Display Style:
Column Style
कर सचेतना सडक नाटक ‘आनासुकी घरबेटी बा’ न्ह्यात
लहनान्यूज | चौलाथ्व पञ्चमी ११४१, वैशाख ४ शनिबाः
येँ महानगरपालिकां करदातायात कर पुलेगु खँय् सचेतना थनेत ‘आनासुकी घरबेटी बा’ सडक नाटक न्ह्याकूगु दु ।
करदातायात कर पुलेगु नागरिक दायित्व थुइकेबीगु लिसें करय् आनासुकीया तकं महत्व दइ धइगु सकारात्मक हसना बीत ‘आनासुकी घरबेटी बा’ सडक नाटक न्ह्याकागु येँ महानगरपालिका राजस्व विभाग प्रमुख डा। शिवराज अधिकारीं जानकारी बियादिल ।
‘न्हापांगु चरणय् वसन्तपुर, कालिमाटी, कलंकी, चावहिल, गौशाला, न्हू बानेश्वर लिसेंया १० थासय् सचेतनामूलक सडक नाटक क्यने । प्रभावकारी जुल धाःसा मेथाय् नं क्यनेगु तयारी दु’ राजस्व विभाग प्रमुख अधिकारीं धयादिल ।
कोभिडया हुनिं न्ह्यानाच्वंगु आर्थिक दँय् राजश्व मुनेज्या प्रक्षेपण हे म्ह्वः जक यानागु धासें अधिकारीं प्रक्षेपण कथं कर मुंकेगु आज्जुं अभियान न्ह्याकागु जानकारी बियादिल ।
सडक नाटकया बाखंया हसना न्यंकुसें अधिकारीं धयादिल, ‘कर छुं ई छले यायेफइ, तर छन्हु न छन्हु कानुनया फन्दाय् लाइ । भचा भचा कर पुला वंसा सम्मानजनक जीवन हनेफइ धइगु हसना हे नाटकं बीत स्वःगु खः ।’
वय्कलं कोभिडया हुनिं थुगुसी व्यवसाय करय् २० प्रतिशत व होटल, मनोरञ्जनलिसें पर्यटनलिसे सम्वन्धित क्षेत्रयात ५० प्रतिशत छुट बियागु व सम्पत्ति करय् नं होटलयात असारतक्क ७५ प्रतिशत छुट बियागु जानकारी नं बियादिल । लिसें कोभिडया इलय् लच्छिया बाः छुट ब्यूपिं छेँथुवाःयात असारतक्क करय् १० प्रतिशत छुट बियागु नं धयादिल ।
पहिरन लिसें ज्वःलागु मास्कया फेसन शो
लहनान्युज | चौलाथ्व चौथी ११४१,बैसाख ३ शुक्रवाः
“अस्तित्व” नां छुना नमूना कलेज अफ फेसन टेक्नोलजीं वंगु वाः येँया सोल्टी होटलय् छगु ग्राजुएसन फेसन शो यात ।
तःजिगु व हिलासु हे फेसनया महत्वपूर्ण पक्ष खः धैगु खँ कलेज अफ फेसन टेक्नोलजीया ग्राजुएसन फेसनय् खनेदत ।
प्यंदँया फेसन डिजाइनिङ सम्बन्धी स्नातक तहया ब्याचलर अफ फेसन डिजाइन एण्ड म्यानेज्मेन्टया लिपांगु पहिरण अन्तर्गत उगु फेसन शो पाखें न्ह्यब्वःगु पहिरनलिसें ल्वःगु मास्क पुना मोडलपिं ¥याम्पय् वःगु खः ।
दक्वः पहिरनलिसे ल्वःगु मास्कलिसें मोडलपिं मञ्चय् वःबले आःया कोभिड १९ या ग्याःचिकूयात नं बाँलाक्क व सूचंया सम्वाहककथं न्ह्यब्वःगु दु ।
थुगसीया ज्याझ्वलय् नेपालय् हे दकले न्हापांखुसी मोडलपिन्स पुनातःगु पहिरन थें जागु हे लँ कतामरीयात नं पुंका पहिरनया सृजनाकर्तापिं तकं ¥याम्पये न्ह्यःब्वःगु खः ।
कलेजया संस्थापक प्रिन्सिपल ज्ञानी शोभा तुलाधरलिसें मोडलपिं रनवेले झाया ज्याझ्वः न्ह्याःगु खः । ज्याझ्वलय् ७९गू आकर्षक, ल्ववनापुसेच्वंगु एवं थीथी पहिरन त न्ह्यब्वःगु खः ।
