्ठ, नेवाः खलः कास्कीया नायः अशोक पालिखें थुगु कासापाखें व्यक्तित्व विकास, क्षमता अभिबृद्धि व फाइदा सकसितं जुइगु खँ कनादीगु दु ।
सुरजवीरया नेपालभाषाया म्येचाः ‘दोहलपा’ पिदन
लहनान्युज | चौलाथ्व अष्टमी ११३८ (मार्च २५ २०१८)
येँया नाचघरय् जूगु बूदिंया भिंतुना म्ये कासा ज्याझ्वलय् सुरजवीर बज्राचार्यया याकः सलय् ‘दोहलपा’ पिथन । वरिष्ठ संगीतकार अमरराज शर्मां, सुरजवीरया अबुजु चित्रवीर बज्राचार्य, इलाेहं प्रकाशनया प्रवन्ध निर्देशक नरेशवीर शाक्यं उगु म्येचाः सार्वजनिक यानादिल ।
म्येचाकलय् सुरजवीरं निभाः म्ये धेधेबल्ला कासाय् दकले बांलाम्ह म्येहालामिया सिरपा त्याकादीगु वरिष्ठ संगीतकार शर्मां हे च्वयादीगु व संगीत बियादीगु ‘तसकं यःम्ह’ दुथ्यानाच्वंगु दु ।
थुकथं हे म्येहालामि बज्राचार्यया हे च्वसाय् हिपहप ‘नेवाः अधिकार’, लोकंह्वाःम्ह गितारवादक फिरोज बज्राचार्यको संगीतय् म्येाहालामिया थःगु च्वसाय् ‘आः जिं लिफः स्वयाः’, धर्मकृष्ण सिकर्मीया च्वसाय् व संगीतय् ‘म्हगसय् वयाः’ व ज्ञानेश्वर निभाःया सलय् अतिकं लोकंह्वाःगु द्वारिकालाल जोशीया म्ये ‘अय् लमि तता’ नं थःगु सलय् हालाः थुकी दुथ्याकादीगु दु ।
थुगु म्येचाकलय् म्येहालामि बज्राचार्यया थीथी म्येचाकलय् पिदंगु लोकं ययेकूगु म्ये सुरज ब्यञ्जनकारया संगीतय् ‘का रे मय्जु छसलिं अय्ला’, ‘मस्यू जितः छु जुयाः वल’, ‘जि सिपँय् द्यनाच्वना’ न्हूच्छेकाजी महर्जनया संगीतय् ‘मतिनाया छपौ’, भूषणप्रसाद श्रेष्ठया च्वसाय् वदन शर्माया संगीतय् ‘छंत गुबलें खंगु मदुसां’, याेगरत्न शाक्यया च्वसाय् कान्छा गुरूजु अकेलाया संगीतय् ‘बरसेजू बरसात सुपाँय्’ नं दुथ्याकातःगु दुसा अतिकं लाेकंह्वाःगु ग्यानापु स्टाइल नं म्येचाः दाेहलपाय् दुथ्याकातःगु दु ।
थुगु म्येचाकलय् दुथ्याःगु छपु म्ये ‘नेवाः अधिकार’या लिरिकट भिडियाे ।
धुँ देय् या न्हापांगु संकिपा “बसन्त ऋत’” क्यनेज्या जुल
नृपेन्द्रलाल श्रेष्ठ | चिल्लागा नवमी ११३८ (मार्च ११ २०१८)
बरिष्ठ निर्देशक नाप कलाकार पवन जोशीया निर्देशनय् न्हुगु नेपालभाषाया संकिपा “बसन्त ऋत’” येँया राष्ट्रिय नाचघर जमलय् तःजिक क्यनेज्या जुगु दु ।
धुँ देय् प्रोडक्शनया न्हापांगु थुगु सकिपा सामाजिक बिषययात कया दयेका तःगु खः । उगु च्यारिटि शोलय् नेपालभाषाय सकिपा ह्यमिपिन्सं ब्बति काःगु खः ।
बरिष्ठ निर्देशक जोशी च्यारिटि शो लिपा लहनान्युजनाप खँ ल्हासें थुगु संकिपा स्वकुमि पिंस यक्कोसिया नुगँ साला काये फुगु ताया । स्वकुमि पिनिगु थुज्यागु हौसल्ला याना हाकन मेगु
संकिपा दयेकेत थः अझ उत्साहित जुयागु दु धकाः न धयादीगु दु । नाप प्रचारप्रसार याःगु मिडिया पार्टनर नाप हलय् वया स्वझापिं स्वकुमि पिन्त सुभाय् न देछायादील ।
अथेहे थुगु संकिपा मेमेगु थासय् याकन हे क्यनिगु जुइ धका बरिष्ठ निर्देशक जोशीं लहनान्युजयात कनादीगु खः ।
धुँ देय् प्रोडक्सन प्रा.लि.या निर्माता रामकृष्ण धिनाया निर्माणय् ‘बसन्त ऋतु’ संकिपालय् कलाकारपि किशोर चिपालु, अनु महर्जन, राजेन्द्र महर्जन, शोभा महर्जन, सुरेश महर्जन, सुशील श्रेष्ठपिन्स म्हितादीगु खः ।
थुगु संकिपालय् गुज्ये मालाकारं संगीत तयादीगु खःसा राजेश शाक्य छायाँकन यानादीगु खः ।
