यो मन मेरो मन कहिल्यै नबलिदिनु
दुःखमा न आत्तिदिनु सुखमा न मात्तिदिनु
यो मन मेरो मन कहिल्यै नबलिदिनु

नेपालभाषा ख्यलय् लोकंह्वाःम्ह म्येहालामि पुष्पराज शाक्यया खस नेपाली भायया म्ये ‘यो मन मेरो मन’ पिदन ।

जीवनय् लुइगु थीथी अवस्थाया हुनिं मन अशान्त जूगुयात वाःचायेका थुगु म्ये दयेकाःगु म्येहालामि पुष्पराजं कनादीगु खः । वयकलं हे च्वयादीगु अले लसय् चिनादीगु थुगु म्ये थुगु वरिष्ठ सिने पत्रकार विजयरत्न असंबरेया मूपाहाँसुइ छगू ज्याझ्वःया दथुइ सार्वजनिक याःगु खः । म्ये उलेज्या यासें मूपाहाँ असंबरें म्ये बांलाताःगु व थुगु म्ये लोकंह्वाइगु खँय् दुनुगलं आशा यानागु खँ कनादिल ।

ज्याझ्वःया पाहाँ नेवाः पत्रकार राष्ट्रिय दबू नायःनापं म्येहालामि सुरजवीर बज्राचार्यं पुष्पराज बुदिंया भिंतुना म्ये कासा परिवारया छम्ह दुजः जूगु लसता न्ह्यथंसें प्रतिभां जाःम्ह पुष्पराजया थुगु म्यें खस नेपाली भायया सांगीतिक ख्यलय् नं धिसिधाःगु ब्वति जुइमा धयादिल । ज्याझ्वःया पाहाँ सुरेन्द्र तुलाधरं म्येया प्राविधिक पक्षया नं तारिफ यासें म्ये सृजना यानादीम्ह पुष्पराजया प्रगतिया कामना यानादिल ।

भूपेन्द्र बज्राचार्यया संगीत संयोजनय् ज्योति रेकर्डस्य् रेकर्ड जूगु थुगु म्येया रेकर्डिङ व मिक्सिङ फिरोज बज्राचार्यं यानादीगु खः । वाद्यवादकपिं सिमरन महर्जन व आशिष बज्राचार्यया नं अभिनय दुथ्याःगु थुगु म्यूजिक भिडियोया छायाँकन, सम्पादन व निर्देशन अमर चित्रकारं यानादीगु खः ।

सि–लभ रेष्ट्रो एण्ड बार कनिबहालय् जूगु ज्याझ्वलय् म्ये व म्यूजिक भिडियो दयेकेज्याय् ग्वाहालि यानादीपिन्त हनेज्या नं जूगु खः । ज्याझ्वः म्येहालामि अमाेघवीर बज्राचार्यं न्ह्याकादीगु खः ।

म्येया लिंक https://youtu.be/sL8veAtlcbk

 

वरिष्ठ नाट्यकर्मी नारायणदेवी प्रधानं नेपाल संगीत तथा नाट्य प्रज्ञा प्रतिष्ठानं नृत्य व नाट्य कलाकारयात कःघायेमफूगु धका थःगु बिचाः तयादीगु दु ।

वयलं यलय् जूगु छगू ज्याझ्वलय् थःगु खँ तयेगु झ्वलय् वरिष्ठ कलाकार प्रधानं प्रतिष्ठान विधागत रुपं समावेशी जुइमफूगु धासें सम्वन्धित निकायया ध्यान सालादिल ।

नृत्य निर्देशक संघ नेपाल यल कचां ग्वसाः ग्वःगु विक्रम सम्वत २०७८ न्हूदँया भिंतुना कालबिल ज्याझ्वलय् संघया केन्द्रीय नायः भुवनदास श्रेष्ठं कलाकारिता क्षेत्रय् नृत्य विधायात उपेक्षा यायेगु यानाच्वंगु धासें नृत्य निर्देशकतय् मुद्दा स्थापित यायेत सकलें नृत्य निर्देशकत संघमार्फत संगठित जुइत नायः श्रेष्ठं आव्हान यानादिल ।

उगु ज्याझ्वलय् नेपाल सरकारपाखें २०७७ सालयालागिं सुप्रबल जनसेवा श्री तृतीय पदकं सम्मानित कचाया सल्लाहकार वरिष्ठ कलाकार प्रधानयात सम्मान नं याःगु खः ।