गुकिया ७९म्ह हे सृजनाकर्तापिं नमुना कलेज फेसन डिजाइनिङय् स्नातक यानाच्वंपिं १५क्वःगु ब्याचया विद्यार्थीपिं खः ।
दक्वः पहिरन मिसापिनिगु साहस, आत्मविश्वास, क्षमता, त्याग, समर्पण, सहनशीलता, वाल्सत्यता, धैर्यता, निर्भिकता, निडरता, विनम्रता लिसें नारी जीवन व व्यक्तित्वया बहुआयामिक गौरवशाली पक्षया संवाहक खनेदुगु खः ।
उगु फेसन ज्याझ्वलय् न्ह्यब्वःगु पहिरनं छक्वलं मिसापिनिगु बोल्ड एण्ड ब्यूटीफुललिसें सेक्सी एण्ड ग्ल्यामरस किपा जुया शालिन, गम्भीर, दृढ निश्चयी, ममतामयी, शक्तिया स्वरुपयात तकं स्वयेपूmगु खः ।
चैत्र ३० गते सोल्टी होटलया क्राउन प्लाजाय् कोरियोग्राफर रोजिन शाक्यया निर्देशनय् न्ह्यागु उगु फेसन शोलय् कःघागु ७९गू पहिरनयात च्यागू सिक्वेन्सपाखें न्ह्यब्वःगु खः । गुकिइ २०म्ह मोडलपिन्सं बाँलाक्क न्ह्यब्वःगु खः ।
उपिं मोडल त मध्ये बच्छि व्यावसायिक मोडल खः धाःसा बच्छि कलेजय् हे थीथी सेमेष्टरय् ब्वनाच्वंपिं विद्यार्थी त खः ।
मीना कुमारी महर्जनया करुणां भयेब्यूगु म्यूजिक भिडियो सार्वजनिक
शोभा श्रेष्ठ | चिल्लागा चह्रै ११४१,चैत्र २९ आईतवाः
इन्द्रेणी सांस्कृतिक समाज (इसास) किपूया ग्वसालय् किपूया नांजाःम्ह जनपक्षीय गायिका मीना कुमारी महर्जनया सलं थ्वयाच्वंगु करुणां भयेब्यूगु नांयागु म्येचा म्यूजिक भिडियो सार्वजनिक जूगु दु ।
म्येहालामि महर्जनया याकः सलय् न्ह्यय् पु म्ये दुथ्यागु उगु म्येचाया किपू नगरपालिकाया मेयर रमेश महर्जनं पितब्वज्याय् यानादीगु खःउगु ज्याझ्वलय् झ्वलय् मूपाहाँ महर्जनं म्येहालामि महर्जनया नामय् किपूया साँस्कृतिककःमि पिनिगु छगू सफू पिथनेगु बचं बियादिल ।
कृष्ण क्याटरिंगया हलय् जूगु ज्याझ्वःया इसासया नायः बीरप्रसाद भंसालीया सभाधक्ष्यताय् न्ह्याःगु खःसा ज्याझ्वलय् अमरराज शर्मा राजोपाध्याय व साहित्यकार एवम् सन्चारकःमि मीना बज्राचार्यं पितब्वज्या जूगु म्येया समीक्षा यानादीगु खः । थुकथं नेपालभाषाया म्युजिक भिडियो ख्यलय् छम्ह मिसा समीक्षकं समीक्षा यानादीगु थ्व न्हापांखुसि खः ।
म्येहालामि महर्जनया म्येया म्युजिक भिडियो पितब्वज्याय् डा चन्द्र मान बज्राचार्य व नेपालभाषा म्युजिक भिडियोया न्हापांम्ह निर्देशक विजयरत्न असंबरें नं नुगःखँ तयादीगु उगु ज्याझ्वः मेलोडी क्विन धका नांजाम्ह म्येहालामि दिपा महर्जनं न्ह्याकादीगु खः ।
करुणां भयेब्यूगु म्येचालय् म्येहालामि महर्जनया थःहे जहान शम्भुराम महर्जन मान्छें च्वयादीगु म्ये लगायत प्रा डा चन्द्रमान बज्राचार्य , लोककवि राजभाइ जकःमि, जनकवि दुर्गालाल श्रेष्ठपिनिगु म्ये दुथ्याना च्वंगु दुसा लय् सन्तोष महर्जनं तयादीगु खः ।
थुके दूगु म्युजिक भिडियो या निर्देशन नांजाम्ह संकिपामि कलाकःमि पवन जोशी व ल्याय्म्ह पुस्ताया ललेन्द्र शाक्य याःगु खः।
दर्शना महर्जनयाया ‘ए साथी’ पिहाँवल
लहनान्यूज | चिल्लागा त्रयोदशी ११४१, चैत्र २७ गते शुक्रबाः
म्ये हालामि दर्शना महर्जनया थःगु हे सः व संगीत दूगु मर्मस्पर्शी म्ये ‘ए साथी’ बोलया लिरिकल भिडियो पिहाँवःगु दु ।
चिधिकःगु उमेरनिसें थःगु म्हसिका दयेकत ताःलाम्ह म्ये हालामी महर्जनया उगु म्ये ज्योति क्षेत्रीया खँग्वः खः धाःसा सञ्जय खड्गीं एरेन्ज यानादीगु खः । छुं ई न्ह्यः म्येहालामी दर्शनां नेपाल भाषाया म्ये पितब्वज्या याःगु खः ।
पप, आधुनिक दक्व म्ये हालावयाच्वम्ह दर्शनाया “चुलि जाल न्हां” न्हापांगु नेपाल भाषा म्ये खः । जनकवि दुर्गालाल श्रेष्ठया शब्द, मनराज नकःमीया संगीत, नरेन्द्र महर्जनया प्रस्तुति दूगु भिडियो म्येहालामिया थःगु हे युट्यूब च्यानलपाखें उगु म्ये सार्वजनिक याःगु खः ।
वंगु पुस ५ गते प्रधानमन्त्री केपी शर्मा ओलीं प्रतिनिसिभा विघटन यायेधुंका हे कांग्रेसया छगू पुच ओली सरकारयात विस्थापित यायेमाःगु धिना कयाच्वंगु खः ।
उगु ईलय् कांग्रेसं संसद विघटनयात असंवैधानिक धया सतक ब्वज्या याःसां सभापति देउवा धाःसा मध्यावधि चुनावय् वनेगु बाँलागु धयावयाच्वंगु खः । सत्ता समीकरणया निर्णायक शक्तिया कथं जसपा दयाच्वंगु दु ।
छन्त नापलाये सातकि म्येया म्युजिक भिडियो पितब्बज्या
शोभा श्रेष्ठ | चिल्लागा अष्टमी ११४१, चैत्र २२ आइतवाः
कोरोनाया जोखिमया कारणं लकडाउनया ईलंनिसें नेपालभाषाया संगीत ख्यलय् थीथी कथंया ज्याझ्वः जूगु खःसा लकडाउन धुंकाः नेपालभाषाया म्युजिक भिडियो आपालं पिहाँ वयाच्वंगु दु ।
थ्वहे झ्वलय् छन्त नापलाये सातकि बोलया छपू म्येया म्युजिक भिडियो नेवा एचडी टिभिइ प्रत्यक्ष प्रसारणपाखें छगू औपचारिक ज्याझ्वः याना प्रिमियर जुगु दु ।
लोकंह्वाःम्ह म्येहालामि रत्नशोभा महर्जन व सज्जु मानन्धरं हालातःगु थुगु म्येयात जुगल डंगोलं लसय् हनादीगु खः । किरण जोशी व नेन्सी महर्जनं मोड, म्युजिक भिडियोया निर्देशन सुरेन्द्र मानन्धरं यानादीगु खःसा क्यामेरा आयुष महर्जन, सम्पादन ईन्द्र मानन्धरं यानादीगु खः ।
नेवाः एचडी टिभिइ प्रत्यक्ष प्रसारणपाखें प्रिमियर जूगु ज्याझ्वलय् वडा ल्याः १३ या पुलांम्ह वडा सदस्य समाजसेवी दिलबहादुर मानन्धर मूपाहाँ कथं झायादीगु खः ।
प्रिमियर ज्याझ्वलय् नेपालभाषाया न्हापांम्ह म्युजिक भिडियो निर्देशक विजयरत्न असंबरें प्रिमियर जूगु म्येया समीक्षा यानादिल ।
सुरेन्द्र मानन्धरं न्ह्याकादीगु ज्याझ्वलय् रत्नशोभा महर्जन व सज्जु मानन्धरं म्ये हाला नं न्यंकादीगु खः ।