ज्याझ्वलय् केन्द्रीय न्वकू संजय शर्मा राजोपाध्याय, केन्द्रीय छ्यान्जे ज्ञान बहादुर महर्जन, केन्द्रीय प्रवक्ता अले दुजः ऋषिकेश श्रेष्ठ, सल्लाहकार मोहन ब्यन्जनकारया लिसें थीथी जिल्लाया पदाधिकारीं भिंतुनालिसें थःथःगु नुगः खँ तयादीगु खः ।

जनकवि दुर्गालाल श्रेष्ष्ठया च्वसां पिदंगु अले  म्येहालामि सलिल सुन्दर तुलाधरया सलय् थ्वया च्वंगु “खः थें मखुथेंं” बोलया भजनया म्युजिक भिडियो नेवाः एचडि टिभिइ छगू ज्याझ्वःया दथुइं पितब्वज्या जूगु दु ।

नेवाः टिभिइ प्रत्यक्ष प्रसारण मार्फत जूगु पितब्वज्याय् नेवाः टिभि एचडिया प्रबन्ध निर्देशक नाप सन्चारकःमि नबीन जोशीं लसकुस न्वचु तयादीगु खःसा वयकलं थौंया युगय् टेलिभिजनया महत्व अप्वःया वःगु खँ न्ह्यथनादिल ।

उगु म्युजिक भिडियो पितब्वज्या ज्याझ्वलय् म्येया लय चिनामि मानकृष्ण वावां थुगु भजन थम्हेसिनं तःदँ न्ह्यनिसें भजनया रुपय् हाला वया च्वनागुलिइ आः वया म्युजिक भिडियोया रुप काःगुलिं तसकं लसता वःगु खँ कना दिल ।

ज्याझ्वलय् नेवाः पत्रकार राष्ट्रिय दबूया वरिष्ठ न्वकुु नृपेन्द्रलाल श्रेष्ठ लगायत सन्चारकःमि विगेन तुलाधर व मीना बज्राचार्यपिन्सं भिन्तुना बियादीगु खः । उगु ज्याझ्वलय् म्युजिक भिडियोया निर्देशक अभिनव जोशीं भजनयात न्हूगु शैलीं न्ह्यब्वयेगु कुतः यानागु खँ कनादिलसा वरिष्ठ सिनेपत्रकार नाप नेपालभाषाया न्हापांम्ह म्युजिक भिडयो निर्देशक विजयरत्न असंबरें पितब्बज्या जुगु म्युजिक भिडियोया समीक्षा यानादिगु खः ।

समीक्षा यायेगु झ्वलय् म्युजिक भिडियोया ख्यलय् ल्यायम्ह पुस्ताया प्रवेशया तारीफ यानादिसे पितब्वज्या जूगु म्युजिक भिडियो परम्परागत भजन शैली सिबें तसकं फरक जूगु खँयात नं च्वछानादिल । थ्व म्येया लय चिनामि मानकृष्ण वावा खःसा बाजं ग्वसामि अन्जन श्रेष्ठ, क्यामरा सुशील महर्जन यानादीगु खः । तुलाधरया सभाध्यक्षताय् जूगु ज्याझ्वः जुगु खः।

जामनः गुभाःजुया निर्देशक रवि सायमिया निर्देशनय् न्हूगु नेपाली म्यूजिक भिडियो छगु ज्याझ्वः दथुइ सार्वजनिक जूगु दु ।

उगु ज्याझ्वलय् वरिष्ठ ख्यालि कलाकार सन्तोष पन्तं म्येया लोकार्पण यानादीगु उगु म्यूजिक भिडियो सायमिया निर्देशनय् प्रभानन्द वैद्यं हालादीगु म्ये ‘किन आज....’ या भिडियो सार्वजनिक जूगु खः ।

ज्याझ्वलय् नवासें वरिष्ठ कलाकार सन्तोष पन्तं उद्योग व्यापार क्षेत्रय् स्थापित व्यवसायी प्रभानन्दया गायन प्रतिभाया प्रशंसा यानादिल ।

म्येया च्वमि व लयचिनामि महेश राज थापां च्वमिं थःगु भावप्रति न्याय याःगु बिचाः तयादिल । निर्देशक रवि सायमिं थम्हं फक्व मेहनत यानाः म्ये दयेकेधुंकाः आः दर्शकया ल्हातय् लःल्हानाबियागु धयादिल ।

म्यूजिक भिडियोस ग्रिस वैद्य व रेजिसा डंगोलं अभिनय यानादीगु दु ।